ކަމަދޫ ކައުންސިލްގެ ރައީސްކަމަށް ސާޖިދު އިންތިޚާބު ކޮށްފި
15 ޖޫން 2019 | ހޮނިހިރު 20:15ކަމަދޫ ކައުންސިލަކީ އެމްޑީޕީގެ މެޖޯރިޓީ އޮންނަ ކައުންސިލެއް
ކަމަދޫ ކައުންސިިލްގެ ރައީސް، ރައީސް އިބްރާހިމް މުހައްމަދު ސޯލިހާއެކު
ބ. ކަމަދޫ ކައުންސިލުގެ ރައީސް ކަމަށް އަޙްމަދު ސާޖިދު އިންތިޚާބު ކޮށްފިއެވެ.
ސާޖިދު ކަމަދޫ ކައުންސިލުގެ ރައީސްކަމަށް އިންތިހާބުކޮށްފައިވަނީ އިދާރީގޮތުން ކައުންސިލް ހިނގަމުންދަނީ ރަނގަޅަށް ނޫންކަމަށް ބުނެ، އެ ކައުންސިލްގެ ކުރީގެ ރައީސް އަހުމަދު ސަމީރު އިސްތިއުފާ ދެއްވުމާއި ގުޅިގެން މިމަހުގެ 13 ވަނަ ދުވަހުގެ ރޭ ބޭއްވި ކައުންސިލު ބައްދަލުވުމުގެ އިއްތިފާގުންނެވެ. އަދި މިހާރު އެ ކައުންސިލުގެ ނައިބު ރައީސަކީ އެރަށު ކައުންސިލުގެ ކުރީގެ ރައީސް އަހުމަދު ސަމީރެވެ.
އަހުމަދު ސަމީރަކީ ޕީޕީއެމްގެ ޓިކެޓްގައި ކަމަދޫ ކައުންސިލަށް އިންތިހާބުވި ފަރާތަކަށްވާއިރު މީ ސަމީރު ކައުންސިލަށް އިންތިހާބުވި ތިންވަނަ ފަހަރެވެ.
ކަމަދޫ ކައުންސިލަކީ ކުރިންވެސް އެމްޑީޕީގެ މެޖޯރިޓީ އޮންނަ ކައުންސިލަކަށްވާއިރު ކައުންސިލުގައި ތިއްބަވަނީ ތިން މެމްބަރުންނެވެ. އެއީ ރައިސާއި، ނައިބު ރައީސްގެ އިތުރުން މެންބަރު އަބްދުﷲ ރަޝީދެވެ.
ރާއްޖެޓީވީއާއި ވާހަކަ ދައްކަވަމުން ކަމަދޫ ކައުންސިލްގެ ރައީސްކަމަށް އިންތިހާބުވި ސާޖިދު ވިދާޅުވީ ކުރީގެ ރައީސް އަބްދުﷲ ޔާމީނުގެ ސަރުކާރުން އެރަށުގައި ފަށާ އަދި ނުނިންމާ ހުރި ޕްރޮޖެކްޓްތައް ނިންމުމަށް އިސްކަން ދޭނެ ކަމަށެވެ. އެގޮތުން ބޭނުން ނުކުރެވިވާ ފުޑްސަލް ދަނޑު އަލުން މަރާމާތު ކުރުމާއި، ރައްޔިތުންނަށް ބޯހިޔާވަހިކަން ހޯދައި ދިނުމަށް މަސައްކަތްކުރައްވާނެކަމަށް ސާޖިދު ވިދާޅުވި އެވެ.
