ޕީޕީއެމް ޕީޖީ ލީޑަރަކަށް ރެޑްވޭވް ސަލީމް
11 ޖޫން 2019 | އަންގާރަ 10:13ޕީޖީ ލީޑަރަކަށް ކުރިމަތިލެއްވީ ވެސް ސަލީމް އެކަނި
އޭދަފުށީ ދާއިރާ މެމްބަރު އަހްމަދު ސަލީމް (ރެޑްވޭވް ސަލީމް)
އިދިކޮޅު މައި ސިޔާސީ ޕާޓީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ޕާލިމަންޓަރީ ގްރޫޕްގެ ލީޑަރަކަށް، އޭދަފުށީ ދާއިރާ މެމްބަރު އަހްމަދު ސަލީމް (ރެޑްވޭވް ސަލީމް) ހޮވައިފި އެވެ.
ޕީޕީއެމްގެ ނައިބު ރައީސް، ނައިފަރު ދާއިރާގެ މެމްބަރު އަހްމަދު ޝިޔާމް ކުރެއްވި ޓްވީޓެއްގައި ވިދާޅުވީ ޕީޕީއެމްގެ ޕާލަމެންޓަރީ ގްރޫޕްގެ ލީޑަރަކަށް އޭދަފުށީ ދާއިރާގެ މެމްބަރު އަހުމަދު ސަލީމް އެޕާޓީގެ މަޖިލިސް މެމްބަރުންގެ އިއްތިފާގުން ހޮވާފައިވާ ކަމަށެވެ. އަދި ސަލީމަށް، ޝިޔާމް ވަނީ މަރުހަބާ ދަންނަވާފައެވެ.
ޝިޔާމް ރާއްޖެއެމްވީއަށް ވިދާޅުވީ އެ ޕާޓީގެ ޕީޖީ ލީޑަރަކަށް ކުރިމަތިލެއްވީ ވެސް ސަލީމް އެކަނި ކަމަށެވެ. ސަލީމް ޕީޖީ ލީޑަރަކަށް އައްޔަންވީ ހުރިހާ މެމްބަރުންގެ ވެސް ވޯޓާ އެކީގައި ކަމަށް ވިދާޅުވިއެވެ.
ޕީޕީއެމްއަށް އަދި ނައިބު ޕީޖީ ލީޑަރަކު އައްޔަން ކޮށްފައެއް ނުވެއެވެ.
ރައްޔިތުންގެ މަޖިލީހުގައި ޕީޕީއެމް ތަމްސީލު ކުރައްވަނީ ފަސް މެމްބަރުންނެވެ. އެއީ ސަލީމާއި ޝިޔާމްގެ އިތުރުން ގުރައިދޫ ދާއިރާ މެމްބަރު، އިބްރާޙިމް ރިޒާ އާއި މަހިބަދޫ ދާއިރާ މެމްބަރު އަހްމަދު ތޯރިގްގެ އިތުރުން ގުރައިދޫ ދާއިރާ މެމްބަރު، މުހައްމަދު ޣައްސާން މައުމޫން އެވެ.
މަޖިލީހުގައި ޕީޕީއެމްގެ ފަސް މެމްބަރުން ތިއްބަވާއިރު އެޕާޓީއާ އެކު ކޯލިޝަން ހަދާފައިވާ ޕީއެންސީގައި މަޖިލީސް ތަމްސީލު ކުރާ ތިން މެމްބަރުން ތިއްބަވާނެއެވެ.
