އައިޓީއެފް ކޮލިފިކޭޝަންގައި ވާދަކުރާ ޖޫނިއާ ޓެނިސް ޓީމަށް މިނިސްޓަރ މަހްލޫފް ހިތްވަރު ދެއްވައިފި

ބަންގްލަދޭޝްގައި ބާއްވާ އިންޓަނޭޝަނަލް ޓެނިސް ފެޑެރޭޝަން (އައިޓީއެފް) ގެ 12 އަހަރުން ދަށުގެ ދެކުނު އޭޝިއާ ރީޖަން މުބާރާތުގެ ކޮލިފިކޭޝަންގައި ވާދަކުރާ ރާއްޖޭގެ ޓީމަށް ޔޫތު މިނިސްޓަރ އަހުމަދު މަހްލޫފް ހިތްވަރުދެއްވައިފިއެވެ.

އާދީއްތަ ދުވަހު ހަވީރު މިނިސްޓަރ ޖޫނިއާ ޓީމާ ބައްދަލުކުރައްވާފައިވާއިރު، ރަނގަޅު ނަތީޖާއެއް ކޮލިފައިންގައި ނެރުމަށް މިނިސްޓަރ ވަނީ އެދިވަޑައިގެންފައެވެ.

މި މަހުގެ 21 އިން 29 އަށް ބާއްވާ މި މުބާރާތުގައި ރާއްޖޭގެ އިތުރުން ބައިވެރިވަނީ ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީލަންކާއެވެ.

މުބާރާތުގައި ރާއްޖެއިން ހަ ކުޅުންތެރިން ބައިވެރިވާއިރު، އެއީ އެއީ ޢިޔާސުއްދީން ސްކޫލުގެ އާޔާ ޝަފީ ސައީދު އާއި ދާއޫދު ސައީދު އާއި ބިލަބޮން ހައި އިންޓަނޭޝަނަލް ސްކޫލުގެ މުހައްމަދު މީކާއިލް އަހުމަދާއި، އާރާ އާސާލް އާޒިމް އާއި ދަރުމަވަންތަ ސްކޫލުގެ މުހައްމަދު ކައިސާން އިއްޒަތު ރަޝީދު އަދި ކަލާފާނު ސްކޫލުގެ ލުލުއާ ބިންތި ހަސަން އަރީފް އެވެ. ޓީމާއެކު ކޯޗެއްގެ ގޮތުގައި ކުމާރް އަދިކާރީ ދަތުރުކުރާނެއެވެ.