ކ. މާލެ
|
20 މެއި 2019 | ހޯމަ 17:47
ސިޔާސީ ޕާޓީއެއްގެ އެއްވުމެއްގެ ތެރެއިން
ސިޔާސީ ޕާޓީއެއްގެ އެއްވުމެއްގެ ތެރެއިން
ޓްވިޓަރ
މަގޭ ރިޕޯޓު
ޕާޓީތައް ހިންގަނީ ދައުލަތުގެ ފައިސާއިން، ހަރަދުތައް ހާމަކުރަންޖެހޭ!
 
މިއަހަރު ވެސް 26 މިލިއަނަށް ވުރެ ގިނަ ރުފިޔާ ޕާޓީތަކަށް

ކޮންމެ ޕާޓީއަކުން ވެސް ފަތުރަނީ އެބައި މީހުންގެ ފިކުރެއެވެ. އެއް ބަޔަކު، އަނެއް ބައެއްގެ މައްޗަށް ކުރި ހޯދުމަކީ ޕާޓީތަކުގެ އަމާޒެވެ. ރައްޔިތުންނަށް ސިޔާސަތުތައް ހުށަހަޅައި، ފިކުރު ވިއްކައިގެން، ވެރިކަމަށް އައުމަކީ ސިޔާސީ ޕާޓީތަކުގެ އެންމެ ބޮޑު އަމާޒެވެ. އެ އަމާޒަށް ވާސިލުވުމަށް، އެ ޕާޓީތަކަށް ހަރަދު ކުރަނީ ވެސް ދައުލަތުންނެވެ. ކޮންމެ އަހަރަކު އެގޮތަށް ދައުލަތުގެ ބަޖެޓުން ޕާޓީތަކުން ފައިސާ ދޫކުރެއެވެ.

ސިޔާސީ ޕާޓީތަކުގެ ގާނޫނުގައި ބުނެފައި ވަނީ ދައުލަތުގެ އަހަރީ ބަޖެޓުގެ ޖުމްލަ އަދަދުގެ 0.1 ޕަސެންޓާއި 0.2 އާ ދެމެދުގެ އަދަދެއް ކޮންމެ އަހަރަކު ސިޔާސީ ޕާޓީތަކަށް ދޭންޖެހޭނެ ކަމަށެވެ. ދެހާސް ތޭރަ ވަނަ އަހަރު އަމަލު ކުރަން ފެށި އެ ގާނޫނުގެ ދަށުން ޝަރުތުތަކާ އެކު، ޕާޓީތަަކަށް ދަނީ ފައިސާ ދޫކުރަމުންނެވެ. މިދިޔަ އަހަރު ވެސް، 24 މިލިއަން ރުފިޔާ ދޫކުރިއެވެ. މި އަހަރު 26.2 މިލިއަން ރުފިޔާ ޕާޓީތަކަށް ދޫކުރަން ވަނީ ނިންމާފައެވެ.

ނަމަވެސް އެ ފައިސާ ހަރަދުކުރާ ގޮތުގެ ތަފްސީލެއް އެ ޕާޓީތަކުން އާންމެއް ނުކުރެއެވެ. ސިޔާސީ ޕާޓީތަކުގެ ދަފްތަރުގައި ހިމެނޭ ނުވަ ޕާޓީގެ ތެރެއިން، އިލެކްޝަންސް ކޮމިޝަނުން ފައިސާ ދޫކުރި ހަތަރު ޕާޓީން ވެސް އެ ފައިސާ ހަރަދު ކުރި ގޮތުގެ ތަފްސީލެއް، އާންމު މެމްބަރުންނަކަށް ހާމައެއް ނުކުރެއެވެ. ޕާޓީތައް ލިބޭ ފައިސާ އާއި އެ ފައިސާތަކަށް ހަދާ ގޮތެއް ޕާޓީތަކުގެ މެމްބަރުން ކިޔައި ދޭން އިސް ނަގާނެ ޕާޓީއެއް ރާއްޖެއަކު އަދި ނެތެވެ.

ދިހަހާހަށް ވުރެ ގިނަ މެމްބަރުން ތިބި ޕާޓީތަކަށް ފައިސާ ދޫކުރަން ފެށީ ޕާޓީތައް ޒިންމާދާރު ކުރުވުމުގެ ގޮތުންނެވެ. ކުދި ޕާޓީތަކަށް މީގެ ކުރިން ދިން ފައިސާއަށް ވީނުވީއެއް ނޭނގުމުންނެވެ. ކިރިޔާ 3،000 މެމްބަރުން ހަމަވި، ޕާޓީތަކަށް މީގެ ކުރިން ދިން ފައިސާ ހެދި ގޮތެއް ނޭނގެއެވެ.

ނަމަވެސް ބޮޑެތި ޕާޓީތަކުގެ ގޮތުގައި ހިމެނޭ 10،000 ވުރެ ގިނަ މެމްބަރުން ހިމެނޭ ޕާޓީތަކުން އެކަމުގައި އަމަލު ކުރާ ގޮތް ވެސް ޒިންމާދާރެއް ނޫނެވެ. ފައިސާގެ ހަރަދު ބަރަދު އެ ޕާޓީތަކުން އާންމެއް ނުކުރެއެވެ. އަދި ފަސް އަހަރުން އެއް ފަހަރު ބާއްވާ ޕާޓީތަކުގެ ކޮންގޮރެސްތަކުގައި ވެސް އެ ތަފްސީލެއް އާންމެއް ނުކުރެއެވެ.

ފަސާދަ އާއި ކޮރަޕްޝަނާއި ހިޔާނާތް ނައްތާލުމަށް، ކެނޑިނޭޅި އަޑު އުފުލަމުންދާ ޕާޓީތަކުން ވެސް އެ ޕާޓީތަކަށް ފައިސާ ލިބޭ ގޮތް އާންމު މެމްބަރުންނަށް ކިޔައެއް ނުދެއެވެ. ނަޒާހަތްތެރި ދައުލަތެއް ބިނާ ކުރުމަށް ކުރާ މަސައްކަތް ފެށޭނީ ޕާޓީތަކުގެ ހިންގުން ހަރުދަނާ ކުރެވިގެންނެވެ. އެތެރޭގެ ޑިމޮކްރަސީ ހަރަދަނާކޮށް، މާލީ ހިސާބު ކިހާބުތައް އާންމުންނަށް ކިޔައިދޭންޖެހެއެވެ.

ރާއްޖޭގެ ސިޔާސީ މަސްރަހުގައި ކުރި ހޯދާ ސިޔާސީ ފަރާތްތަކުގެ ފަހަތުގައި ބޮޑެތި ވިޔަފާރިވެރިން ތިބި ވާހަކައަކީ އާންމު ވާހަކައެވެ. އެ ވިޔަފާރިވެރިންގެ ނުފޫޒާއި ބާރުން ނާޖައިޒު ފައިދާ ހޯދުން ހުއްޓުވޭނީ ވެސް ޕާޓީތަކުގެ ހިސާބު ކިތާބު އާންމު މެމްބަރުންނަށް ކިޔައިދީ ބުނެދީގެންނެވެ. ރައްޔިތުން ދައުލަތަށް ދައްކާ ޓެކްސްއިން، އެ ޕާޓީތައް ހިންގަމުންދާހާ ހިނދަކު، އެ ހިސާބުތައް އާންމު ކުރަންޖެހެއެވެ. ނަޒާހަތްތެރި ދައުލަތެއް ބިނާ ކުރެވޭނީ، އެކަމަށް ވަކާލާތު ކުރާ މީހުން ވެސް ނަޒާހަތްތެރިވެގެންނެވެ. ފަސްބައިގައި ހުރި ކިލަނބު ސާފުކޮށްގެންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަލީ ޔޫސުފް
0%
100%
0%
0%
0%
0%
ކޮމެންޓް