ކްރިމިނަލް ކޯޓުން ދޫކޮށްލި ދެ މީހުން އަނެއްކާ ވެސް ހައްޔަރުކޮށްފި
ހައްޔަރުކުރީ 25 އަހަރުގެ ދިވެހި ފިރިހެނަކާއި، 52 އަހަރު ދިވެހި އަންހެނެއް
ފުލުހުން އަތުލައިގަތް މަސްތުވާތަކެތި - ޕޮލިސް
ހުޅުމާލެ އިން ތިން ކިލޯގެ މަސްތުވާތަކެއްޗާ އެކު ފުލުހުންގެ ބެލުމުގެ ދަށަށް ގެނައި ދެ މީހުން ކޯޓުން ދޫކޮށްލާފައި ވަނިކޮށް، އެހެން ކޯޓު އަމުރެއްގެ ދަށުން, އެ ދެ މީހުން އަނެއްކާ ވެސް ހައްޔަރުކޮށްފައިވާ ކަމަށް ފުލުހުންގެ އިދާރާ އިން ބުނެފިއެވެ.
ފުލުހުން ބުނީ ކޯޓު އަމުރެއްގެ ދަށުން، އަނެއްކާ ވެސް އެ ދެ މީހުން ހައްޔަރުކޮށްފައި ވަނީ ހުޅުމާލޭގައި އެ މީހުން ދިރިއުޅޭ ގެއިން ރޭ ދަންވަރު 3:15 ހާއިރު ކަމަށެވެ.
ފުލުހުން އެންމެ ފުރަތަމަ މި ދެ މީހުން ހައްޔަރުކޮށްފައި ވަނީ ހޯމަ ދުވަހުގެރޭ 03:10 ހާއިރު ހިންގި އޮޕަރޭޝަނެއްގައި ކޯޓު އަމުރެއްގެ ދަށުންނެވެ. ހުޅުމާލޭގެ ގެއެއް ބަލާ ފާސްކުރުމަށް ހޯދި ކޯޓުގެ އަމުރުގެ ދަށުން ތިން ކިލޯގެ މަސްތުވާތަކެއްޗާ އެކު އެ ދެ މީހުން ހޯމަ ދުވަހުގެ ރޭ ފުލުހުން ވަނީ ހައްޔަރުކޮށްފައެވެ. އެ މައްސަލާގައި ހައްޔަރުކޮށްފައި ވަނީ 25 އަހަރުގެ ދިވެހި ފިރިހެނަކާއި، 52 އަހަރު ދިވެހި އަންހެނެއް ކަމަށް ފުލުހުން ވަނީ ބުނެފައެވެ.
ފުލުހުން ބުނެފައި ވަނީ އެ އޮޕަރޭޝަންގައި ބަލާފާސްކޮށް، ދެ މީހުން ވެސް ހައްޔަރުކުރީ ހުޅުމާލެ ކޯޓުގެ އަމުރުގެ ދަށުން ކަމަށެވެ. އެ އަށް ފަހު މައްސަލާގައި ހައްޔަރުކުރި ދެ މީހުންގެ ބަންދުގެ މުއްދަތުޖެހުމަށް ދެ މީހުން ކްރިމިނަލް ކޯޓަށް ހާޒިރުކުރުމުން ބަންދުގެ މުއްދަތު ނުދީ، ކޯޓުން ދެ މީހުން ވެސް ދޫކޮށްލާފައިވާ ކަމަށް ފުލުހުން ވަނީ ބުނެފައެވެ.
ރާއްޖެއެމްވީއަށް މައުލޫމާތު ދެއްވަމުން ޑީޖޭއޭގެ މީޑިއާ އޮފިޝަލް ފައިސަލް އާދަމް އޭރު ވިދާޅުވެފައި ވަނީ ހުޅުމާލޭ ކޯޓުން ފުލުހުންނަށް ދީފައިވާ ކޯޓު އަމުރުގައި ޖިނާއީ އިޖުރާއަތުގެ ޤާނޫނު 32 ވަނަ މާއްދާގެ (ހ) ގެ 12 ވަނަ ނަމްބަރާއި، 41 ވަނަ މާއްދާގެ (ށ) ގެ 6 ނަމްބަރުގައިވާ ކަންތައްތައް ކޯޓު އަމުރުގައި ފުރިހަމަވެފައިނުވާ ކަމަށެވެ.
ޖިނާއީ އިޖުރާއަތުގެ ޤާނޫނު 32 ވަނަ މާއްދާގެ (ހ) ގެ 12 ވަނަ ނަމްބަރުގައި ބުނެފައިވަނީ ބަލައި ފާސްކުރުމުގެ ކޯޓު އަމުރުގައި ހުއްދަދޭ ފަނޑިޔާރުގެ ނަމާއި ސޮއި އަދި ކޯޓުގެ ތައްގަނޑު ހުންނަންޖެހޭނެ ކަމަށެވެ. އަދި އެ ޤާނޫނުގެ 41 ވަނަ މާއްދާގެ (ށ) ގެ 6 ނަމްބަރުގައި ބުނެފައިވަނީ މީހަކު ހައްޔަރުކުރުމަށް ނެރޭ ކޯޓު އަމުރުގައި ހުއްދަދޭ ފަނޑިޔާރުގެ ނަމާއި ސޮއި އަދި ކޯޓުގެ ތައްގަނޑު ހިމަނަންޖެހޭނެ ކަމަށެވެ.
ކްރިމިނަލް ކޯޓުން ބުނީ އެ ދެ މީހުން ހައްޔަރުކުރުމާއި ބަލައި ފާސްކުރުމަށް ހުޅުމާލޭ ކޯޓުން ފުލުހުންނަށް ދިން އަމުރުގައި އެކަންކަން ފުރިހަމަ ނުވާ ކަމަށެވެ.
