ސްކޮޓްލެންޑްގެ ކޯޗުގެ މަގާމުން ސްޓްރެޗަން ވަކިވެއްޖެ

އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕުން ފުރުޞަތު ގެއްލުމާއި ގުޅިގެން، ސްކޮޓްލެންޑްގެ ކޯޗުގެ މަގާމުން ގޯޑަން ސްޓްރެޗަން އިސްތިއުފާ ދީފި އެވެ.

ސްކޮޓްލެންޑަށް ވޯލްޑް ކަޕްގެ ފުރުޞަތު ގެއްލުނުތާ ހަތަރު ދުވަސް ފަހުން، އެޤައުމުގެ ކޯޗުގެ މަގާމުން ސްޓްރެޗަން ވަކިވިކަން އިޢުލާން ކޮށްފައިވާއިރު، ކޯޗުގެ މަގާމް ދޫކޮށްލާފައި ވަނީ ސްކޮޓްލެންޑްގެ ފުޓްބޯޅަ އެސޯސިއޭޝަނާއެކު ކުރި މަޝްވަރާތަކަށް ފަހު، ދެފަރާތުން ރުހުމާއެކުގައި ކަމަށް ރިޕޯޓްތައް ބުނެއެވެ.

ސްޓްރެޗަން އާއެކު، އޭނާގެ އެސިސްޓެންޓެއްގެ ގޮތުގައި މަސައްކަތް ކުރި މާކް މެޤީވެސް އެމަގާމުން ވަކިވާނެ އެވެ.

ސްކޮޓްލެންޑްގެ ކޯޗުގެ މަގާމުން ސްޓްރެޗަން ވަކިވުމާއި ގުޅިގެން ސްކޮޓްލެންޑްގެ ފުޓްބޯޅަ އެސޯސިއޭޝަންގެ ޗީފް އެގްޒެކެޓިވް ސްޓިވާޓް ރޭގަން ވިދާޅުވީ، ގައުމީ ޓީމަށް ސްޓްރެޗަން ކޮށްދިން ޚިދުމަތަށް ސްކޮޓްލެންޑްގެ ފުޓްބޯޅަ އެސޯސިއޭޝަންގެ ބޯޑުން ޝުކުރު އަދާކުރާ ކަމަށެވެ.

ސްޓްރެޗަން ސްކޮޓްލެންޑްގެ ކޯޗުގެ މަގާމާއި ހަވާލުވީ 2013 ވަނަ އަހަރު އެވެ. ސްކޮޓްލެންޑްގެ ކުރީގެ ކޯޗު ކްރެއިގް ލެވެއިންގެ ބަދަލުގައި އެމަގާމާއި ހަވާލުވި ސްޓްރެޗަން އާއެކު ސްކޮޓްލެންޑްގެ ފުޓްބޯޅަ އެސޯސިއޭޝަނުން ފުރަތަމަ އެއްބަސްވުމެއް އެކުލަވާލީ 2014 ވަނަ އަހަރުގެ ފީފާ ވޯލްޑް ކަޕްގެ ކޮލިފައިންގެ ނިޔަލަށެވެ.

އޭގެ ފަހުން އޭނާގެ އިރުޝާދުގެ ދަށުން 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ކޮލިފައިންގައި ސްކޮޓްލެންޑަށް ރަނގަޅު ފެށުމެއް ލިބުނު ނަމަވެސް، ކޮލިފައިންގެ ފަހުކޮޅުގައި ލިބުނު ދަށް ނަތީޖާތަކުގެ ސަބަބުން މިދިޔަ އަހަރު ފްރާންސްގައި ބޭއްވި ޔޫރޯ ފުޓްބޯޅަ މުބާރާތަށް ކޮލިފައިވެފައެއްނުވެ އެވެ.

އެހެން ނަމަވެސް، ސްކޮޓްލެންޑްގެ ފުޓްބޯޅަ އެސޯސިއޭޝަނާއި ސްޓްރެޗަން އާދެމެދު އޮތް އެއްބަސްވުން އާ ކުރުމަށް ފަހު، 2018 ވަނަ އަހަރުގެ ފީފާ ވޯލްޑް ކަޕް ކޮލިފައިންގ އަށް ސްކޮޓްލެންޑް ނިކުތް ނަމަވެސް، ޔޫރޯ ޒޯންގެ ކޮލިފައިންގ ގްރޫޕް އެފްގެ ފަހު މެޗުގައި ސްލޮވީނިއާ އާ ބައްދަލުކުރި މެޗު ދެ ލަނޑު ދެ ލަނޑުން އެއްވަރުވެ، ޕްލޭއޯފްގެ ޖާގަވެސް ވަނީ ގެއްލިފައެވެ.