ސިޔާސީ މުވައްޒަފުންނަށް ވެސް ވިހެއުމާ އެކު ހަ މަހުގެ ޗުއްޓީ ދޭން ނިންމައިފި
15 ޖޫން 2019 | ހޮނިހިރު 09:49ވިހެއުމާ ގުޅިގެން ދޭ ޢިނާޔަތްތައް ދެވޭނީ ބަލިވެއިނދެ 27 ހަފުތާގެ ފަހުން ވިހައިފި ނަމަ
ރައީސް އިބްރާހިމް މުހައްމަދު ސޯލިހު ވަޒީރުންނާ އެކު
ސިޔާސީ މުވައްޒަފުންގެ ގޮތުގައި އައްޔަންކުރާ މުވައްޒަފުންނަށް ވިހެއުމާ ގުޅިގެން ހަ މަސްދުވަހުގެ ޗުއްޓީ ދިނުމަށް ނިންމައިފިއެވެ.
ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ ޢައްޔަންކުރައްވާ މުވައްޒަފުން ޢަމަލުކުރަންޖެހޭ އުސޫލަށް ބަދަލު ގެނައީ މިދިޔަ ބުރާސްފަތި ދުވަހުއެވެ.
އިސްލާހުކޮށް އާންމުކުރި އުސޫލުގައި ބުނެފައި ވަނީ ވިހެއުމާ ގުޅިގެން ޢިނާޔަތްތައް ދެވޭނީ ބަލިވެއިނދެ 27 ހަފުތާގެ ފަހުން ވިހައިފި ނަމައެވެ. އަދި މުވައްޒަފަކު ވިހާނެ ކަމަށް ލަފާކުރާ ދުވަސް ބަޔާންކޮށް މެޑިކަލް ސެޓްފިކެޓް ހުށަހެޅުމުން އެ މުވައްޒަފަކަށް، އެ ސެޓްފިކެޓްގައި ބުނާ ތާރީޚުން ފެށިގެން 6 މަސް ދުވަހުގެ ޗުއްޓީއެއް، ބަންދު ދުވަސްތައް ހިމަނައިގެން ހަމަ މުސާރައާ އެކު ދެވޭނެ ކަމަށް އުސޫލުގައި ވެއެވެ.
އުސޫލުގައި ބުނެފައި ވަނީ މުވައްޒަފަކު ބަލިވެއިނދެ 27 ހަފުތާގެ ފަހުން ވިހޭއިރު، ދަރިފުޅުގެ ފުރާނަ ނެތް ހާލަތެއް ދިމާވިޔަސް، ވަޒީފާއާ ބެހޭ ޤާނޫނުގެ 43 ވަނަ މާއްދާގައިވާ ގޮތުގެ މަތީން ބަލިވެއިނުމާއި ނުވަތަ ވިހެއުމާ ގުޅިގެންދޭ 60 ދުވަހުގެ ޗުއްޓީއެއް މުވައްޒަފު ވިހާ ދުވަހުން ފެށިގެން ބަންދު ދުވަސްތައް ނުހިމަނައި، މުސާރައާ އެކު ދެވޭނެ ކަމަށެވެ.
މީގެ އިތުރުން މުވައްޒަފު ވިހެއުމުގެ ދުވަސް ކައިރިވުމުގެ ސަބަބުން، ނުވަތަ ބައްޔެއް ވުމުގެ ސަބަބުން އޮފީހަށް ނުކުންނަން ޢުޒުރުވެރި ވާ ނަމަ، ވިހާނެ ކަމަށް ލަފާކުރާ ދުވަހުގެ ކުރިން ހިނގާ ގޮތަށް ވިހެއުމާ ގުޅިގެންދޭ ޗުއްޓީގެ 6 މަސް ދުވަހުން ނުކެނޑޭ ގޮތަށް، ބަންދު ދުވަސްތައް ހިމަނައިގެން ގިނަ ވެގެން 30 ދުވަހުގެ ޗުއްޓީއެއް މުސާރަ ލިބޭ ގޮތަށް މުވައްޒަފަށް ދެވޭނެ ކަމަށް އޫސުލުގައި ވެއެވެ.
ފިރިހެން މުވައްޒަފުންނަށް ދަރިއަކު ލިބޭ ދުވަހުން ފެށިގެން މުސާރަ ލިބޭ ގޮތަށް 30 ދުވަސް ޗުއްޓީ ދިނުމަށް ނިންމާފައިވާއިރު، އެ ޗުއްޓީ ހަމަވުމަށް ފަހު ކުއްޖާއަށް 7 މަސް ވުމާ ދޭތެރޭގައިވާ މުއްދަތުގައި ބަންދު ދުވަސްތައް ހިމަނައިގެން އިތުރު 27 ދުވަހުގެ ޗުއްޓީއެއް ދެވިދާނެ ކަމަށް އުސޫލުގައި ވެއެވެ. މީގެ އިތުރުން ދަރިފުޅު ހިތާނު ކުރާ ނަމަ ބަންދު ދުވަސްތައް ހިމަނައިގެން ފިރިހެން މުވައްޒަކަށް ފަސް ދުވަހުގެ ޗުއްޓީއެއް ވެސް ދެވިދާނެ ކަމަށް އުސޫލުގައި ވެއެވެ.
ފަޚުރުވެރި އާއިލާއެއް ބިނާކުރުމަށް މަގުފަހިކޮށްދިނުމަކީ މި ސަރުކާރުގެ އެންމެ އިސް އެއް އަމާޒެވެ. އެ މަސައްކަތް ފަށަނީ، ތުއްތު ދަރިފުޅު މި ދުނިޔެއަށް ލާ ފުރަތަމަ ނޭވާއާއެކުގައި ކަމަށާއި، އެ ދަރިފުޅަށް ހޭހަންކުރުމުގެ ގޮތުން، ސިވިލް ސާވިސްގައި ވަޒީފާ އަދާކުރާ އަންހެން މުވައްޒަފުންނަށް ވިހެއުމާ ގުޅިގެން 6 މަސްދުވަހުގެ މެޓަރނިޓީ ލީވް މުސާރައާ އެކު ލިބޭ ގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖެއްސެވިއެވެ. މިއީ އެކަމަނިކުފާނުގެ ވައުދަކަށްވާއިރު، ސިވިލް ސަރވިސްގެ މުވައްޒަފުންގެ އިތުރުން މިނިވަން މުއައްސަސާތަކުންނާއި ސަރުކާރު ހިއްސާވާ ކުންފުނިތަކުން ވެސް ދަނީ އެގޮތަށް އަމަލު ކުރަމުންނެވެ.
