ލަންކާގެ މުސްލިމުންނަށް ހަމަލާ ދޭން ރޭވި ފާދިރީ މިނިވަންކޮށްފި

އަވައްޓެރި ސްރީ ލަންކާގެ މުސްލިމުންނާ ދެކޮޅު ހަރަކާތްތަކުގައި އިސްކޮށް ހުރެ، ހަމަނުޖެހުން ހިންގުމުގެ ކުށުގައި ޖަލަށްލާފައިވާ ބޮދު ބަލަ ސޭނާ ޖަމާއަތުގެ ޖެނެރަލް ސެކެޓްރީ ގަލަގޮޑައްޓެ ނަންސާރަ ތެރޯއަށް ލަންކާގެ ރައީސް މައިތިރިޕާލަ ސިިރިސޭނާ މައާފު ދެއްވައިފި އެވެ.

ފާދިރީ ތެރޯއަށް 2016 ވަނަ އަހަރު ހަ އަހަރުގެ ޖަލު ހުކުމެއް ކޮށްފައި ވަނީ މުސްލިމުންނާ ދެކޮޅު ހަރަކާތްތައް ހިންގުމާއި ކޯޓުގެ ހުރުމަތް ކެނޑުމުގެ ކުށުގަ އެވެ. މުސްލިމުންނާ މެދު ނަފްރަތު އުފެދޭ ގޮތަށް ވާހަކަ ދައްކާ މި ފާދިރީއަކީ އަހަރުތަކެއް ވަންދެން ލަންކާގެ މުސްލިމުންނަށް ފުރައްސާރަކޮށް، މުސްލިމުންނަށް ހަމަލާ ދޭން ގޮވާލާފައިވާ މީހެކެވެ.

ރޮއިޓާސް އިން ބުނެފައިވާ ގޮތުގައި، ތެރޯ މިނިވަންކުރުމަށް ބޭނުންވާ ހުރިހާ ލިޔެކިޔުމެއްގައި ރައީސް ސިރިސޭނާ ވަނި ސޮއިކުރައްވާފައިވާފަ އެވެ. އޭނާ މިނިވަން ކުރީ ކޮން ސަބަބަކާއި ހުރެ ކަމަށް ލަންކާ ސަރުކާރުން ހާމަކޮށްފައިނުވާ އިރު، މިނިވަންކުރުމުގެ ސަބަބުން މިހާރު ލަންކާގައި އޮތް ނާޒުކު ހާލަތު އިތުރަށް ގޯސްވެދާނެ ކަމަށް ތަޖުރިބާކާރުން ފާހަގަކޮށްފައިވެއެވެ.

ބެލެވޭ ގޮތުގައި ފާދިރީ ތެރޯ މިނިވަންކުރީ ލަންކާގެ ނުފޫޒުގަދަ ބުޑިސްޓު ފާދިރީން އޭނާ މިނިވަންކުރުމަށް އެދި ސަރުކާރަށް ބާރުއަޅައިގެންނެވެ.