ނައިޖީރީއާގެ ކުރީގެ ރައީސެއްގެ އެކައުންޓުގައި 265 މިލިއަން ޑޮލަރު!
5 ޖޫން 2019 | ބުދަ 06:42ފައިސާތަކަކީ ކޮރަޕްޝަނުގެ އަމަލެއްގެ ދަށުން ޖަމާކޮށްފައިހުރި ފައިސާތަކެއް
ސާނީ އަބާޗާ 1993 ވަނަ އަހަރުން ފެށިގެން ގޮސް 1998 ވަނަ އަހަރާ ހަމައަށް ނައިޖީރިޔާގައި ވެރިކަން ކުރެއްވި | ބީބީސީ
ނައިޖީރިއާގެ ކުރީގެ ރައީސެއްގެ އެކައުންޓްގައި ހުރި 265 މިލިއަން ޑޮލަރ އަތުލައިގެންފިއެވެ.
މި ފައިސާތައް ހުރީ އިނގްލިޝް ޗެނެލްގެ ޖަޒީރާއެއް ކަމަށްވާ ޖަރސީ އައިލެންޑްސްގެ ބޭންކެއްގައި ނައިޖީރިއާގެ ކުރީގެ ރައީސެއް ކަމަށްވާ ސާނީ އަބާޗާގެ ނަމުގައި ހުޅުވާފައިވާ އެކައުންޓްގައި އެކައުންޓެއްގައެވެ.
ޖަރސީގެ ސިވިލް އެސެޓް ރިކޮވަރީ ފަންޑުން ބުނާ ގޮތުގައި އެ ފައިސާތަކަކީ 1990 ވަނަ އަހަރު ނައިޖީރިއާގެ ވެރިކަން ކުރި ސާނީ އަބާޗާ، ކޮރަޕްޝަނުގެ އަމަލެއްގެ ދަށުން އެ ބެންކަށް ޖަމާކޮށްފައި ހުރި ފައިސާތަކެކެވެ.
2014 ވަނަ އަހަރު ފްރީޒް ކޮށްފައިވާ އެ އެކައުންޓުގައި އެ ފައިސާތައް ހުރީ ޑޯރާވިލް ކިޔާ ކުންފުންޏެއްގެ ބެލުމުގެ ދަށުގައެވެ.
ފަސް އަހަރަށް ދިގު ދެމިގެން ދިޔަ ޝަރުއީ މަރުހަލާއަށް ފަހު ކޯޓުން ނިންމާފައި ވަނީ އެމެރިކާ އާއި ނައިޖީރިއާ އަދި ޖަރސީއާ ދެމެދު އެ ފައިސާތައް ބަހާލުމަށެވެ. މި ތިން ގައުމުގެ މެދުގައި އެ ފައިސާތައް ބަހާނެ ގޮތުގެ ތަފްސީލް ހާމަކޮށްފައެއް ނުވެއެވެ. އެކަމާ ގުޅޭ ގޮތުން ޖާރސީގެ ޕްރޮސިކިއުޓަރުން ބުނީ އޭގެ ތަފްސީލް ހާމަކުރެވެން ނެތީ މިހާރު ކުރިޔަށްދާ މަޝްވަރާތަކަށް ބުރޫއަރަން ބޭނުން ނުވާތީ ކަމަށެވެ.
ކޯޓުގެ ނިންމުމަށް މަރުހަބާ ކިޔަމުން ޖަރސީގެ އެޓަރނީ ޖެނެރަލް މެކްރޭ ވިދާޅުވީ މިކަމުން ދޭހަކޮށްދެނީ މަނީ ލޯންޑްރިން އާއި މާލީ ކުށްތަކާ ދެކޮޅަށް އެ ގައުމުން މަސައްކަތް ކުރާ މިންވަރު ކަމަށެވެ.
ޖާރސީގެ ސަރުކާރުން ބުނެފައި ވަނީ 2007 ވަނަ އަހަރުން ފެށިގެން އެ ފައިސާތަކާ ގުޅޭ މައްސަލަތަކުގައި އެމެރިކާއާ އެކު މަޝްވަރާކުރަމުން އަންނަ ކަމަށެވެ. އެމެރިކާއިން ވެސް ވަނީ އެ ގައުމުގެ ބޭންކުތަކުގައި ހުރި އަބާޗާ އާއި އޭނާގެ ވާގިވެރިންގެ ފައިސާއަކީ ލޯންޑަރކޮށްފައި ހުރި ފައިސާ ކަމަށް ނިންމާ، ނައިޖީރިޔާއާ ހަވާލުކޮށްފައެވެ.
ނައިޖީރިއާގައި 1993 ވަނަ އަހަރުން ފެށިގެން 1998 ވަނަ އަހަރާ ހަމައަށް ވެރިކަން ކުރެއްވި އަބާޗާގެ ހުދު މުހުތާރު ވެރިކަމުގައި ބިލިއަނުން ޑޮލަރު ވަގަށް ނަގާފައިވާ ކަމުގެ ތުހުމަތުތަށް ކުރެވިފައި ވެއެވެ. އެގޮތުން މިދިޔަ އަހަރުގެ ތެރޭގައި ސްވިޒަލޭންޑުގެ ސަރުކާރުން ވަނީ އެ ގައުމުގެ ބޭންކްތަކުގައި ހުރި 300 މިލިއަން ޑޮލަރު ނައިޖީރިޔާގެ ސަރުކާރާ ހަވާލުކޮށްފައެވެ. ނައިޖީރިޔާގެ ސަރުކާރުން ބުނެފައިވަނީ އެ ފައިސާ ކުރިޔަށް އޮތް ހަ އަހަރުގެ ތެރޭގައި އެ ގައުމުގެ ތިން ލައްކަ ގޭބިސީއަކަށް ރައްދުކުރާނެ ކަމަށެވެ.
