ރާއްޖޭގައި އަލަށް ބިނާކުރާ ސްކޫލުތަކު ކާމާލަންތަން ހިމެނޭނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ރާއްޖޭގެ ހުރިހާ ސްކޫލެއްގައި ނާސްތާ ޕްރޮގްރާމް ފަށުމަށް ތާޖުއްދީން ސްކޫލުގައި ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުން މިނިސްޓަރު އައިޝަތު ވިދާޅުވީ ނާސްތާ ނުވަތަ މެންދުރުގެ ކެއުން ދުނިޔޭގެ ބައެއް ގައުމުތަކުގެ ސްކޫލުތަކުގައި ދެމުން އަންނަތާ 100 އަހަރަށް ވުރެ ގިނަ ދުވަސްވެފައިވާ ކަމަށެވެ.
އެހެންކަމުން އެ ގައުމުތަކުގައި ސްކޫލުތައް ބިނާކޮށްފައި ހުންނަނީ ބޮޑެތި ކާމާލަންތަކާއި ބަދިގެތައް ހިމަނައިގެން ކަމަށް މިނިސްޓަރު ވިދާޅުވިއެވެ.
ރާއްޖެ ސްކޫލުތަކުގައި ނާސްތާ ދިނުމަކީ މި އަހަރު މުޅިން އަލަށް ފެށި މަޝްރޫއެއްކަން ފާހަގަކުރައްވައި މިނިސްޓަރު އައިޝަތު ވިދާޅުވީ ނާސްތާ އަދި ދެވޭނީ ކްލާސްރޫމްގައި ކަމަށެވެ. ނަމަވެސް އަލަށް ސްކޫލުތައް ބިނާކުރާއިރު ކާމާލަންތަކާއި ބަދިގެތައް ހިމަނާނެ ކަމަށް މިނިސްޓަރު ވިދާޅުވިއެވެ.
ހުރިހާ ސަރުކާރު ސްކޫލެއްގައި ނާސްތާ ދިނުން ފެށޭއިރު ކޮންމެ ވެސް ދަތިތަކެއް ކޮންމެ ވެސް ވަރަށް ކުރިމަތިވެދާނެ. މިކަމުގަ ޖެހޭ ރޫތައް ފިލުވައި އޮމާން ކުރެވޭނީ ދިމާވާ މައްސަލަތައް ހައްލުކުރުމުގެ ތަޖުރިބާ ލިބިގެން. ފުރަތަމަކޮޅުގަ ދިމާވާ ދަތިތަކަށް ދަރިވަރުން ކެތްތެރިކަން އިސްކުރަންވާނެ،"މިނިސްޓަރު އައިޝަތު
ރާއްޖޭގެ 213 ސްކޫލުގެ ތެރެއިން މި އަހަރުގެ ފުރަތަމަ ޓާރމްގައި ނާސްތާ ޕްރޮގްރާމް ފަށާފައި ވަނީ 25 ސްކޫލެއްގައެވެ. އޭރު ސަރުކާރުން 25 ސްކޫލެއްގައި ނާސްތާ ޕްރޮގްރާމްގައި ފަށާފައި ވަނީ އަޖުމަ ބެލުމުގެ ގޮތުން ޕައިލެޓް ޕްރޮގްރާމެއްގެ ގޮތުގައެވެ.
