މުހައްމަދު ޝަރަފްގެ ބަދަލުގައި ވޮލީބޯލް އެސޯސިއޭޝަން (ވީއޭއެމް) ގެ ޖެރެނަލް ސެކެޓްރީގެ މަގާމަށް އަހުމަދު އަދީލް (ބޭބެ) ހަމަޖައްސައިފި އެވެ.
ވީއޭއެމްގެ ޖެނެރަލް ސެކެޓްރީ ކަމަށް ބޭބެ ހަމަޖައްސާފައިވަނީ އެ މަގާމުގައި ހުރި ޝަރަފް މަގާމުން އިސްތިއުފާ ދެއްވުމުންނެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ޝަރަފް މަގާމުން އިސްތިއުފާ ދެއްވީ ވީއޭއެމްގެ ރައީސް މުހައްމަދު ލަތީފް އަށް ވޮލީ ހިންގަން ނޭނގޭ ކަމަށް ބުނެ ވަރަށް ބޮޑަށް ފާޑު ކިޔުމަށްފަހު އެވެ.
ވީއޭއެމްގެ ރައީސް ކަމާ ލަތީބެ ހަވާލުވިފަހުން އެ އެސޯސިއޭޝަންގެ ޖެނެރަލް ސެކެޓްރީގެ މަގާމަށް މިހާތަނަށް ތިން ޖެނެރަލް ސެކެޓްރީއެއް ވަނީ ގެނެސްފައެވެ. އެންމެ ފުރަތަމަ ޖެނެރަލް ސެކެޓްރީއަކަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހިދުމަތް ކުރި މުހައްމަދު އާދަމް ގެނެސްފައިވާއިރު، އޭނާވެސް ވަނީ މަގާމުން އިސްތިއުފާ ދެއްވާފައެވެ. ދެވަނަ އަށް ޝަރަފް ހަމަޖެއްސިއިރު، މިހާރު ހަމަޖެއްސީ ބޭބެއެވެ.
ޖެނެރަލް ސެކެޓްރީއަކަށް ބޭބެ ހަމަޖައްސާފައިވާއިރު، އޭނާ އަކީ އަންހެން ވޮލީ ޓީމުގެ ހެޑް ކޯޗެވެ. ބޭބެ ވަނީ ވޮލީ ކޯޗެއް އަދި ކުޅުންތެރިޔެއްގެ ގޮތުގައި ވެސް މަޝްހޫރުކަން ހޯދާފައެވެ.
