ރަޝްފޯޑްއަށް ބާސާއިން ފާރަލަނީ

މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް މާކަސް ރަޝްފޯޑްއަށް ބާސެލޯނާއިން ފާރަލަމުން އަންނަ ކަމަށް ރިޕޯޓުތައް ބުނެފިއެވެ.

މުންޑޯ ޑިޕޯޓިވޯއިން ބުނީ، ކުރިއަށް އޮތް ސީޒަނަށް ތައްޔާރުވުމުގެ ގޮތުން ބާސާއިން ރަޝްފޯޑް ހޯދުމަށް މަސައްކަތް ކުރަމުން އަންނަ ކަމަށާއި، އެ ކްލަބުން ކުރިޔަށް އޮތް ސީޒަނަށް ޓާގެޓްކުރާ ކުޅުންތެރިންގެ ތެރޭގައި ރަޝްފޯޑް ވެސް ހިމެނޭ ކަމަށެވެ.

މި ސީޒަނަށް ފަހު ރަޝްފޯޑްގެ އެއްބަސްވުން ހަމަވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. ނަމަވެސް ޔުނައިޓެޑުގެ އާ އެއްބަސްވުމާއެކު އޭނާ ކްލަބުގައި މަޑުކުރާނެ ކަމަށް ވަނީ ބެލެވިފައެވެ.

ރިޕޯޓްތައް ބުނާ ގޮތުން އާ އެއްބަސްވުމާއެކު އުމުރުން 21 އަހަރުގެ ރަޝްފޯޑަށް މިހާރު ހަފްތާއަކު ލިބެމުން އަންނަ 80،000 ޕައުންޑުގެ ބަދަލުގައި 300،000 ޕައުންޑަށް ބަދަލުވާނެއެވެ. އެއީ ކުރީގެ މުސާރައަށް ވުރެ ތިން ގުނަ ބޮޑު އަދަދެކެވެ.

ޔުނައިޓެޑުގެ ފުރަތަމަ 11 އިން ޖާގަ ލިބުން ކުރިން ދަތިވެފައިވާ ރަޝްފޯޑަށް އާ ކޯޗު ސޮލްޝެއާ ޓީމާ ހަވާލުވި ފަހުން މިހާރު ފުރަތަމަ 11އިން ފުރުސަތު ލިބުން ވަނީ ގިނަވެފައެވެ.

މެންޗެސްޓާ ޔުނައިޓެޑުން 2015 ވަނަ އަހަރުގެ ސީޒަނުގައި ސީނިއާ ކެރިޔަރު ފެށި ރަޝްފޯޑް ވަނީ ޔުނައިޓެޑަށް ކުޅުނު 162 މެޗުގައި 45 ލަނޑު ކާމިޔާބުކޮށްފައެވެ.

ރަޝްފޯޑް ވަނީ ޔުނައިޓެޑާ އެކު އެފްއޭ ކަޕް، ލީގް ކަޕް، އެފްއޭ ކޮމިއުނިޓީ ޝިލްޑް އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ. އިންގްލޭންޑް ގައުމީ ޓީމާ އެކު ނިމިގެންދިޔަ ފީފާ ވޯލްޑް ކަޕްގެ ހަތަރު ވަނަ ހޯދި ރަޝްފޯޑް ވަނީ އެ ޓީމަށް ކުޅުނު 31 މެޗުގައި ހަ ލަނޑު ކާމިޔާބުކޮށްފައެވެ.