ސިޔާސީ ޕާޓީތަކުގެ ގާނޫނަށް އިސްލާހު ގެނައުމަށް ބާއްވާ މަޝްވަރާ ހޯމަ ދުވަހު ފަށަނީ
18 މެއި 2019 | ހޮނިހިރު 07:37މަޝްވަރާތަކުގައި ސިޔާސީ ޕާޓީތަކާއި ގުޅުން ހުރި މުއައްސަސާތަކުން ބައިވެރި ވާނެ
އީސީގެ ބައެއް މެމްބަރުން
ސިޔާސީ ޕާޓީތަކުގެ ގާނޫނުގައާއި އިންތިޚާބާއި ބެހޭ ގާނޫނުގައި ފުށުއެރުންތަކެއް ހުރުމުން ސިޔާސީޕާޓީތަކުގެ ގާނޫނު އިސްލާހު ކުރުމަށް ބާއްވާ މަޝްވަރާ އަންނަ ހޯމަ ދުވަހު ފަށާނެ ކަމަށް އިލެކްޝަންސް ކަމިޝަން(އީސީ)އިން ބުނެފިއެވެ.
އީސީއިން ބުނީ ސިޔާސީ ޕާޓީތަކުގެ ގާނޫނާއި އިންތިޚާބުތަކާއި ބޭހޭ ގާނޫނަށް ހުށައަޅާ އިސްލާހުތައް ގެނައުމަށް ފަށާ މަޝްވަރާތަކުގައި ސިޔާސީ ޕާޓީތަކުގެ އިތުރުން އެކަމާއި ގުޅުން ހުރި މުއައްސަސާތަކުން ބައިވެރި ވާނެކަމަށެވެ.
އީސީ އިން މިހާރު ވަނީ ސިޔާސީ ޕާޓީތަކުގެ ގާނޫނަށް އިސްލާހު ގެންނަ ޑްރާފްޓެއް އެކުލަވާލާފައެވެ.
ދެ ގާނޫނަށް އިސްލާހު ގެނައުމަށް އީސީއިން މަޝްވަރާކުރަން ތައްޔާރު ވަމުންދާއިރު ސިޔާސީ ޕާޓީތަކަށް ފައިސާ ދޫކުރުމުގައި ވެސް ގާނޫނު ފުށު އަރާ ކަންތައްތައް އެބަހުއްޓެވެ. އޭގެ ތެރޭގައި ޕާޓީއަށް ފައިސާ ދޫކުރުމަށް ކަނޑައަޅާފައިވަނީ މީލާދީ އަހަރެއް ފެށިގެން 90 ދުވަހުގެ ތެރޭގައެވެ. އަދި ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް އެޕާޓީއަކުން އީސީއަށް ހުށައެޅުމަށް ވެސް ކަނޑައަޅާފައިވަނީ މީލާދީ އަހަރެއް ފެށިގެން 90 ދުވަހުގެ ތެރޭގައެވެ. ހަމަ އެގޮތަށް ޕާޓީތަކަށް ފައިސާ ދޫކުރެވޭނީ އަދި ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް ހުށައެޅުމަށް ފަހު ކަމަށް އެ ގާނޫނުގައި ވަނީ ބުނެފައެވެ.
ސިޔާސީ ދާއިރާއަށް އަންހެނުން ބާރުވެރި ކުރުވުމަށްޓަކައި ކައުންސިލްތަކާ ލީޑަރޝިޕުގެ މަދުވެގެން 30 ޕަސެންޓް ކަނބަލުންނަށް ޚާއްސަ ކުރަންޖެހޭ ކަމަށް އިލެކްޝަންސް ކަމިޝަން(އީސީ)ގެ މެމްބަރު އަހުމަދު އަކްރަމް ވަނީ ވިދާޅުވެފައެވެ. އެކަމިޝަނުން އިސްނަގައިގެން އިންތިޚާބުތަކާއި ބެހޭ ގާނޫނާއި ސިޔާސީ ޕާޓީތަކުގެ ގާނޫނަށް ގެންނަ ބަދަލުތަކުގެ ތެރޭގައި ކަނބަލުންނަށް ކައުންސިލްތަކާއި ލީޑަރޝިޕުގެ 30 ޕަސެންޓް ދިނުމަށް ހުށައަޅުއްވާނެ ކަމަށް ވެސް އަކްރަމް ވިދާޅުވިއެވެ. އަންހެނުންނަށް ކައުންސިލްތަކާއި ލީޑަރޝިޕުން 30 ޕަސެންޓް ދިނުމަށް އެ ދެ ގާނޫނަށް އިސްލާހް ހުށައަޅުއްވާނެ ކަމަށް އަކްރަމް ވިދާޅުވެފައިވާއިރު ކައުންސިލްތަކަށް އަންހެނުން އިންތިހާބު ކުރުމަށް ލާޒިމުވާ ގޮތަށް، ކައުންސިލްގެ 33 ޕަސެންޓަކީ އިންތިހާބު ކުރާ އަންހެނުންނަށް ހެދުމަށް އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން ވެސް ވަނީ އިސްލާހު ހުށައަޅާފައެވެ.
ސިޔާސީ ޕާޓީތަކުގެ ގާނޫނަށް ގެންނަ އިސްލާހުތަކުގެ ތެރޭގައި އޮޑިޓް ރިޕޯޓްތައް އޮޑިޓް އޮފީހަށް ފޮނުވޭނެ ގޮތަށް ބަދަލު ކުރުން ވެސް ހޯމަ ދުވަހު ފަށާ މަޝްވަރާތަކުގައި މަޝްވަރާ ކުރާނެ ކަމަށް އީސީއިން ބުނެއެވެ.
މައުލޫމާތު ލިބިފައިވާ ގޮތުގައި އީސީއިން ތައްޔާރު ކުރި ޑްރާފްޓުގައި ޕާޓީތަކަށް ފައިސާ ދޭނެ ގޮތަށް ވެސް ބަދަލުތައް ގެންނަން ވަނީ ހަމަޖެހިފައެވެ.
