އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޖުޑިޝަރީގެ ބާރުތައް ވަކި މިންވަރެއްގައި ހިފެހެއްޓުމަށް މަސައްކަތް ކުރާތީ ކަމަށް ބުނެ އެ ގައުމުގެ ސުޕްރީމް ކޯޓުގެ ރައީސް އެސްތަރ ހަޔުޓް، ނަތަންޔާހޫ ވަރަށް ބޮޑަށް ކުށްވެރި ކުރައްވައިފިއެވެ.

އެގޮތުން ނަތަންޔާހޫގެ ޕާޓީއާ ކޯލިޝަން ހަދާފައިވާ ކަނާތު ފިޔައިގެ ޕާޓީތަކުން ޖުޑިޝަރީގެ ބާރުތައް ކަނޑުވާލުމަށްޓަކައި ޕްލޭންތައް ހަދަމުންދާ ކަމަށް ހަޔުޓް ތުހުމަތު ކޮށްފައި ވެއެވެ.

އެސްތަރ ހަޔުޓް ނަތަންޔާހޫ އަމަލުތައް ކުއްވެރިކޮށްފައި ވާއިރު ސުޕްރީމް ކޯޓުން ކުރިން ހުއްޓުވާ ފައިވާ ގާނޫނުތައް އަލުން ވުޖޫދަށް ގެނައުމަށް، ޕާލަމެންޓަށް މަގުފަހިކުރާ ގާނޫނެއް ތައާރަފް ކުރާނޭ ކަމަށް ނަތަންޔާހޫއާ ގުޅިފައިވާ ޕާޓީތަކުން ވަނީ ބުނެފައެވެ.

ޕާލަމެންޓްގެ 55 ގޮނޑި ކާމިޔާބުކުރި މެދުތެރޭ ވާތުފިޔައިގެ ޕާޓީތަކުން ބުނަނީ، ކަނާތުފިޔައިގެ ޕާޓީތަކުން ވުޖޫދުކުރަން ބުނާ ގާނޫނުތަކުގެ ސަބަބުން އިސްރާއީލުގެ ޑިމޮކްރަސީ ހާލުވެގެން ހިނގައިދާނެ ކަމަށެވެ.

މީގެ އިތުރުން ވެސް މަޖިލީސް މެންބަރަކު މެމްބަރުކަމުގައި ހުއްޓައި އެ މެމްބަރަކާ ދެކޮޅަށް އެއްވެސް ކޯޓެއްގައި ޝަރީއަތް ނުހިންގޭނޭ ގޮތް ހެދުމަށް ވެސް ނަތަންޔާހޫއާއި ގުޅިފައިވާ ޕާޓީތަކުންވަނީ ނިންމާފައެވެ.

އުއްތަމަ ފަނޑިޔާރު ވިދާޅުވީ، ސަރުކާރެއް އެކުލަވާލަން ކުރަމުންދާ މަޝްވަރާތަކުގައި އިސްރާއީލުގެ ޖުޑިޝަރީއާއި، ފަނޑިޔާރުންނަކީ ރައްޔިތުންގެ ދުޝްމަނުން ކަމުގައި ސިފަކުރަންޖެހޭ ސަބަބެއް ނެތް ކަމަށެވެ.

ހުސްވި އޭޕްރީލް މަހުގެ 10ވަނަ ދުވަހު އިސްރާއީލުގައި ބޭއްވި އާންމު އިންތިޚާބުގައި ނަތަންޔާހޫގެ ޕާޓީއާ ކޯލިޝަން ހަދާފައިވާ ކަނާތު ފިޔައިގެ ޕާޓީތަކުން ސެނެޓްގެ 65 ގޮނޑި ކާމިޔާބު ކޮށްފައި ވާއިރު މެދު ތެރޭގެ ވައަތުފިޔައިގެ ޕާޓީތަކުން ވަނީ ސެނެޓްގެ 55 ގޮނޑި ކާމިޔާބު ކޮށްފައެވެ.