ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދަށް ކުރީގެ ރައީސަކަށްވެވަޑައިގެންނެވުމުން ލިބިވަޑައިގަންނަވާ ބައެއް އިނާޔަތްތައް އުނިކޮށްދެއްވުމަށް އެމަނިކުފާނު ފިނޭންސް މިނިސްޓްްރީއަށް ހުށަހަޅުއްވައިފި އެވެ.
ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށް ރައްކާތެރިކަމާއި އިނާޔަތް ދިނުމުގެ ގާނޫނުގައިވާ ގޮތުން، ކުރީގެ ރައީސަކަށް ދޭ މާލީ އިނާޔަތާއި، އެކޮމޮޑޭޝަން އެލަވަންސް އަދި އޮފީސް ހިންގުމުގެ ހަރަދުގެ ގޮތުގައި މަހަކު 172،000 ރުފިޔާ ލިބިވަޑައިގަންނަވައެވެ. އެއީ މާލީ އިނާޔަތުގެ ގޮތުގައި 75،000 ރުފިޔާ، އެކޮމޮޑޭޝަންގެ ގޮތުގައި 10،000 ރުފިޔާ އަދި އޮފީސް ހިންގުމަށް 87،000 ރުފިޔާއެވެ. އެ އިނާޔަތްތައް ދައުލަތުން ރައީސް ނަޝީދަށް ދެއްވަމުން ގެންދަވާފައިވެއެވެ.
އޭގެއިތުރުން ރައީސް ނަޝީދު 19 ވަނަ ރައްޔިތުންގެ މަޖިލީހަށް އިންތިޚާބުގެ ވަޑައިގަތުމުގެ އިތުރުން، މަޖިލީހުގެ ރައީސްއަށް ވެވަޑައިގަތުމުން އެމަނިކުފާނަށް މަޖިލީހުގެ ރައީސްގެ މުސާރައާއި އެލަވަންސްގެ ގޮތުގައި މަހަކު 73،125 ރުފިޔާ ލިބިވަޑައިގަންނަވައެވެ. އެހެންކަމުން ދައުލަތުން ރައީސް ނަޝީދަށް ކޮންމެ މަހަކު ދޭ މުސާރައާއި އެލަވަންސްތަކުގެ ޖުމްލަ 245،125 ރުފިޔާއަށް އަރާނެ އެވެ.
އެ އިނާޔަތްތަކުގެ ތެރެއިން އުނިކޮށްދެއްވުުމަށް ރައީސް ނަޝީދު އެދިވަޑައިގެންނެވީ މާލީ އިނާޔަތުގެ ގޮތުގައި ލިބިވަޑައިގަންނަވާ 75،000 ރުފިޔާއާއި، އެކޮމޮޑޭޝަންގެ ގޮތުގައި ލިބިވަޑައިގަންނަވާ 10،000 ރުފިޔާ އެވެ. އެއީ ޖުމްލަ 85000 ރުފިޔާ އެވެ. އެ އަދަދު އުނިކޮށްފިނަމަ ދެން އެމަނިކުފާނަށް ލިބިވަޑައިގަންނަވާނީ ޖުމްލަ 160،125 ރުފިޔާ އެވެ.
19 ވަނަ ރައްޔިތުންގެ މަޖިލީހުގެ މެމްބަރުންނަށް ލިބިވަޑައިގަންނަވާ ފުރަތަމަ މުސާރަ ލިބިވަޑައިގަންނަވާނީ މިމަހުގަ އެވެ. އެހެންކަމުން އެ އިނާޔްތައް އުނިކުރުމުން އެމަނިކުފާނަށް ލިބިވަޑައިގަންނަވަމުންގެންދަވާނީ ޖުމްލަ 160،125 ރުފިޔާ އެވެ.
ބައެއް މީޑިއާތަކަށް މައުލޫމާތުދެއްވަމުން ރައްޔިތުންގެ މަޖިލީހުގެ އަމިންއާންމު އާމިނަތު ނިއުޝާ ވިދާޅުވީ ރައީސް ނަޝީދު ލިޔުމުން އިނާޔަތް އުނިކޮށްދެއްވުމަށް ފިނޭންސް މިނިސްޓްރީއަށް ހުށަހަޅުއްވާފައިވާކަމަށާއި، އެހެންކަމުން އެމަނިކުފާނަށް މުސާރަ ލިބިވަޑައިގަންނަވާނީ އެ އިނާޔަތްތައް އުނިކުރެއްވުމަށްފަހުކަމަށް ދެކިވަޑައިގަންނަވާކަމަށެވެ.
ރައީސް މުހައްމަދު ނަޝީދަކީ، ރާއްޖޭގެ ރައްޔިތުންގެ ބޮޑު ލޯތްބަކާއި އިހްތިރާމެއް ލިބިވަޑައިގެންފައިވާ ބޭފުޅެކެވެ.
