އަދި ވެސް ކުރިމަގާމެދު ގޮތެއް ނުނިމޭ: ހަޒާޑް

އަދިވެސް ކުރިމަގާމެދު ގޮތެއް ނުނިމޭ ކަމަށް ޗެލްސީއަށް ކުޅެމުން އަންނަ ބެލްޖިއަމްގެ ކެޕްޓަން އެޑެން ހަޒާޑް ބުނެފިއެވެ.

ބީޓީ ސްޕޯޓްއަށް ދިން އިންޓަވިއުއެއްގައި ހަޒާޑް ބުނީ، މިއީ އަލްވަދާއުކަމަށް ވެސް ވެދާނެ ކަމަށާއި، ފުޓުބޯޅައިގައި ވާނެގޮތެއް ނޭނގޭނެ ކަމަށެވެ.

ހަޒާޑް ބުނީ، އޭނާގެ ހުވަފެނަކަށްވީ ޕްރިމިއާ ލީގުގައި ކުޅުން ކަމަށާއި، ހަތް އަހަރުވަންދެން އެ ލީގުގެ އެންމެ ބޮޑު އެއް ކްލަބަށް ކުޅެވިއްޖެ ކަމަށެވެ. އެގޮތުން އޭނާ ބުނީ، މިހާރު އާކަންތައްތަކެއް ތަޖުރިބާކުރަން ބޭނުންވާ ކަމަށެވެ.

ކުރިމަގާ ބެހޭގޮތުން ހަޒާޑް ބުނީ، ކުރިޔަށް އޮތް މަދު ދުވަސްކޮޅު ތެރޭގައި ގޮތެއް ނިމިގެންދާނެ ކަމަށާއި، އޭނާވެސް މަޑުކުރަނީ ގޮތެއް ނިމެންދެން ކަމަށެވެ.

ރިޕޯޓްތައް ބުނާގޮތުން ހަޒާޑް ބޭނުންވަނީ މި ސީޒަނަށް ފަހު، ޗެލްސީ ދޫކޮށް ރެއާލް މެޑްރިޑަށް ބަދަލުވާށެވެ. އަދި އެކަމަށް ރެއާލުން ވެސް މަސައްކަތް ކުރަމުން އަންނަ ކަމަށް ރިޕޯޓްތައް ބުނެއެވެ.

ރެއާލްގެ އިތުރުން ވެސް ގިނަ ކްލަބްތަކުން އަންނަނީ ހަޒާޑް ހޯދުމަށް މަސައްކަތް ކުރަމުންނެވެ. އޭގެ ތެރޭގައި އިޓަލީ އަދި ޖަރުމަންގެ ކްލަބްތައް ވެސް ހިމެނެއެވެ. ޗެލްސީއާ އެކު ހަޒާޑް ހަދާފައިވާ އެއްބަސްވުން ހަމަވާނީ 2020 ވަނަ އަހަރެވެ.

ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެ ޓީމަށް ކުޅުނު 194 މެޗުގައި 50 ލަނޑު ކާމިޔާބު ކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރު އެވެ. އޭނާ ވަނީ ޗެލްސީއަށް މިހާތަނަށް ކުޅުނު 352 މެޗުގައި 110 ލަނޑު ކާމިޔާބު ކޮށްފައެވެ.

ޗެލްސީއާ އެކު ޔޫރޮޕާ ލީގު ދެފަހަރު ކާމިޔާބު ކޮށްފައިވާ ހަޒާޑް ވަނީ އެ ޓީމާ އެކު ޕްރިމިއާ ލީގު ދެ ފަހަރު އަދި ފުޓްބޯލް ލީގު ކަޕް ވެސް ކާމިޔާބު ކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 100 މެޗުގައި 30 ލަނޑު ކާމިޔާބު ކޮށްފައެވެ.