ތުއްތު ކުދިންނަށް ޚާއްސަކޮށް އެންމެ ހަގު ސްކައުޓް ހަރަކާތް ރާއްޖޭގައި ރަސްމީކޮށް އިފްތިތާހު ކޮށްފިއެވެ.
ރާއްޖޭގެ ގައުމީ ސްކައުޓް ދުވަސް ފާހަގަ ކުރުމުގެގޮތުން ބުރާސްފަތި ދުވަހުގެރޭ މަޖީދިއްޔާ ސްކޫލްގައި ބޭއްވި ޖަލްސާއެއްގައި މި ހަރަކާތް އިފްތިތާހު ކޮށްދެއްވީ ސްކައުޓް އެސޯސިއޭޝަން އޮފް މޯލްޑިވްސްގެ ރައީސް އަލްއުސްތާޛް ހުސައިން މުހަންމަދު ހަނީފެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ސްކައުޓް އެސޯސިއޭޝަންގެ ޕްރޮގްރާމް ކޮމިޝަނަރ މައީދު މުހައްމަދު ޒާހިރު ވިދާޅުވީ، އަލަށް ތައާރަފް ކުރި މި ސެކްޝަންގައި ހިމެނެނީ މިހާތަނަށް ރާއްޖޭގައި އުފެއްދި ސްކައުޓުގެ އެންމެ ހަގު އުމުރުފުރާ ކަމަށާއި، އެގޮތުން އުމުރުން 5 އަހަރާއި 8 އަހަރާ ދެމެދުގެ ކުދިން މި އުމުރުފުރާގައި ހިމެނޭ ކަމަށެވެ. އެގޮތުން މި އުމުރުފުރާ ޚާއްސަކުރެވިފައިވަނީ ޔޫކޭޖީ އަދި ގްރޭޑް 1 ގައި ކިޔަވާ ދަރިވަރުންނަށް ކަމަށް ވެސް މައީދު ވިދާޅުވިއެވެ.
މައީދު އިތުރަށް ވިދާޅުވީ، ކުރިއަށް އޮތް ދެމަސް ތެރޭގައި މި ސެކްޝަންގެ ޔުނިފޯރމް ސްކައުޓް އެސޯސިއޭޝަނުން ލިބޭ ގޮތް ހެދުމަށް މަސައްކަތް ކުރައްވާ ކަމަށާއި، ބައެއް ސުކޫލުތަކުގައި މި އަހަރު ވެސް މި އުމުރުފުރާގެ ސްކައުޓް ހަރަކާތްތައް ފެށިގެންދާނެ ކަމަށް އުއްމީދު ކުރައްވާ ކަމަށެވެ.
"ޕްރީ ކަބް" އުމުރުފުރާގެ ނަމުން މި ސެކްޝަންގެ ސްކައުޓުންނަށް ނަންދީފައިވާއިރު، މި އުމުރުފުރާއާއެކު ސްކައުޓް އެސޯސިއޭޝަނުގެ ހަރަކާތްތަކުގައި ޖުމުލަ 4 އުމުރު ފުރާ ހިމެނޭނެ ކަމަށް މައީދު ވިދާޅުވިއެވެ.
