ރަސްގެތީމަށް ކަރަންޓް ދިނުމަށް ބޭނުންކުރާ ދެ އިންޖީނު ވެސް އޯވަރހޯލް ކުރަންޖެހިފައި

ރ. ރަސްގެތީމަށް ކަރަންޓް ދިނުމަށް ބޭނުންކުރާ ދެ އިންޖީނު ވެސް ގިނަ ދުވަސްވެ އޯވަރހޯލް ކުރަން ޖެހިފައިވާ ކަމަށް އެރަށު ކައުންސިލުން ބުނެފިއެވެ.

ރަސްގެތީމުގައި ހޯމަ ދުވަހު ފަތިހު 5:30 އިން ފެށިގެން މެންދުރު 02:30 އަށް ކަރަންޓް ގޮސްފައިވާއިރު، އެކަމާ ގުޅިގެން "ރާއްޖެއެމްވީ"އަށް މައުލޫމާތު ދެއްވަމުން އެރަށު ކައުންސިލުގެ މެމްބަރު އަލީ ހަމީދު ވިދާޅުވީ، އެރަށުގެ އިންޖީނުގޭގައި ބޭނުންކުރާ ދެ އިންޖީނު ވެސް ގިނަ ދުވަސްވުމުގެ ސަބަބުން ބާވެ ހަލާކުވެފައިވާ ކަމަށާއި، ދެ އިންޖީނު ވެސް އޯވަރހޯލް ކުރަން ޖެހިފައިވާ ކަމަށެވެ. އަދި މިހާރު އެއް އިންޖީނު ބޭނުންކޮށްގެން ކަރަންޓު ދީފައިވީ ނަމަވެސް އެއީ ދާއިމީ ހައްލެއް ނޫން ކަމަށް ހަމީދު ވިދާޅުވިއެވެ.

ހަމީދު އިތުރަށް ވިދާޅުވީ، އެރަށަށް ދިމާވެފައިވާ ކަރަންޓްގެ މައްސަލަ ހައްލު ކުރުމަށް ފެނަކައިގެ ޓީމެއް ހަވީރުން ފެށިގެން ހަރަކާތްތެރި ވަމުންދާ ކަމަށާއި، އެއް އިންޖީނު އޯވަރހޯލް ކުރުމުގެ މަސައްކަތް މިހާރު ކުރަމުންދާ ކަމަށެވެ. އަދި ވަގުތީ ގޮތުން އެއް އިންޖީނު ބޭނުންކޮށްގެން ކަރަންޓް ދީފައިވީ ނަމަވެސް ކަރަންޓުގެ ލޯޑް ބޮޑުވެއްޖެ ނަމަ ރަށުން ކަރަންޓްދާތީ ބަނދަރުމައްޗާއި، ސަރުކާރު އޮފީސްތަކުން ކަރަންޓް ކަނޑާލާފައިވާ ކަމަށާއި، ވަގުތީ ގޮތުން ގޭގޭގެ އޭސީ ވެސް ބޭނުން ކުރުން މަޑުޖައްސާލުމަށް އަންގާފައިވާނެ ކަމަށް ހަމީދު ވިދާޅުވިއެވެ.

އާބާދީގައި ގާތްގަނޑަކަށް 970 މީހުން ހިމެނޭ ރަސްގެތީމުގެ ކަރަންޓްގެ މައްސަލައަށް ހައްލެއް ލިބުމަކީ އެރަށު ރައްޔިތުންގެ ވަރަށް ބޮޑު އެދުމެއް ކަމަށް ރަށުން ވާހަކަދެއްކި ބައެއް ފަރާތްތަކުން ބުނެއެވެ. އެގޮތުން ކަރަންޓް ނެތުމުގެ ސަބަބުން ވިޔަފާރި ކުރާ ފަރާތްތަކަށް ވެސް ބޮޑެތި ދަތިތައް ކުރިމަތިވާއިރު، ރޯދަ މަހުގެ އެހާ ގިނަ ވަގުތު ކަރަންޓް ގޮސްފައި ހުރުމުގެ ސަބަބުން ރަށުގެ ފެން މޯޓަރުތައް ވެސް ބޭނުން ނުކުރެވޭތީ އެކަމުގެ ޝަކުވާ ރައްޔިތުން ވަނީ ކޮށްފައެވެ.