ހުރިހާ ދިމާލަކުން ޖަރީމާ، ގާނޫނު ހަދާ މަޖިލީހުން ވެސް ހިންގަނީ ޖަރީމާ!

ދިވެހިރާއްޖޭގެ ކޮންމެ ދިމާލަކަށް ބަލާލިޔަސް ފެންނަމުންދަނީ ކޮރަޕްޝަނާއި ހިޔާނާތެވެ. ވައްކަމާއި ފޭރުމާއި މީހުން މެރުން ފަދަ ބޮޑެތި ޖަރީމާތައް ހިންގާ މަންޒަރެވެ.

ދައުލަތުގެ ތިންބާރުގެ ތެރޭގައި ޖަރީމާ ހިންގުން މިވަނީ އާއްމުވެފަ އެވެ. ރައްޔިތުންގެ މަޖިލީހުގެ ތެރޭގަ އާއި ސަރުކާރުގެ ތެރޭގައި އަދި އަދުލްއިންސާފުގެ ދާއިރާގައި ވެސް ޖަރީމާ ހިންގުމެވެ.

ރައްޔިތުންގެ މަޖިލީހުން އާވައްތަރެއްގެ ޖަރީމާއެއް ހިންގާފައިވާކަން މިވަނީ ފަޅާއަރާފަ އެވެ.

ރައްޔިތުންގެ މަޖިލީހަށް ބިލެއް ހުށަހެޅެނީ ރައްޔިތުންގެ މަޖިލީހުގެ މެމްބަރެއް މެދުވެރިކޮށެވެ. އެގޮތުން ސަރުކާރުގެ ފަރާތުން ހުށަހަޅާ ބިލްތައް ހުށަހެޅެނީ ސަރުކާރަށް ނިސްބަތް މެމްބަރުން މެދުވެރިކޮށެވެ. ސަރުކާރުން ހުށަހަޅާ ބިލްގައި އޮންނަ އެއްޗެއް އެ ބިލް ހުށަހަޅާ މެމްބަރަށް އޮންނަނީ ގިނަ ފަހަރަށް ނޭނގިފަ އެވެ. ހަމަ އެކަނި އެނގޭވަރު ވަނީ އެބިލްގައިވާ ސަފުހާތަކުގެ އަދަދު އެކަންޏެވެ.

އެވަރު އެނގުނީތީ ވެސް ސަރުކާރުން ޖަރީމާ ހިންގާފައިވާކަން މިވަނީ ފަޅާއަރާފަ އެވެ. ޖިނާއީ އިޖުރާއަތުގެ ގާނޫނަށް އަމަލު ކުރަން ފެށުން މިސަރުކާރުން ތަކުރާރުކޮށް ފަސްކުރަމުންގޮސް ބޮޑު ޖަރީމާއެއް މިވަނީ ހިންގާފަ އެވެ. އެގޮތުން މީގެ ކުރިން އެބިލަށް އަމަލުކުރުން ފަސްކުރަމުން އައިސް މިދިޔަ ޖެނުއަރީ މަހުގެ 2 ވަނަ ދުވަހަށް އަމަލުކުރަން އޮތް އޮތުން ވެސް މިސަރުކާރުން ވަނީ އަންނަ ޖުލައި މަހުގެ 2 ވަނަ ދުވަހަށް ފަސް ކޮށްފައެވެ.

ސަރުކާރުގެ ފަރާތުން ބިލްތަކާއި ގާނޫނުތައް ފަރުމާ ކުރައްވާ ވެރިޔަކީ އެޓާރނީ ޖެނެރަލް އެވެ. އެގޮތުން މިސަރުކާރުން ރައްޔިތުންގެ މަޖިލީހަށް ހުށަހެޅި ގިނަ ބިލްތަކާއި ގާނޫނުތައް ފަރުމާކޮށް ތައްޔާރުކޮށްފައި ވަނީ ވެސް އެޓާރނީ ޖެނެރަލް އޮފީހުންނެވެ.

އެޓާރނީ ޖެނަރަލް އަނިލް އާއި ޕްރޮސެކިއުޓަރ ޖެނަރަލް އާއިޝަތު ބިޝާމް ވެސް ޖިނާއީ އިޖުރާއަތުގެ ގާނޫނާ ގުޅިގެން މީގެ ކުރިން ވިދާޅުވަމުން ގެންދެވީ އެގާނޫނަށް ބައެއް އިސްލާހުތައް ގެންނަން ޖެހޭ ކަމަށެވެ.

ޖިނާއި އިޖުރާއަތުގެ ގާނޫނަށް އަންނަ ޖުލައި މަހުގެ ދެ ވަނަ ދުވަހު އަމަލުކުރަން ޖެހޭއިރު، ކުއްލިއަކަށް މަޖިލީހަށް ސަރުކާރުގެ ފަރާތުން ޖިނާއީ އިޖުރާއަތުގެ ގާނޫނަށް އިސްލާހު ހުށަހަޅައިފިއެވެ.

އެގާނޫނަށް އަމަލުކުރުން ކުޑަތަން ވުމުން ބޮޑަށް ހީކުރީ އެއީ އަނެއްކާ ވެސް އެ ގާނޫނަށް އަމަލުކުރުން ފަސްކުރުމަށް ހުށަހެޅި އިސްލާހެއް ކަމަށެވެ. ނަމަވެސް ކަންތައްވީ އެހެނެއް ނޫނެވެ. އެބިލް ބަލާލައިރު، ކަމަކުދާކަށް ނެތެވެ. ގާތްގަނޑަކަށް ޖިނާއީ އިޖުރާއަތުގެ މުޅި ގާނޫނަށް ބޮޑެތި ބަދަލުތަކެއް އަންނަ ފަދަ ގޮތަކަށް 99 އިސްލާހު ހުށަހަޅާފައިވެއެވެ. ޖިނާއީ އިޖުރާއަތުގެ ގާނޫނުގައި 213 މާއްދާ ވެއެވެ.

ސަރުކާރުގެ ފަރާތުން އެބިލް މަޖިލީހަށް ހުށަހެޅުމާއެކު ވަރަށް އެހެންކަހަލަ ކަންތައްތަކެއް ހިނގާދިޔަކަން ފާގަވެފައިވެއެވެ. އެބިލް މަޖިލީހަށް ހުށަހެޅުއްވީ ސަރުކާރަށް ނިސްބަތްވާ މެމްބަރު އަހުމަދު މުބީން އެވެ. މުބީން އެބިލް މަޖިލީހަށް ހުށަހެޅުމާއެކު އެބިލަށް ބަހުސް ކުރުމަށް މެމްބަރުންނަށް އެކަމަށް އެދިލެއްވުމަށް ރިޔާސަތުގައި އިންނެވި މަޖިލީހުގެ ރައީސް އަބްދުﷲ މަސީހު ވިދާޅުވި އެވެ. ބަހުސް ކުރައްވާނެ މެމްބަރެއް ނެތްކަމަށް ހަމަ ކުއްލިއަކަށް އިއުލާނު ކުރެއްވުމަށްފަހު މުބީންއަށް އެބިލާ ގުޅިގެން ފަހު ބަސް ވިދާޅުވުމަށް ފުރުސަތު ދެެއްވުމުން މުބީން ވެސް ހުންނެވީ "ވާނުވާއެއްގަ" ތެރޭގައެވެ. މުބީން ވިދާޅުވީ އެބިލު މަޖިލީހުގެ މެމްބަރުން ލިބިލައްވާފައިވާނެ ކަމަށާއި އެހެންކަމުން އެބިލް މެމްބަރުން ވިދާޅުވާނެ ކަމަށެވެ.

މީގެ ކުރިން ޖިނާއީ އިޖުރާއަތުގެ ބިލްތައް ފަދަ މުހިއްމު ބިލެއް މަޖިލީހަށް ހުށަހެޅިއްޖެ ނަމަ ގިނަ މެމްބަރު އެބިލާ ގުޅޭގޮތުން ބަހުސް ބަހުސް ކުރެއެވެ.

ދެން މަޖިލީހުން ފެނިގެންދިޔައީ ކުރާނެ އިތުރުކަމެއް ނެތުމުން މަޖިލިސް މެދުކަނޑާލިތަނެވެ. މަޖިލިސް މެދުކަނޑާލުމާއެކު ސަރުކާރަށް ނިސްބަތް މެމްބަރުންގެ މެދުގައި ދެބަސްވުންތައް އުފެދި ބޮޑު ޒުވާބުގަނޑެއް ހިނގާ ސަރުކާރުގެ ދެ މިނިސްޓަރުން ކަމަށްވާ އަދި އެބިލް ފަރުމާ ކުރެއްވި އެޓާރނީ ޖެނެރަލް އަނިލް އާއި ޓޫރިޒަމް މިނިސްޓަރު މޫސާ ޒަމީރު މަޖިލީހުގެ އިދާރާއަށް ވަޑައިގެން މަޝްރަހް ފިނުކުމަށް މަސައްކަތް ކުރައްވަން ފެއްޓުމާއެކު ނަތީޖާއަކަށް ވެގެންދިއައީ އެބިލް މަޖިލީހުން ނެގުމެވެ.

ސަރުކާރަށް ނިސްބަތްވާ މެމްބަރުންނާ ހަވާލާދީ އެނގިފައިވަނީ އެބިލަކީ މުބީން ސޮއިކޮށް މަޖިލީހުގެ އިދާރާއަށް ހުށަހެޅުއްވި ބިލެއް ނޫން ކަމަށެވެ. މުބީން މަޖިލީހަށް ހުށަހެޅުއްވި ބިލްގައި 17 ވަރަކަށް ގަނޑު އޮތް ނަމަވެސް މަޖިލީހުގެ ތަޅުމަށް ހުށަހެޅި ބިލްގައި އެއަށްވުރެ މާގިނަ މާއްދާތަކާ އެކު 37 ވަރަކަށް ގަނޑު ވާކަމަށް އެނގިފައިވެއެވެ.

މިއީ ހަމައެކަނި އެފަދަ ކަމެއް ފަޅާއެރި ފުރަތަމަ ފަހަރެވެ. މީގެ ކުރިން އެކަހަލަ ކިތައް ބިލް މަޖިލީހަށް ހުހަޅާ އަދި ފާސްކޮށްފައިވާނެބާއޭ ހިތައް އަރައެވެ. އަދި މަޖިލީހުން ފާސްކުރާ ބިލްތައް ރައީސުލްޖުމްހޫރިއްޔާ ތަސްދީގުކުރައްވާއިރު ކުރައްވަނީ ހަމަ މަޖިލީހުން ފާސްކުރި ބިލް ހަމަ އެގޮތަށް ކަމާ މެދު މިހާރު މިވަނީ ސުވާލު އުފެދިފަ އެވެ.