ހިސާންގެ ނަން ޖޭއެސްސީއަށް ހުށައެޅުމަށް އެމްޑީޕީ ޕީޖީ ގުރޫޕުން ފާސްކޮށްފި
29 މެއި 2019 | ބުދަ 04:57ނަން ފާސްކޮށްފައިވަނީ ހާޒިރުވެވަޑައިގެން ތިއްބެވި މެމްބަރުންގެ އިއްތިފާގުން
ހިސާން ހުސައިން
ޖުޑީޝަލް ސަރވިސް ކަމިޝަން(ޖޭއެސްސީ)އަށް ތުޅާދޫ ދާއިރާގެ މެމްބަރު ހިސާން ހުސައިންގެ ނަން ހުށައެޅުމަށް އެމްޑީޕީގެ ޕީޖީ ގުރޫޕުން ފާސްކޮށްފިއެވެ.
ހިސާންގެ ނަން ފާސްކޮށްފައިވަނީ ހާޒިރުވެވަޑައިގެން ތިއްބެވި މެމްބަރުންގެ އިއްތިފާގުންނެވެ.
އިނގިރޭސިވިލާތުގައި ގާނޫނީ ދާއިރާއިން އިން 2005ގައި މާސްޓާޒް ފުރިހަމަކުރައްވުމަށް ފަހު ފުރަތަމަ ވަޒީފާ އަދާކުރެއްވީ އެޓަރނީ ޖެނެރަލްގެ އޮފީހުގައެވެ. އެ އޮފީހުން 2007 ވަނަ އަހަރު ވަކިވެވަޑައިގަތުމަށް ފަހު އަމިއްލަ ލޯ ފާމެއްގައި އުފައްދަވައި މަސައްކަތް ކުރައްވަން ފެއްޓެވި އެވެ. ރައީސް މުހައްމަދު ނަޝީދުގެ ވެރިކަމުގައި ރައީސް އޮފީހުގެ ލީގަލް އެފެއާޒް ސެކްރެޓަރީކަން ހިސާން އަދާކުރެއްވެވި އެވެ.
ރައީސް ނަޝީދު ހައްޔަރުކުރުމުން، އެމަނިކުފާނު މިނިވަންވުމާ ހަމައަށް ގާނޫނީ ވަކީލުންގެ ޓީމުގައި އިސްކޮށް ހުންނަވައިގެން ހިސާން މަސައްކަތް ކުރެއްވެވި އެވެ. އަދި ކުރީގެ ރައީސް ޔާމީން ވެރިކަމުގައި ހައްޔަރުކުރި ސިޔާސީ ލީޑަރުންގެ ދިފާއުގައި ވެސް ހިސާން ވަކީލެއްގެ ގޮތުގައި މަސައްކަތްކުރެއްވެވި އެވެ.
ރައީސް ޔާމީންގެ ވެރިކަމުގައި ކުއްލި ނުރައްކަލުގެ ހާލަތު ގެނެސް، އުއްތަމަ ފަނޑިޔާރު އަބްދުﷲ ސައީދު ހައްޔަރުކުރުމާއެކު އެމަނިކުފާނުގެ ދިފާއުގައި ވެސް މަސައްކަތް ކުރެއްވީ ހިސާން އެވެ.
