އޮއްތޮގެ ގައިގައި ސައިކަލުން ޖެއްސި މީހާގެ ޝަރީއަތް މިއަދު ފަށަނީ
30 މެއި 2019 | ބުރާސްފަތި 03:01އޮއްތޮ ވަނީ ހިނގުމުން މަހުރޫމްވެފައި
އޮއްތޮ އެކްސިޑެންޓަށްފަހު އޭނާ އަށް ފަރުވާދިން ޓީމާ އެކު: އެކްސިޑެންޓަށް ފަހު އެ ޒުވާނާ ވަނީ ނުކުޅެދޭ ހާލަތަށް ގޮސްފައި
މީގެ އެއް އަހަރު ކުރިން ހިނގި ނުރައްކާތެރި އެކްސިޑެންޓުގައި، ނުކުޅެދޭ ހާލަތެއް މެދުވެރިވެފައިވާ އުމަރު ސަލީމް (އޮއްތޮ)ގެ ގައިގައި ސައިކަލުން ޖެއްސި މީހާގެ ޝަރީއަތް ހުޅުމާލޭ ކޯޓުގައި ބުރާސްފަތި ދުވަހު ފެށުމަށް ތައްޔާރުވެއްޖެއެވެ.
ޕޮލިސް ކޮމިޝަނަރު މުހައްމަދު ހަމީދު ބުދަ ދުވަހުގެ ރޭ ކުރެއްވި ޓުވީޓެއްގައި ވިދާޅުވީ، ބާރު ސްޕީޑްގައި ދުއްވި ސައިކަލަކުން ޖެހި އެކްސިޑެންޓްވެ ބޮޑެތި އަނިޔާތަކެއް ލިބުނު އުމަރު ސަލީމު މައްސަލާގެ ފުރަތަމަ އަޑު އެހުން ބުރާސްފަތި ދުވަހު ހުޅުމާލޭގެ ކޯޓުގައި ފެށިގެންދާނެ ކަމަށެވެ. އަދި އޮއްތޮއަށް ނުހިނގޭކަން ކަން ކޮމިޝަނަރ ވަނީ ފާހަގަކޮށްފައެވެ.
އުމުރުން 33 އަހަރުގެ އޮއްތޮގެ ގައިގައި ސައިކަލުން ޖެހި ހިނގި ނުރައްކާތެރި އެކްސިޑެންޓާ، ގުޅިގެން އޮއްތޮއަށް ހިނގާބިނގާވެ އުޅުމާއި ވާހަކަ ދެއްކުމުން ވަނީ މަހްރޫމްވެފައެވެ.
މިދިޔަ އަހަރުގެ މެއި މަހުގެ 29 ވަނަ ދުވަހު ހުޅުމާލޭގައި މި އެކްސިޑެންޓް ހިނގީ ކޮންޓްރޯލެއް ނެތި ބާރު ސްޕީޑުގައި ދުއްވާފައި ދިޔަ ސައިކަލުން އޮއްތު ދުއްވާފައި ދިޔަ ސައިކަލުގައި ޖެހިގެންނެވެ.
