ސެވިއްޔާގެ ކޯޗަކަށް ރެއާލް މެޑްރިޑްގެ ކުރީގެ ކޯޗު ޖޫލެން ލޮޕެޓެގީ ހަމަޖައްސައިފިއެވެ.

ލޮޕެޓެގީ ސެވިއްޔާގެ ކޯޗުކަމާ ހަވާލުވިކަން އެ ކްލަބުންވެސް ވަނީ ކަށަވަރުކޮށްދީފައެވެ. އަދި އޭނާ އެ ކްލަބަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުން ކަމަށް ސެވިއްޔާއިން ބުނެއެވެ.

އުމުރުން 52 އަހަރުގެ ލޮޕެޓީގުގެ ކޯޗިން ކެރިއަރު ފެށުނީ 2003 ވަނަ އަހަރު ސްޕެއިން 17 އަހަރުން ދަށުގެ ޓީމުގެ އެސިސްޓެންޓެއްގެ ގޮތުގަ އެވެ. ފަހުން ސްޕެއިންގެ ކްލަބް ރަޔޯ ވަޔޮކާނޯ އަށް ކޯޗުކޮށްދިނުމަށް ފަހު ރެއާލުގެ ޔޫތު ޓީމުގައި ވެސް މަސައްކަތްކުރި އެވެ.

އޭގެ ފަހުން އޭނާ ވަނީ ސްޕެއިނުގެ ތިން އުމުރު ފުރައެއްގެ ގައުމީ ޓީމުތަކުގައި މަސައްކަތްކޮށްފަ އެވެ. ސްޕެއިން ސީނިއާ ގައުމީ 2016 ވަނަ އަހަރު ހަވާލުވުމުގެ ކުރިން ލޮޕެޓީގް ވަނީ ދެ ސީޒަނުގައި ޕޯޗުގަލްގެ ޕޯޓޯ އަށް ވެސް ކޯޗުކޮށްދީފަ އެވެ.

ސްޕެއިން ގައުމީ ޓީމަށް ލޮޕެޓެގީ އިރުޝާދު ދިން 20 މެޗުގެ ތެރެއިން 13 މެޗުން އެޓީމު މޮޅުވެފައިވާއިރު، ހަ މެޗުން ވަނީ އެއްވަރުވެފައެވެ. ނަމަވެސް އެއްވެސް މެޗަކުން އެޓީމު ބަލިނުވެއެވެ.

ރެއާލްގެ ކޯޗުކަމުގައި ތިން މަހެއްހާ ދުވަހު މަސައްކަތްކުރި ލޮޕެޓެގީގެ އިރުޝާދުގެ ދަށުން އެ ކްލަބު ކުޅުނު 14 މެޗުގެ ތެރެއިން ހަ މެޗުން ވަނީ ބަލިވެފައެވެ. ބާކީ ހަ މެޗުން މޮޅުވިއިރު، ދެ މެޗުން ވަނީ ބަލިވެފައެވެ. އޭނާ ރެއާލްގެ ކޯޗުކަމުން ވަކިކުރީ ހޯދަމުންދިޔަ ދަށް ނަތީޖާގެ ސަބަބުންނެވެ.

ލޮޕެޓެގީގެ އިރުޝާދުގެ ދަށުން ސްޕެއިންގެ 19 އަހަރުން ދަށުގެ ޓީމު އަދި 21 އަހަރުން ދަށުގެ ޓީމުން ވަނީ ޔޫރޯ ކާމިޔާބުކޮށްފައެވެ.