ސްރީލަންކާގެ ރިޔާސީ އިންތިޚާބު ޑިސެމްބަރު މަހުގެ 7 ވަަނަ ދުުވަހު ބޭއްވުމަށް ނިންމާފައިވާ ކަމަށް އެގައުމުގެ އިލެކްޝަންސް ކޮމިޝަނުން އަންގާފައިވާ ކަމަށް ރައީސް މައިތިރިޕާލާ ސިރިސެނާ ވިދާޅުވެއްޖެއެވެ.

ސިރިސޭނާ ވިދާޅުވީ އަވަސް އަރުވާލައިގެން އިތުރު ރިޔާސީ ދައުރަކަށް ކުރިމަތިލުމާ މެދު ގޮތެއް ނުނިންމާ ކަމަށެވެ.

އިންޑިއާގެ ބޮޑު ވަޒީރު ނަރެންދުރަ މޯދީ ހުވާ ކުރުމުގެ ރަސްމިއްޔާތަށް އިންޑިއާއަށް ވަޑައިގެން އެ ގައުމުގައި ނޫސްވެރިންނާ ބައްދަލުކުރައްވައި މިއަދު ވިދާޅުވީ، ރިޔާސީ އިންތިހާބުގައި ބައިވެރިވާން ގޮތެއް ނިންމަން އަދި އަވަސް ކަމަށެވެ.

ރައީސް ސިރިސޭނާގެ ރިޔާސީ ދައުރު ނިމެނީ އަންނަ އަހަރުގެ ޖެނުއަރީ މަހުގެ ނުވަވަނަ ދުވަހަށެވެ.

އަންނަން އޮތް ރިޔާސީ އިންތިހާބަށް ވާދަކުރައްވާނެ ކަން މިހާތަނަށް އިއުލާން ކުރައްވާފައި ވަނީ ކުރީގެ ރައީސް މަހިންދަ ރާޖަޕަކްސަގެ ކޮއްކޯފުޅު އަދި ކުރީގެ ޑިފެންސް ސެކެޓްރީ ގޯތާބަޔާ ރާޖަޕަކްސަ އެކަންޏެވެ.

އޭޕްރިލް މަހު ލަންކާގައި ދިން އީސްޓަރ ސަންޑޭ ހަމަލާއަށް ފަހު ސިރިސޭނާގެ މަގުބޫލުކަން ވަނީ ދުވަހަކުވެސް ނުދާވަރަށް ދަށަށް ގޮސްފައެވެ. އެގޮތުން އެ ގައުމުގެ ގިނަ ބަޔަކު ވަނީ ސިރިސޭނާ އިސްތިއުފާ ދިނުމަށް ގޮވާލާފައެވެ.