މާދަމާ ފިތުރު ޒަކާތް ދޫކުރަން ފަށަނީ
2 ޖޫން 2019 | އާދީއްތަ 17:59ޒަކާތް ދޫކުރާނީ މިއަހަރު އަލަށް އެކުލަވާލި ފަގީރުންގެ ދަފްތަރުގައިވާ ފަރާތްތަކަށް
ޒަކާތް ދޫކުރަނީ
މި އަހަރުގެ ފިތުރު ޒަކާތް މާދަމާ ބަހަން ފަށާނެ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން ބުނީ ފިތުރު ޒަކާތް ދޫކުރާނީ މާލޭގައި ނަމަ އިސްލާމިކް މިނިސްޓްރީންނާއި އަރަބިއްޔާ ސްކޫލުން ކަމަށް ވާއިރު ރަށްރަށުގައި ދިރިއުޅޭ ފަރާތްތަކަށް އެ ރަށެއްގެ ރަށު އޮފީހުން ކަމަށެވެ. އަދި ޒަކާތް ދޫކުރާނީ މި އަހަރު އަލަށް އެކުލަވާލި ފަގީރުންގެ ދަފްތަރުގައިވާ ފަރާތްތަކަށް ކަމަށް ވެސް މިނިސްޓްރީން ބުނެއެވެ.
ޒަކާތުގެ ގޮތުގައި ފައިސާ ދޫކުރުމަށް ހަމަޖެހިފައި ވަނީ އިސްލާމީ މަރުކަޒުގައި މާދަމާ ހެނދުނު 09:30 އިން 12:00 އަށް، މެންދުރު ފަހު 12:45 އިން 15:30 އަށެވެ. އަދި ރޭގަނޑު 09:00 އިން 11:00 އަށް ކަމަށެވެ.
މީގެ އިތުރުން ޒަކާތް ދޫކުރާނީ ޒަކާތް ބަލާ ދާ މީހާގެ އައިޑީކާޑު، ޕާސްޕޯޓް ނުވަތަ އުފަންދުވަހުގެ ސެޓްފިކެޓްގެ އަސްލު ގެނައުމުން ކަމަށް ވެސް މިނިސްޓްރީން ބުނެއެވެ.
