އުލިގަމަށް ހޮނު އަޅައި ގެއްލުންތަކެއް ލިބިއްޖެ

ރާއްޖެއަށް މިހާރު ކުރަމުންދާ ވިއްސާރައިގައި ހއ. އުލިގަމަށް ހޮނު އަޅައި ގެއްލުންތަކެއް ލިބިއްޖެއެވެ.

އެކަމާ ގުޅޭ ގޮތުން "ރާއްޖެއެމްވީ" އަށް މައުލޫމާތު ދެއްވަމުން އުލިގަމު ކައުންސިލުގެ ނައިބް ރައީސް އަހުމަދު ޒިޔާދު ހަސަން ވިދާޅުވީ، ހޮނު އަޅާފައިވަނީ ހުކުރު ދުވަހު މެންދަމު 1:30 ހާއިރު ކަމަށާއި، މެދުކެނޑުމެއްނެތި ބޯކޮށް ވާރޭވެހި ގުގުރުމަށްފަހު ކަމަށެވެ. އަދި މިހާރު މޫސުން ކޮންމެ ވެސް ވަރަކަށް ރަނގަޅު ކަމަށްވެސް އޭނާ ވިދާޅުވިއެވެ.

Advertisement

ޒިޔާދު އިތުރަށް ވިދާޅުވީ، ހޮނު އެޅުމުގެ ސަބަބުން އެއްވެސް މީހަކަށް ގެއްލުމެއް ލިބިފައި ނުވާ ކަމަށާއި، ނަމަވެސް ބައެއް ގޭގޭގައި ބޭނުން ކުރާ އިލެކްޓްރޯނިކް ސާމާނުތަކަށް ގެއްލުން ލިބިފައިވާ ކަމުގެ މައުލޫމާތު ލިބިފައިވާ ކަމަށެވެ. އަދި ކައުންސިލުން މިހާރު ގެންދަނީ ހޮނު އެޅުމުގެ ސަބަބުން ލިބުނު ގެއްލުންތައް ބަލަމުން ކަމަށާއި، ބައެއް ގޭގޭގެ އޭސީތަކާއި ޓީވީ ހަލާކުވެފައިވާ ކަމުގެ މައުލޫމާތު ލިބިފައިވާ ކަމަށްވެސް ޒިޔާދު ވިދާޅުވިއެވެ.

އޭގެ އިތުރުން، ހޮނު އެޅުމުގެ ސަބަބުން އެ ރަށު މުއާސަލާތީ ޚިދުމަތަށް ބުރޫ އަރާފައިވާ ކަމަށް ވެސް އޭނާ ވިދާޅުވިއެވެ.

ރާއްޖެއަށް މިހާރު ކުރަމުންދާ ވިއްސާރަ ކުރިއަށް އޮތް ހަފްތާއެއްހާ ދުވަހަށް ދިގު ދެމިގެންދާނެ ކަމަށް މޯލްޑިވްސް މީޓްރޮލޮޖިކަލް ސާވިސް ސެންޓަރުން ލަފާކޮށްފައިވާއިރު، ކުރިއަށް އޮތް ދެތިން ދުވަހު ރާއްޖޭގެ ދެކުނަށާއި މެދުރާއްޖެތެރޭގެ އަތޮޅުތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމަށާއި އުތުރުގެ އަތޮޅުތަކަށް ވެސް ވިއްސާރަވާނެ ކަމަށް އެ ސެންޓަރުން މައުލޫމާތު ދެއެވެ.