ރައީސް މައުމޫނުގެ މައްޗަށް ފުލުހުން އެ ހިންގަނީ ތަހްގީގެއް ނޫން، އެ ދަނީ މަހަށް؟!
ރައީސް މައުމޫނާ ވަނީ އެކި މައްސަލަަތަކުގައި ސުވާލުކޮށްފައި
ކުރީގެ ރައީސް މައުމޫނު އަބްދުލް ގައްޔޫމް:- އެމަނިކިފާނުގެ މައްޗަށް ހިންގާ ތަހްގީގަށް ގާނޫނީ ބޭފުޅުން ފާޑުވިދާޅުވޭ
ކުރީގެ ރައީސް މައުމޫނު އަބްދުލް ގައްޔޫމް ހައްޔަރުކޮށް ފުލުހުން ހިންގަނީ ތަހްގީގެއް ކަމަށް ބުންޏަސް އެއީ ކުށެއްގެ ތުހްމަތު ކުރެވޭ މީހެއްގެ މައްޗަށް ހިންގާ ތަހްގީގެއް ކަމަށް ބައެއް މީހުން ގަބޫލުކުރެއެވެ. އަދި ތަހްގީގުކުރަނީ ކަމަށް ބުނެ އެ މައްސަލާގައި ފުލުހުން އެދަނީ "މަހަށް" ކަމަށް ވެސް ބުނެއެވެ.
ފުލުހުން ރައީސް މައުމޫނުގެ މައްޗަށް ތަހްގީގު ހިންގަނީ ކަމަށް ބުންޏަސް އެދަނީ "މަހަށް" ކަމަށް ބުނަނީ އެ ތަހްގީގުކުރާ ގޮތަށް ބަލައެވެ. އެންމެ ފުރަތަމަ ރައީސް މައުމޫނު ހައްޔަރުކުރުމަށް ފަހު ތަފާތު އެކި ކުށުގެ ތުހްމަތުތަކުގައި އެބަ ސުވާލުކުރެއެވެ. ހައްޔަރު ކުރެވުނު ސަބަބު ކަމަށް ބުނާ މައްސަލާގައި ސުވާލެއް ނުކޮށް އެއިން ބޭރުން އެކި މައްސަލަތަށް ނަގައިގެން ފުލުހުން ސުވާލު ކުރަނީ ކޮންމެވެސް އެއްމައްސަލައެއްގައި "ބެދޭނެ" ނުވަތަ ދައުވާއެއް ކުރެވޭތޯ ކަމަށް ބެލުމުގެ ފުރުސަތު މާ ބޮޑަށް ވެސް އެބަ އޮތެވެވެ.
މި ގޮތަށް އަމަލުކުރާ ނަމަ ޝަރުއީ ދާއިރާގައި އުޅޭ މީހުން ވެސް އެއީ މަހަށް ދިއުން ކަމަށް ބުނެއެވެ. އެހެން ބުނަނީ މަހަށް ގޮސް އުޅޭ އިރު ވެސް އެއް ފަހަރު އެއްލާ އެންކޮޅުން މަހެއް ނުގަނެއްޖެ ނަމަ އަނެއްކާ ވެސް އެންގަނޑު ބަދަލުކޮށްގެން ވެސް މަހެއް ބޭނޭތޯ މަސައްކަތް ކުރުމުންނެވެ. އަދި އޭރު ގެންގުޅޭ އެމުގެ މައްސަލައެއް އުޅޭ ކަމަށް ބަލައި އެމުގެ ބާވާތް ވެސް ބަދަލުކޮށްގެން ވެސް މަހެއް ބޭނޭތޯ ބަލައެވެ. އަދި ބައެއް ފަހަރު އެފަހަރު ދޯނި އޮންނަ ތަނަކީ އެންމެ ރަނގަޅު ތަނެއް ނޫން ކަމަށް ބަލައި އެހެން ސަރަހައްދަކަށް ގޮސްގެން ވެސް މަހެއް ބޭނޭތޯ ބަލައެވެ.
މިދިޔަ މަހުގެ ފަސް ވަނަ ދުވަހުގެ ރޭގެ ދަންވަރު ރައީސް މައުމޫނު ހައްޔަރުކުރީ ކުއްލި ނުރައްކަލުގެ ހާލަތެއް އިއުލާން ކުރުމަށް ފަހު ކޯޓު އަމުރެއް ވެސް ބޭނުންނުވާ ގޮތަށް ގާނޫނު ސަސްޕެންޑް ކުރުމަށް ފަހުއެވެ. އަދި އޭރު ހައްޔަރުކުރީ ފަނޑިޔާރުންނަށް ރިޝްވަތުދީ، ގާނޫނާ ހިލާފަށް ގާނޫނީ ވެރިކަން ބަދަލުކުރުމަށް މަސައްކަތްކުރިކަމުގެ ތުހްމަތުގައެވެ. ނަމަވެސް އެންމެ ފުރަތަމަ ވެސް ތަހްގީގު ފަށައި އެމަނިކުފާނާ ފުލުހުން ސުވާލުކުރީ ހެކި ފޮރުވަން އުޅުނު ކަމަށް ތުހްމަތުކުރާ މައްސަލައެއްގައެވެ. އެ ތަހްގީގުގައި ރައީސް މައުމޫނު ހުންނެވީ ފުލުހުންނަށް އެއްބާރުލުން ދެއްވާ ގޮތަކަށް ނޫނެވެ. އެހެން ކަމުން ފުލުހުންނަށް އެކަމުގައި މާބޮޑު ކުރިއެރުވުމެއް ލިބުނު ތަނެއް ވެސް ނުފެނުނެވެ.
ދެން އަނެއްކާ ވެސް އެންގަނޑު ބަދަލުކޮށްލާ އުސޫލުން އާ ތުހްމަތެއްގައި ސުވާލު ކުރުމަށް މަސައްކަތް ފެށިއެވެ. އެ ފަހަރު އެންޓި ކޮރަޕްޝަން ކޮމިޝަން މެދުވެރިކޮށެވެ. އެއީ 2007 ވަނަ އަހަރު ނެރުނު ތީމްގޭ އޮޑިޓް ރިޕޯޓަކާ ގުޅޭ ގޮތުންނެވެ. ނަމަވެސް ޖިނާއީ އިޖުރާއަތުގެ ގާނޫނު އައި ފަހުން ވަކި މުއްދަތެއްގެ ތެރޭގައި ދައުވާ ކުރަން ޖެހޭ ކަމަށާއި 2007 ވަނަ އަހަރުގެ ކުރީގެ މައްސަލައެއްގައި މިހާރު ދައުވާ ނުކުރެވޭނެ ކަން އެނގި ހުރެ ވެސް އެ ގޮތުން ވެސް ރައީސް މައުމޫނު ގޮޅިއަކަށް ފެއްތޭތޯ މަސައްކަތްކުރިއެވެ. އެކަން ކަމަށް ރައީސް މައުމޫނު ހުންނެވީ ވަރަށް ހުށިޔާރުވެގެންނެވެ. އެގޮތުން އޭސީސީން ދޫނިދޫއަށް ގޮސް ސުވާލުކުރުމަށްޓަކައި ސުވާލުކުރާ ކޮޓަރިއަށް ވަޑައިގަތުމަށް ދެންނެވުމުން ވެސް އެކަމާ ވެސް ރައީސް މައުމޫނު ދެކޮޅު ހެއްދެވީ ގާނޫނީ ހުއްޖަތްތަކެއް ދައްކަވާފައެވެ. އޭސީސީ އިން ދެ ފަހަރެއްގެ މަތިން އެކަން ކުރަން އުޅެ ވެސް އެކަން ވެސް ނުވިއެވެ.
އަނެއްކާވެސް ފުލުހުން ސުވާލުކުރީ ހެކި ނައްތާލަން މަސައްކަތް ކުރެއްވިކަމުގެ ތުހްމަތުގައެވެ. ދެ ފަހަރު ސުވާލު ކުރުމަށް ފަހު އެންމެ ފަހުން ލިބުނު އެއްޗަކަށް ބަލައި ދައުވާ ކޮށްދޭން އެދުނީމަ ޕްރޮސެކިއުޓާ ޖެނަރަލް އަނބުރާ ފޮނުވާލީ ތަހްގީގު ފުރިހަމަ ނުވާ ކަމަށް ނިންމުމަށްފަހު އެވެ. މަސް ގަންނަ ކުންފުންޏަކުން ފެންވަރު ދަށްވެގެން މަހެއް ރިޖެކްޓްކޮށްލާހެން އަނބުރާ ފޮނުވާލާހެންނެވެ.
އަނެއްކާ ވެސް މާޔޫސްވެ ތިބެ ފުލުހުން ވަނީ ހެކި ނައްތާލުމުގެ ތުހްމަތުގައި ރައީސް މައުމޫނާ ސުވާލު ކޮށްފައެވެ. އެހެން ކަމުން އަނެއްކާ ވެސް އެ އުޅެނީ ހަމަ އެންކޮޅުގައި އަޅައިގަންނާނެ ގޮތެއް ނުވެގެންކަން އެބަ އެނގެއެވެ. ހައްޔަރުކޮށްގެން އެއް މަސްވެގެން ދިޔައިރު ފުލުހުން ރައީސް މައުމޫނާ އެމަނިކުފާނު ހައްޔަރުކުރި ސަބަބާ ގުޅޭ ގޮތުން ސުވާލުކުރީ އެއްފަހަރުއެވެ. އެއަކުން ވެސް މާ ބޮޑު ކުރިއެރުމެއް ލިބޭ ހެނެއް ހިޔެއް ނުވެއެވެ. ކަން މިހެން ހުރި އިރު ފުލުހުންގެ އޮފިސަރަކު މީޑިޔާތަކަށް އަރައި ވަރަށް ހެކިތައް ހުރި ކަމަށް ވިދާޅުވެ ދައްކަވާ ވާހަކަތައް އެންމެ ވައްތަރީ މަހަށް ގޮސް އެއްޗެއް ނުބޭނުނަސް ރަށުގެ ހޮޅު އަށީގައި އިނދެގެން ފޮނިއަނގަތަޅާ މީހަކާއެވެ. އަދި މަސް ނުބޭނުނީމަ ކަނޑުނުބައި ކުރާހެން ބައެއް ފަހަރު ފުލުހުން ވެސް ނުބައި ކުރަނީ ތުހްމަތު ކުރެވޭ މީހާއެވެ. ފުލުހުން މީހެއްގެ މައްޗަށް ތަހްގީގެއް ހިންގަންވާނީ ފޫހިފިލުވާލަން ނައިޓް ފިޝިންނަށް ދާ މީހުން ކަންކުރާ އުސޫލަކުން ނޫނެވެ. މިއީ ޖޯކެއް ނޫނެވެ. މިއީ ބޮޑެތި މައްސަލަތަކެވެ.
