އިންތިޚާބުގެ ނަތީޖާއަށް ފަހު ޖޭޕީ ވަނީ މަޑުޖެހިލާފައި: ޤާސިމް

އިންތިޚާބުގެ ނަތީޖާއަށް ފަހު ޖުމްހޫރީ ޕާޓީ ވަނީ މަޑުޖެހިލާފަ ކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.

ޖުމްހޫރީ ޕާޓީ އަށް މީޑިޔާގައި ހަރަކާތްތެރިވަމުން އައި އަހްމަދު އަނޫޝް ސޮއި ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ގާސިމް ވިދާޅުވީ ރައްޔިތުންގެ މަޖިލީހުގެ އިންތިޚާބުގެ ނަތީޖާ އައި ގޮތުން ޖޭޕީއަށް މަޑުޖެހިލަން މަޖްބޫރުވީ ކަމަށެވެ.

ރައްޔިތުންގެ މަޖިލީހުގެ އިންތިޚާބުގެ ނަތީޖާއަށް ފަހު ސިޔާސީ މައިދާނުގައި ޖޭޕީގެ ހަރަކާތްތަކެއް ފެނިގެން ގޮސްފައެއް ނުވެއެވެ. 19 ވަނަ މަޖިލިސް އިންތިޚާބުގައި ޖުމްހޫރީ ޕާޓީ އަށް ލިބުނީ ފަސް ގޮނޑި އެވެ. މަޖިލިސް އިންތިޚާބުގައި ޖޭޕީ ނިކުމެފައިވަނީ ޕީޕީއެމް، ޕީއެންސީ ކޯލިޝަނާއި އެކުގައެވެ.

ހޯމަދުވަހުގެ ރޭ ކުނޫޒްގައި ބޭއްވި ހަފްލާގައި ވާހަކަ ދައްކަވަމުން ގާސިމް ވިދާޅުވީ ޖޭޕީއަށް ބަދަލުތަކެއް ގެންނަންޖެހިފައިވާ ކަމަށް ދެކިވަޑައިގަންނަވާ ކަމަށާއި، ވޭތުވެދިޔަ ތާގައި ކުރެވިފައިވާ ތަޖްރިބާގެ އަލީގައި ޖޭޕީއަށް ބަދަލުތަކެއް ގެންނާނެ ކަމަށެވެ.

ގާސިމް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެރިކަމަށް ގެންނަން ކުރެއްވި މަސައްކަތް ހަނދާން ނުނެތޭނެ ކަމަށާއި، ސަރުކާރު ނަގަހައްޓައި ދަމަހައްޓަން ކުރަންޖެހޭ ހުރިހާ މަސައްކަތެއް ކުރައްވާނެ ކަމަށެވެ. ރައީސް ސޯލިހަށް ގޯނާކުރުމުގެ ގޮތުން ކުރެވޭ އެއްވެސް ކަމެއްގައި ބައިވެރިވެވަޑައިނުގަންނަވާނެ ކަމަށް ގާސިމް ވިދާޅުވިއެވެ.

ގާސިމް ވަނީ ޝަރުއީ ދާއިރާއަށް ފާޑުވިދާޅުވެ ވާހަކަފުޅު ދައްކަވާފައެވެ. އެގޮތުން ރައީސް ޔާމީންގެ ސަރުކާރުގައި ގާސިމްގެ ވިލާ ކުންފުނީގެ އެކައުންޓުތައް ފްރީޒުކުރި މައްސަލައަށް އަލިއަޅުވާލައްވާ ވާހަކަ ދައްކަވަމުން ގާސިމް ވިދާޅުވީ، ކޯޓުގެ ތިން މަރުހަލާ ނިމުނުއިރު ހާމަވިކަމަކީ އެކަންތަކަކީ ގާސިމްގެ މައްޗަށް ސާބިތުވާ ކަންތައް ނޫން ކަމަށެވެ. ގާސިމް ވިދާޅުވީ އަދުލްއިންސާފު ނުލިބެނީ ވެރިކަމުގެ ފަރާތުން އަދުލްއިންސާފު ގާއިމް ކުރުމަށް ހުރަސް އަޅާތީ ކަމަށެވެ.