އިންޓަގެ ކޯޗުކަމުން ސްޕެލެއްޓީ ވަކިވެއްޖެ

އިންޓަމިލާންގެ ކޯޗުކަމުން ލޫސިއާނޯ ސްޕެލެއްޓީ ވަކިވެއްޖެއެވެ.

އިންޓައިން ނެރުނު ބަޔާނެއްގައި ބުނީ، އެ ކްލަބުގެ ކޯޗެއްގެ ގޮތުގައި ސްޕެލެއްޓީ ދެން ނުފެންނާނެ ކަމަށާއި، ފާއިތުވެދިޔަ ދުވަސްތަކުގައި އޭނާ ކްލަބަށް ކޮށްދިން ހިދުމަތަށް ޝުކުރު އަދާކުރާ ކަމަށެވެ.

އުމުރުން 60 އަހަރުގެ ސްޕެލެއްޓީގެ އިރުޝާދުގެ ދަށުން މި ފަހަރުގެ އިޓާލިއަން ލީގުގައި އިންޓަ ކުޅުނު 38 މެޗުގެ ތެރެއިން 20 މެޗުން ވަނީ މޮޅުވެފައެވެ. ބާކީ ނުވަ މެޗުން އެޓީމު ބަލިވިއިރު، ނުވަ މެޗުން ވަނީ އެއްވަރުވެފައެވެ. އެ ޓީމު ލީގު ނިންމާލީ ހަތަރުވަނައިގައެވެ.

އިންޓައާ 2017 ވަނަ އަހަރު ހަވާލުވި ސްޕަލެޓީގެ އިރުޝާދުގެ ދަށުން އެ ކްލަބް 90 މެޗު ކުޅެފައިވާއިރު، އޭގެ ތެރެއިން އެޓީމު މޮޅުވެފައިވަނީ 45 މެޗުންނެވެ. ބާކީ 19 މެޗުން އެ ކްލަބް ބަލިވެފައިވާއިރު، 26 މެޗުން ވަނީ އެއްވަރުވެފައެވެ.

އިޓަލީގެ ރޯމާ އާއި އުދިނޭޒީ އަދި އެމްޕޮލީއަށްވެސް ކޯޗުކޮށްދީފައިވާ ސްޕެލެއްޓީގެ އިރުޝާދުގެ ދަށުން ރޯމާއިން ދެ ކޮޕަ އިޓަލިއާ އަދި އެއް އިޓާލިއަން ސުޕަކަޕް ކާމިޔާބުކޮށްފައިވާއިރު، އޭނާގެ އިރުޝާދުގެ ދަށުން ރަޝިއާގެ ޒެނިތުން ވަނީ ޕްރިމިއާ ލީގު ދެފަހަރު ކާމިޔާބުކޮށްފައެވެ.

ރިޕޯޓްތައް ބުނާގޮތުގައި އިންޓަގެ ކޯޗުކަމާ ހަވާލުވާނީ ޗެލްސީގެ ކުރީގެ ކޯޗު އެންޓޯނިއޯ ކޮންޓޭއެވެ. އެގޮތުން އޭނާ އެމަގާމާ ވަރަށް އަވަހަށް ހަވާލުވާނެ ކަމަށް ރިޕޯޓްތައް ބުނެއެވެ.