ރެއާލް ދޫކޮށްލަން މާސެލޯ ބޭނުމެއް ނުވޭ

ރެއާލް މެޑްރިޑް ދޫކޮށްލަން އެ ކްލަބަށް ކުޅެމުން އަންނަ މާސެލޯ ބޭނުންނުވާ ކަމަށް ރިޕޯޓްތައް ބުނެފިއެވެ.

އީއެސްޕީއެންއިން ބުނީ، ކުރިޔަށް އޮތް ސީޒަނަށް އެހެން ކްލަބަކަށް ބަދަލުވުމުގެ ވިސްނުން މާސެލޯ ނުގެންގުޅޭ ކަމަށާއި، އޭނާ ބޭނުންވަނީ ރެއާލްގައި މަޑުކުރަން ކަމަށެވެ.

އީސްޕީއެންއިން މިހެން ބުނެފައިވަނީ ޔުވެންޓަސްއަށް މާސެލޯ ބަދަލުވާން އުޅޭ ކަމަށް ރިޕޯޓްތައް ބުނަމުން އައި ދަނޑިވަޅެއްގައެވެ. އަދި އޭނާ ބޭނުންވަނީ ކްރިސްޓިއާނޯ ރޮނާލްޑޯއާއެކު އެއް ކްލަބަކަށް ކުޅެންކަމަށްވެސް ރިޕޯޓްތައް ބުނެއެވެ.

ރެއާލްއާއެކު މާސެލޯ ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ. ނަމަވެސް އެއްބަސްވުން ހަމަވަންދެން އޭނާ ކްލަބުގައި މަޑުކުރާނެ ކަމަށް ނުބެލެވެއެވެ.

ރެއާލްއާ 2006 ވަނަ އަހަރު ގުޅުނު މާސެލޯ ވަނީ މިހާތަނަށް އެ ކްލަބަށް ކުޅުނު 486 މެޗުގައި 36 ލަނޑު ކާމިޔާބު ކޮށްފައެވެ. އޭނާ ވަނީ އެ ކްލަބާއެކު ލަލީގާ ހަތަރު ފަހަރު، ކޮޕާޑެލްރޭ ދެފަހަރު، ސްޕެނިޝް ސުޕާ ކަޕް ތިންފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕާ ކަޕް ތިންފަހަރު އަދި ފީފާ ކްލަބް ވޯލްޑް ކަޕް ހަތަރު ފަހަރު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކް ބްރޯންޒް މެޑަލް އަދި ރިހި މެޑަލްގެ އިތުރުން ފީފާ ކޮންފެޑެރޭޝަންސް ކަޕް ކާމިޔާބުކޮށްފައިވާ މާސެލޯ ވަނީ ގައުމީ ޓީމަށް 58 މެޗު ކުޅެ، ހަ ލަނޑު ކާމިޔާބު ކޮށްފައެވެ.