ސަރުކާރަށް 6 މަސް: ގިނަ ކަންތައްތަކެއް ހާސިލްކުރެވުނުއިރު، ބޭނުންވި ބައެއް ބަދަލުތަކެއް ނުފެނުނު!

ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފުރަތަމަ ހަ މަސް ދުވަހުގެ މަސައްކަތް އެ ވަނީ ނިންމާލާފަ އެވެ. ބައެއް ފާޑުކިޔުންތައް އަމާޒުވި ނަމަވެސް، ރައީސް ސޯލިހަށް ވެރިކަން ކުރެއްވުމަށް ލިބިވަޑައިގެންނެވި ފުރަތަމަ ހަ މަސް ދުވަހަކީ، ސިޔާސީ ކޯޅުންތައް މަދު، އަމާންކަމާއެކުގައި ވެރިކަން ކުރެއްވުމަށް ލިބިވަޑައިގެންނެވި ހަ މަސް ދުވަހެވެ. ހަ މަސް ދުވަހުގެ ތެރޭގައި އިދިކޮޅު އައި ޕްރެޝަރަށް ވުރެ ބޮޑީ، ސަރުކާރު ހިންގާ ކޯލިޝަންގެ ތެރެއިން އެމަނިކުފާނާއި ކުރިމަތިލައްވަން ޖެހިވަޑައިގެންނެވި ޕްރެޝަރުތަކެވެ.

ވެރިކަމުގެ ފުރަތަމަ ހަ މަސް ދުވަހުގެ މަސައްކަތްތަކުގެ ތެރެއިން، ރައީސް ސޯލިހްގެ ސަރުކާރު ވަނީ ކާމިޔަބީތަކެއް ވެސް ހޯދަވާފަ އެވެ. ހަމައެހެންމެ، ރައްޔިތުން އުއްމީދުކުރި ބައެއް ބޮޑެތި ބަދަލުތައް ވެސް ވެރިކަމުގެ ފުރަތަމަ ހަ މަސް ދުވަހުގެ ތެރޭގައި ފެނިގެން ގޮސްފައެއް ނުވެއޭ ބުނެވިދާނެ އެވެ. ތަރައްޤީ ބޮޑެތި ޕްރޮޖެކްޓްތައް ވެސް އެ ހަ މަސް ދުވަހުގެ ތެރޭގައި ކުރިއަށްގެންދެވިފައެއް ނުވެ އެވެ.

ފުރަތަމަ އޮތީ ވެރިކަމުގެ ފުރަތަމަ 6 މަސް ދުވަހުގެ ތެރޭގަައި ފެނިގެންދިޔަ ބޮޑެތި ބަދަލުތަަކުގެ ވާހަކަ އެވެ. ރައީސް ސޯލިހްގެ ސަރުކާރަކީ ވެރިކަމުގެ ފުރަތަމަ ހަ މަހުގެ ތެރޭގައި އެންމެ ބޮޑު ކާމިޔާބީއެއް ހޯދި ސަރުކާރޭ ވެސް ބުނެވިދާނެ އެވެ. ވެރިކަމުގެ ފުރަތަމަ 100 ދުވަހުގެ ވައުދުތަކުގެ ތެރެއިން 83 އިންްސައްތަ ހާސިލްކޮށްފައިވެއެވެ. އިޖްތިމައީ ބޮޑެތި ބަދަލުތަކެއް ގެނެސްފައިވެއެވެ.

ފުރަތަމަ ޑްގްރީއަށް ހިލޭ ކިޔެވުމުގެ ފުރުސަތު ވަނީ ހުޅުވާލާފަ އެވެ. ކަރަންޓުގެ އަގު ހެޔޮކޮށް، އެތެރޭގެ އުދުހުންތަކުގެ އަގު ހެޔޮކޮށްފައި ވެއެވެ. ކާޑުގެ ބާވަތްތަކުގެ އަގު އެއް ހަމަކޮށް، އެސްއެމްއީ ބޭންކުގެ ހިދުމަތްދޭން ވަނީ ފަށާފަ އެވެ. ވިހެއުމާއި ގުޅިގެން ދޭ ޗުއްޓީގެ މުއްދަތު 6 މަސް ދުވަހަށް އިތުރުކޮށް، ސުކޫލް ދަރިވަރުންނަށް ހެނދުނުގެ ނާސްތާ ދޭން ވަނީ ފަށާފަ އެވެ. މެންޓަލް ހެލްތު ފެސިލިޓީއެއް އުފައްދާ، ރައްޔިތުންނަށް ފަސޭހައިން ހިދުމަތްތައް ލިބޭނެ ނިޒާމްތައް ވަނީ ޤާއިމްކޮށްފަ އެވެ. ކައުންސިލްތަކަށް ބާރުވެރިކަންދީ، ރައްޔިތުން ބާރުވެރިކުރުވާފަ އެވެ. މިނިވަންކަމާ އެކު ހިޔާލު ފާޅުކުުރުމުގެ މިނިވަންކަން ވަނީ ކަށަވަރުކޮށްދީފަ އެވެ. އެހެން ގޮތަކަށް ބުނާ ނަމަ ވެރިކަމުގެ ފުރަތަމަ ހަ މަސް ދުވަސް ފެނިގެންގޮސްފައި ވަނީ ހައްޤުތައް ކަށަވަރުކޮށްދީ، އުފާވެރި ދިރިއުޅުމަކަށް މަގުތައް ކޮށައިދިން ހަ މަސް ދުވަހަށެވެ.

ދެން އޮތީ ވެރިކަމުގެ ފުރަތަމަ ހަ މަސް ދުވަހުގެ ތެރޭގައި ފެންނާނެ ކަމަށް ރައްޔިތުން އުއްމީދުކުރި ބަދަލުތަކުގެ ވާހަކަ އެވެ. ރައީސް ސޯލިހްގެ ސަރުކާރާ އެކު ރައްޔިތުން ބޮޑެތި ބަދަލުތަކަކަށް އުއްމީދުކުރި އެވެ. މަރުތަކާއި، ގެއްލުވާލާފައިވާ މީހުންެގެ މައްސަލަތައް ބެލި، ފިޔަވަޅު އޭޅޭ މަންޒަރު ފެންނާނެ ކަމަށް ރައްޔިތުން ތިބީ އުއްމީދުކޮށްގެންނެވެ. ރައްޔިތުން ހަޒާނާ އިން ފާޅުގައި ވައްކަންކުރި މީހުންނާއި، ނުހައްޤު މުސްހިނދިކަމާ އެކު ބޮޑެތި މިލިއަނަރުންނަށްވީ މީހުންގެ މައްސަލަތައް ބަލާ، އެމީހުންނަށް ހައްޤު އަދަބު ލިބޭނެ ކަމަށް ވެސް ރައްޔިތުން އުއްމީދުކުރި އެވެ.

އެއަށް ވުރެ ބޮޑުކަމެއްގެ ގޮތުގައި މިނިވަން މުއައްސަސާތަކުގައި ތިބެ ރައްޔިތުންނަށް އަނިޔާވެރިވި މީހުން އެ މަޤާމުތަކުން ބޭރުކުރެވޭ މެންޒަރު ފެންނަނާނެ ކަމަށް ރައްޔިތުން ތިބީ ވަރަށް ބޮޑަށް ގަބޫލުކޮށްގެންނެވެ. އެކަމަށް 18 ވަނަ ރައްޔިތުންގެ މަޖިލީހުގެ މެޖޯރިޓީ ވެސް އޮތީ ސަރުކާރުގަ އެވެ. ނަމަވެސް އެކަންކަން ސަރުކާރަށް ހާސިލްކުރެވިފައިނުވުމަކީ، ރައްޔިތުން މާާޔޫސްކަން އިތުރުވި ކަންކަމެވެ.

އެކަމުގައި ސަރުކާރުން ދައްކާ ބަހަނާ ވެސް މުޅިން ގޯހެކޭ ނުބުނެވޭނެ އެވެ. މަޖިލީހުގެ މެޖޯރިޓީ އޮތް ނަމަވެސް މަހުޖަނާއި، އޭނާގެ ބައިވެރިން ތިބީ ރައްޔިތުން ބޭނުންވާ ގޮތަށް ދީލާލާކަށެއް ނޫނެވެ. ވެރިކަމުގެ ފުރަތަމަ ހަ މަސް ދުވަހުގެ ތެރޭގައި ސަރުކާރަށް ކުރިމަތިވި އެންމެ ބޮޑު ދުއްތުރާއަކީ ވެސް އެވެ. ރައްޔިތުން އުއްމީދުކުރި ބޮޑެތި ބަދަލުތައް ނުގެނެސްދެވުނު ސަބަބަކީ ވެސް މަޖިލީހުގެ ތެރެއިން ކުރިމަތިވި ގޮންޖެހުންތަކެވެ. ސަރުކާރުން ހުށަހެޅި ބިލްތައް ފާސްނުކޮށްދީ، މަހުޖަނު މަޖިލީހުގައި ޖެއްސެވި ސަކަރާތުގެ ސަބަބުން އެ ވައުދުތައް އޮތީ ހާސިލްނުކުރެވި އެވެ.

ރައްޔިތުން މިއަދު އުއްމީދުކޮށްގެން ތިބީ 19 ވަނަ ރައްޔިތުންގެ މަޖިލީހާ އެކު އެކަމަށް ނިމުމެއް އައިސް، ލަހެއް ނެތި އެ ވައުދުތައް ފުއްދޭނެ ކަމަށެވެ.

ދެންއޮތީ ފުރަތަމަ ހަ މަސް ދުވަހުގެ ތެރޭގައި ސަރުކާރު އެންމެ ބޮޑަށް ފެއިލްވި ދާއިރާ އެވެ. ތަރައްޤީގެ ބޮޑެތި މަސައްކަތްތައް ނުފެށުމެވެ. ނިމުނު ސަރުކާރުން ފެށި ބައެއް މަސައްކަތުގެ ސްޕީޑް މަޑުޖެހި، މަސައްކަތްތައް ލަސްވުމެވެ.

ރައްޔިތުންގެ އުއްމީދުތައް މިއަދު ހުރި ހިސާބަށް ބަލާއިރު، ނަރުދަމާ ނިޒާމެއްގެ މަސައްކަތް ފެށުމަކުންނެއް، ރަށެއްގެ ބިން ހިއްކުމަކުންނެއް ރައްޔިތުން ހިތްހަމައެއް ނުޖެހެ އެވެ. ރައްޔިތުން ބޭނުންވަނީ ތަރައްގީގެ ބޮޑެތި މަޝްރޫތަކުގެ މަސައްކަތްތަށް ކުރިއަށްދިއުމަށެވެ. ހައުސިން ޕްރޮޖެކްޓްތަކާ އެކު ބޯހިޔާވެހިކަމުގެ މައްސަލައަށް ހައްލެއް ލިބުމަށެވެ. އެއާ ޕޯޓްތައް އެޅި ދަތުރުފަތުރު ކުރުމަށް ފަސޭހަތަކެއް ލިބުމަށެވެ. ނަމަވެސް ސަރުކާރަށް ނިމުނު ހަ މަސް ދުވަހުގެ ތެރޭގައި އެފަދަ މަޝްރޫއެއްގެ މަސައްކަތްތައް ފަށައިގަނެވިފައިނުވާއިރު، އެއްބަސްވުމެއްގައި ސޮއިކުރެވިފައެއް ވެސް ނުވެ އެވެ.

ކުރިއަށްދަނީ ނިމުނު ސަރުކާރުން ފެށި ހައުސިން ޕްރޮޖެކްޓްތަކެވެ. އަދި މަސައްކަތަކެއް ފެށި، ބޯހިޔާވެހިކަމުގެ މައްސަލައަށް ހައްލެއް ގެނައުމުގެ މަސައްކަތް ފެށިފައެއް ނުވެއެވެ.

ފުރަތަމަ ހަ މަސް ދުވަހުގެ ތެރޭގައި ސަރުކާރުން ހޯދި ބޮޑު ކާމިޔާބީއާއެކު، ކުރަންޖެހޭ މަސައްކަތް ވެސް ގިނަ ވެފައި، ބުރަ ބޮޑެވެ. 19 ވަނަ ރައްޔިތުން މަޖިލީހުގެ ފުރިހަމަ މެޖޯރިޓީވެސް ސަރުކާރަށް ދިނީ އެ ސަބަބާއި ހުރެ އެވެ. މިއީ ސަރުކާރުން ނަތީޖާ ދައްކަންވީ ވަގުތުއެވެ.