ތައިލެންޑްގެ ބޮޑުވަޒީރުގެ މަގާމަށް އަސްކަރީ ސަރުކާރުގެ ވެރިޔާގެ ނަން ފާސްކޮށްފި

ތައިލެންޑްގެ ބޮޑުވަޒީރު ކަމަށް އަސްކަރީ ސަރުކާރުގެ ވެރިޔަކަށް ހުންނެވި ޕްރަޔުތް ޗަން-އޯޗާ އައްޔަނުކުރުން އެ ގައުމުގެ ގާނޫނު ހަދާ މަޖިލީހުން ފާސްކޮށްފިއެވެ.

އަސްކަރީ ބަޢާވާތަކަށް ފަހު ވެރިކަމަށް އައި ކުރީގެ އަސްކަރިއްޔާގެ ވެރިޔާ ޗަން-އޯޗާ ވަނީ ފަސޭހަކަމާއެކު، ބޮޑުވަޒީރު ކަމަށް އަންނަން ބޭނުންވާ 375 ވޯޓު ހޯދާފައެވެ. އެގޮތުން އޭނާއަށް 500 ވޯޓު ލިބިފައިވާއިރު، އޭނާއާ ވާދަކުރި ތަނަތޯން ޖުއަންގރޫންރުއަންކިޓް އަށް ލިބުނީ 244 ވޯޓެވެ.

ބޮޑުވަޒީރުކަމުގެ ވޯޓު ކާމިޔާބުކުރެއްވުމާއި ގުޅިގެން އެ ގައުމުގެ އިދިކޮޅު ޕާޓީތަކުން ބުނީ ވޯޓު ކާމިޔާބު ކުރަން އަސްކަރިއްޔާއިން މެމްބަރުންނަށް ނުފޫޒު ފޯރުވާފައިވާ ކަމަށެވެ. އޭގެ އިތުރުން އެ ގައުމުގެ ސެނެޓުގައި ތިއްބަވާ 250 މެމްބަރުން ވެސް ވޯޓުގައި ބައިވެރިވެވަޑައިގެންނެވި އިރު، އެ އެންމެންނަކީ އަސްކަރިއްޔާއިން އެ މަގާމަށް އައްޔަނުކޮށްފައި ތިބި މީހުންނެވެ. އަދި އެ ގައުމުގެ އިލެކްޝަންސް ކޮމިޝަނުން ވަނީ އިންތިހާބަށް ފަހު ގޮނޑި ބެހުމުގެ އުސޫލުތަކަށް ވެސް ބަދަލު ގެނެސްފައެވެ.

ވޯޓަށް ފަހު ނޫސްވެރިންނާ ވާހަކަފުޅު ދައްކަވަމުން ތަނަތޯން ވިދާޅުވީ ތައިލެންޑުގެ ރައްޔިތުން އަދިވެސް އެދަނީ އިންސާފާއި މިނިވަންކަމަށް ގޮވާލަމުން ކަމަށެވެ. އަދި އުއްމީދު ގެއްލުވާލަން ނުޖެހޭ ކަމަށް ވިދާޅުވެ އޭނާ ވަނީ "ޑިމޮކްރެސީގެ ހައްގުގައި" ވޯޓު ދެއްވި 244 މެމްބަރުންނަށް ޝުކުރު އަދާކުރައްވާފައެވެ.

މި ފަހަރުގެ އިންތިހާބުގައި އެންމެ ގިނަ ގޮނޑި ކާމިޔާބު ކުރީ ޕިއު ތައި ޕާޓީންނެވެ. ޕްރަޔުތްގެ ޕަލާންގް ޕްރަޗްރަތް ޕާޓީއަށް ދެވަނައަށް އެންމެ ގިނަ ގޮނޑި ކާމިޔާބު ކުރެވުނު އިރު، ބޮޑުވަޒީރު ކަމަށް ވާދަކުރެއްވި ތަނަތޯން ނިސްބަތްވެވަޑައިގަންނަވާ ފިއުޗަރ ފޯވާޑް ޕާޓީ އައީ ތިންވަނައަށެވެ. ތަނަތޯންގެ ނަން ބޮޑުވަޒީރުގެ މަގާމަށް ފޮނުވަން ނިންމީ އިންތިހާބަށް ފަހު ޕިއު ތައި ޕާޓީ އަދި ފިއުޗަރ ފޯވާޑް ޕާޓީން ހެދި ކޯލިޝަނަކަށް ފަހުގައެވެ.

ޕްރަޔުތް ބޮޑުވަޒީރުގެ މަގާމަށް އަައްޔަނު ކުރާނީ އެ ގައުމުގެ ރަސްގެފާނު މަހާ ވަޖިރަލޮންކޯން ރުހިވަޑައިގަތުމުންނެވެ.