ކުރިމަގާމެދު ގޮތެއް ނިންމާނީ ޔޫރޮޕާ ލީގު ފައިނަލަށްފަހު ކަމަށް އާސެނަލްއަށް ކުޅެމުން އަންނަ ކީޕަރ ޕީޓަރ ޗެކް ބުނެފިއެވެ.

ޗެކް އޭނާގެ ރަސްމީ ޓުވިޓާ އެކައުންޓުން ކުރި ޓުވީޓެއްގައި ބުނީ، ކުރިމަގާމެދު ގޮތެއް ނިންމާނީ ޔޫރޮޕާ ލީގު ފައިނަލަށްފަހު ކަމަށާއި، މިވަގުތު ހުރިހާވެސް ވިސްނުމެއް ހުރީ ޔޫރޮޕާ ލީގު ފައިނަލަށް ކަމަށެވެ.

އުމުރުން 37 އަހަރުގެ ޗެކް މިހެން ބުނެފައިވަނީ މި ސީޒަނަށްފަހު އޭނާ ޗެލްސީގެ މަގާމަކާ ހަވާލުވާން އުޅޭކަމަށް ރިޕޯޓްތައް ބުނަމުން އަންނަ ދަނޑިވަޅެއްގައެވެ. އޭނާ ވަނީ މި ސީޒަނަށްފަހު ކުޅުން ހުއްޓާލާނެކަން އިއުލާންކޮށްފައެވެ.

ޔޫރޮޕާ ލީގު ފައިނަލުގައި މި މަހުގެ 29 ވަނަ ދުވަހު ޗެލްސީއާ ދެކޮޅަށް އާސެނަލް ކުޅޭ މެޗު ވެގެންދާނީ ޗެކް އާސެނަލްއަށް ކުޅޭ ފަހު މެޗަށެވެ.

މީގެ ކުރިން ޕްރިމިއާ ލީގުގައި 15 އަހަރު ކުޅުނުކަން ފާހަގަކޮށް ޗެކް ބުނީ، އެ ލީގުގައި ކާމިޔާބުކުރެވެން އޮތް ހުރިހާ މުބާރާތެއް ކާމިޔާބުކުރެވިފައިވާ ކަމަށާއި، އަދި ކެރިއަރުގައި ބޭނުންވި ހުރިހާ މުބާރާތެއް ވެސް ކާމިޔާބުކުރެވިފައިވާ ކަމަށެވެ.

ޗެލްސީއާ އެކު 11 ސީޒަން ހޭދަކޮށްފައިވާ ޗެކް ވަނީ އެ ކްލަބަށް 494 މެޗު ކުޅެ، އެ ކްލަބާއެކު ހަތަރު ޕްރިމިއާ ލީގު، ހަތަރު އެފްއޭކަޕް، ތިން ލީގް ކަޕް، ދެ ކޮމިއުނިޓީ ޝިލްޑް، އެއް ޔުއެފާ ޗެމްޕިއަންސް ލީގު އަދި އެއް ޔޫރޮޕާ ލީގު ކާމިޔާބުކޮށްފައެވެ.

ޗެލްސީ ދޫކޮށް ޗެކް އާސެނަލްއަށް ބަދަލުވީ 2015 ވަނަ އަހަރެވެ. އޭނާ ވަނީ މިހާތަނަށް އެޓީމަށް 138 މެޗު ކުޅެ، އެފްއޭ ކަޕް އަދި ކޮމިއުނިޓީ ޝިލްޑް ދެފަހަރު ކާމިޔާބުކޮށްފައެވެ.

ޗެކް ރިޕަބްލިކްއަށް 124 މެޗު ކުޅެ، ގައުމީ ކެޕްޓަންކޮށްފައިވާ ޗެކް ވަނީ 2002 ވަނަ އަހަރު 21 އަހަރުން ދަށުގެ ޔޫރޯ ކާމިޔާބުކޮށްފައެވެ. އަދި އެ މުބާރާތުގެ އެންމެ މޮޅު ކުޅުންތެރިޔާގެ މަގާމުވެސް އޭނާ ވަނީ ހޯދާފައެވެ.

ޕްރިމިއާ ލީގުގެ ގޯލްޑެން ގްލޯވް ހަތަރު ފަހަރު ހޯދާފައިވާ ޗެކް ވަނީ ނުވަ ފަހަރު ޗެކް ރިޕަބްލިކްގެ މޮޅު ކުޅުންތެރިޔާގެ މަގާމު ހޯދާފައެވެ. އަދި ތިންފަހަރު ޔޫރަޕްގެ މޮޅު ގޯލް ކީޕަރުގެ މަގާމު ހޯދާފައިވާ ޗެކް ވަނީ ޗެލްސީގެ މޮޅު ކުޅުންތެރިޔާގެ މަގާމު ވެސް އެއް ފަހަރު ހޯދާފައެވެ.