ސުޕްރީމް ކޯޓުގެ ފަނޑިޔާރު އަބްދުﷲ ދީދީ, ފަނޑިޔާރުންގެ ސުލޫކީ މިންގަނޑާއި ޚިލާފްވެފައިވާ ކަމަށް ތުހުމަތުކުރައްވައި އެ މައްސަލަ ބައްލަވައިދެއްވުމަށް އެދި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ޖުޑިޝަލް ސާވިސް ކޮމިޝަން (ޖޭއެސްސީ) އަށް ހުށަހަޅުއްވައިފި އެވެ.
ރައްޔިތުންގެ މަޖިލީހުގެ މަސައްކަތްތަކާ ގުޅޭ މައުލޫމާތު މީޑިޔާތަކާ ހިއްސާކުރުމަށް ބާއްވާ ބައްދަލުވުންތަކުގެ ތެރެއިން އާދީއްތަ ދުވަހު ބޭއްވި ބައްދަލުވުމުގައި މަޖިލީހުގެ އަމީން އާންމު ފާތިމަތު ނިއުޝާ ވިދާޅުވީ ފަނޑިޔާރުންގެ ސުލޫކީ މިންގަޑާ ޚިލާފުވެފައިވާ ފަނޑިޔާރެއްގެ މައްސަލަ ބައްލަވައިދެއްވުމަށް އެދި ޖޭއެސްސީއަށް މަޖިލިސްގެ ރައީސް މައްސަލައެއް ހުށަހަޅުއްވާފައިވާ ކަމަށެވެ. ނަމަވެސް އެ ފަނޑިޔާރުގެ ނަމެއް ނިއުޝާ ވިދާޅެއްނުވެއެވެ.
މަޖިލީހުގެ މީޑިޔާ ޑިރެކްޓަރ ހަސަން ޒިޔާއު "ރާއްޖެ އެމްވީ" އަށް ފަހުން ވިދާޅުވީ ސުލޫކީ މައްސަލަ ބައްލަވައިދެއްވުމަށް އެދި ރައީސް ނަޝީދު ހުށަހެޅުއްވީ ސުޕްރީމްކޯޓްގެ ފަނޑިޔާރު އަބްދުﷲ ދީދީގެ މައްސަލައެއް ކަމަށެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ނިއުޝާ ވިދާޅުވީ ޖޭއެސްސީއަށް މިހާތަނަށް ހުށަހެޅިފައިވާ މައްސަލަތަކާއި ކޮމިޝަނަށް މިހާތަނަށް ހުށަހެޅިފައިވާ މައްސަލަތަކުގެ ތެރެއިން ކޮމިޝަނުން ނިންމުމެއް ނިންމާފައި ނުވާ މައްސަލަތަކާއި، އެ މައްސަލަތައް ގޮސްފައިވާ ހިސާބު އެނގޭނެ ގޮތަށް އެ މައުލޫމާތު މީޑީޔާ މެދުވެރިކޮށް އާންމު ކުރުމަށާއި، އަދި ކޮމިޝަނުގެ މަސައްކަތްތަކާ ގުޅޭ މައުލޫމާތު ގަވާއިދުން މީޑިއާ މެދުވެރިކޮށް އާންމު ކުރުމާ ގުޅޭ މައްސަލައެއް ވެސް ރައީސް ނަޝީދު ހުށަހަޅުއްވާފައިވާ ކަމަށެވެ.
ނިއުޝާ ވިދާޅުވީ އެ ދެ މައްސަލަ ވެސް މިހާރު ޖޭއެސްސީއަށް ފޮނުވާފައިވާ ކަމަށެވެ.
މި ދިޔަ އަންގާރަދުވަހުގެ ރޭ ބޭއްވި 19 ވަނަ ރައްޔިތުންގެ މަޖިލިސްގެ ފުރަތަމަ ޖަލްސާގައި ރައީސް ނަޝީދު މަޖިލިސްގެ ރައީސް ކަމަށް އިންތިޚާބުވެވަޑައިގެންނެވުމާ ގުޅިގެން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އެ މަނިކުފާނު ޖޭއެސްސީގެ މެމްބަރު ކަމަށް އައްޔަންކުރައްވާފައެވެ. ޖޭއެސްސީ އެކުލެވިފައިވާ ގޮތުން، މަޖިލީހުގެ ރައީސްގެ މަގާމަށް އިންތިހާބުވެވަޑައިގަންނަވާ މެންބަރު ޖޭއެސްސީގެ މެންބަރެއްގެ ގޮތުގައި އައްޔަން ކުރަން ޖެހޭނެ އެވެ. އަދި ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވަނީ ޖޭއެސްސީގައި ރައްޔިތުންގެ މަޖިލިސް ތަމްސީލް ކުރައްވާނެ މެމްބަރެއްގެ ގޮތުގައި ތުޅާދޫ ދާއިރާގެ މެމްބަރު ހިސާން ހުސެއިން ކަނޑައަޅާފައެވެ.
