ހުޅުމާލޭގައި ދުއްވަމުން ދިޔަ ކާރުގައި އިން ޑްރައިވަރަށް ނިދިގެން އަނެއްކާވެސް ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުން ބުނީ ހުޅުމާލެ ރީތިގަސްމަގުން ދުއްވާފައި ދިޔަ ކާރެއް ކޮންޓްރޯލް ނުވެގެން ގޮސް މަގުގެ ވާތް ފަރާތުގައި ހުރި ގަހެއްގައި ޖެހި އެކްސިޑެންޓެއް ވެފައިވާ ކަމުގެ ރިޕޯޓު ބުރާސްފަތި ދުވަހުގެ ހަވީރު4:41 ހާއިރު ލިބިފައިވާ ކަމަށެވެ.

ފުލުހުން ބުނީ މިއެކްސިޑެންޓް ހިގަން ދިމާވީ ޑްރައިވަރުއަށް ނިދިޖެހުމުން ކަމަށް މައުލޫމާތު ލިބޭ ކަމަށެވެ. އަދި މި އެކްސިޑެންޓްވީ ވަގުތު އިތުރު ވެހިކަލް އެސަރަހައްދުގައި ނެތް ކަމަށް މަންޒަރު ދުށްފަރާތްތަކުން ބުނާ ކަމަށް ފުލުހުން ބުންޏެވެ. އަދި ފުލުހުން ބުނީ ކާރުގައި އެވަގުތު ތިބި 3 މީހުން ކަމަށެވެ. އެއީ ޑްރައިވަރުގެ އިތުރުން ޗައިނާ އަންހެނަކާ ފިރިހެނެކެވެ.

މިތިން މީހުންނަށް ވެސް އަނިޔާވެފައިވާއިރު، ޑްރައިވަރުގެ މެޔަށް ތަދުވާ ކަމަށާއި، ޗައިނާ ދެމީހުންގެ އަތަށާއި ފަޔަށް ތަދުވާ ކަމަށް މައުލޫމާތު ލިބޭ ފުލުހުން ބުންނެވެ. ނަމަވެސް އެއްވެސް މީހަކަށް ސީރިއަސް އަނިޔާއެއް ނުލިބެއެވެ.

ފުލުހުން ބުނީ މިއެކްސިޑެންޓްގައި އެކާރުގެ ކުރީކޮޅު ވަރަށް ބޮޑަށް ހަލާކުވެ އިންޖީނު އެތެރެއަށް ވަދެފައިވާ ކަމަށެވެ.

ކާރު ދުއްވަން އިން މީހާއަކީ ލައިސެންސް އޮންނަ މީހެކެވެ.

މިފަހަކަށް އައިސް އެކްސިޑެންޓްތައް ހިނގުން އިތުރުވެފައިވާއިރު، މިދިޔަ ރޯދަ މަހު ހުޅުމާލޭގައި ބަސް ދުއްވަން އިން ޑްރައިވަރަކު ނިދި ޖެހިގެން ހިނގި އެކްސިޑެންޓެއްގައި ޓޫރިސްޓަކު ވަނީ މަރުވެފަ އެވެ.