އައްޑޫ ސިޓީ ސްކެއަރ ޖުލައި މަހު ހުޅުވަނީ
6 ޖޫން 2019 | ބުރާސްފަތި 09:31އެންމެ ފުރަތަމަ ކުރެވޭ މަސައްކަތަކީ ސިޓީ ސްކުއެރ ގެ ބޮޑު ދިދަ އަލުން ނެގުމުގެ މަސައްކަތް
އައްޑޫ ސިޓީގެ 5.3 ބިލިޔަން ރުފިޔާގެ ބިޔަ ބޮޑު މަޝްރޫއެއް ރައީސް ސޯލިހު ވަނީ އިއުލާންކުރައްވާފައި
އައްޑޫ ސިޓީ ސްކެއަރ އަންނަ ޖުލައި މަހުގެ ތެރޭގައި ހުޅުވޭތޯ މަސައްކަތް ކުރައްވަމުން އަންނަ ކަމަށް އެ ސިޓީގެ މޭޔާރ އަބްދުﷲ ސޯދިގު (ސޯބެ) ވިދާޅުވެއްޖެއެވެ.
އައްޑޫ ސިޓީ ހިތަދޫ ޕޮލިސް ސްޓޭޝަނާ ޖެހިގެން އައްޑޫ ސްޓޭޓް ހައުސް ކުރިމަތިން އޮތް ބިމުގައި ސިޓީ ސްކުއަރ ފުރަތަމަ ހަދާފައި ވަނީ 2011 ވަނަ އަހަރު ސާކު ސަމިޓާ ގުޅުވައިގެން ރައީސް މުހައްމަދު ނަޝީދުގެ ސަރުކާރުންނެވެ. ސިޓީ ސްކެއަރ ހެދުމަށް ފަހު އެ އަހަރުގެ ޖުމްހޫރީ ދުވަހުގެ ދިދަ ނެގުމުގެ ރަސްމިއްޔާތު އެތާ ބާއްވާފައިވެއެވެ. ނަމަވެސް ނިމިދިޔަ ރައީސް ޔާމީންގެ ސަރުކާރުން އެތަނާ މެދު އަޅާނުލާ އެތަން ވަނީ ވީރާނާވާން ދޫކޮށްލާފައެވެ.
ސިޓީ ސްކެއަރ ވިރާނާ ވުމާ ގުޅިގެން އާ ސަރުކާރުން ވެރިކަމާއި ހަވާލުވެވަޑައިގަތުމަށް ފަހު، 4 އެޕްރީލްގައި ސިޓީ ކައުންސިލުން ވަނީ ސިޓީ ސްކެއަރ ތަރައްޤީކޮށް އެސަރަހައްދު ޒީނަތްތެރިކުރުމުގެ މަސައްކަތް ރަސްމީކޮށް ފަށާފައެވެ.
ސޯބެ ރާއްޖެ އެމްވީ އަށް ވިދާޅުވީ ސިޓީ ސްކެއަރ އަންނަ ޖުލައި މަހު ހުޅުވޭތޯ މަސައްކަތް ކުރަމުން އަންނަ އިރު، ޚާއްސަ ރަސްމިއްޔާތަކާ އެކު ކޯއްޓޭއަށް ދިދަ ނެގޭނެ ކަމަށާއި، ދިވެހި ޤައުމީ ދިދަ އައްޑޫގެ ޖައްވުން ވިހުރެވޭ އުފާވެރި މަންޒަރު އަލުން ފެނިގެންދާނެ ކަމަށެވެ.
މީގެ އިތުރުން ރަސްމީ އެކި ހަފްލާތައް ވެސް ސިޓީ ސްކެއަރގައި ބޭއްވޭނެ ކަމަށާއި، ކުދިންނަށް ޚާއްސަ ކުރެވިގެން ހަދާ ޕާކެއް ވެސް އެތަނުގައި ތަރައްގީކުރާނެ ކަމަށެވެ. ކައުންސިލުން ބުނީ އެތަން ތަރައްޤީކޮށް ނިމޭއިރު އެތަން ވެގެންދާނީ ކުދި ބޮޑު އެންމެންނަށް ހިތްފަސޭހެކަމާ އެކު އާއިލާއާ އެކު ވަގުތުކޮޅެއް ހޭދަކޮށްލެވޭ ފަދަ ހިތްގައިމު މާހައުލަކަށް ކަމަށާއި، ކޮންމެ އުމުރެއްގެ މީހަކަށް ވެސް ހިތްހަމަޖައްސާލެވޭ ފަދަ އާންމު މައިދާނަކަށް ކަމަށެވެ.
ސިޓީ ސްކުއަރ ތަރައްޤީކުރުމުގެ މަސައްކަތް ފައްޓަވައިދެއްވުމުގެ ހަފުލާގައި ވާހަކަފުޅު ދައްކަވަމުން މޭޔަރ ވިދާޅުވީ ސިޓީ ސްކުއަރ ތަރައްޤީ ކުރުމުގެ މި މަޝްރޫޢުއަކީ ސަރުކާރުން އައްޑޫގެ ތަރައްޤީ ކުރަން ހުރި ކަންކަމުގެ ފެށުން ކަމަށާއި ކުރިއަށް ހުރި ދުވަސްތަކުގައި އެހެނިހެން ގިނަ މަޝްރޫޢުތަކެއް ފެށިގެން ދާނެ ކަމަށެވެ.
