ސްޕެނިޝް ލަލީގާގައި މި ސީޒަނުގައި ކުޅުނު އެއްވެސް މެޗަކުން ބަލިނުވުމުގެ ރެކޯޑު ބާސެލޯނާއިން ދަމަހައްޓައިފިއެވެ.

ބާސާއިން މި ރެކޯޑު ދެމެހެއްޓީ ރަށުން ބޭރުގައި ވިލަރެއާލްއާ ދެކޮޅަށް ކުޅުނު އުނދަގޫ މެޗު 2-0 ގެ ނަތީޖާއަކުން ކާމިޔާބު ކޮށްގެންނެވެ. މި މެޗުގައި ބާސާގެ ފަރާތުން ރަނގަޅު ކުޅުމެއް ފެނިގެންދިޔައިރު އެ ޓީމުން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ހުސް ފުރުސަތުތަކެއް ތަނަވަސްކޮށްފައެވެ. ވިލަރެއާލް ވެސް ވަނީ ކައުންޓާގައި ބާސާގެ ގޯލަށް ނުރައްކާކޮށް ލަނޑު ޖެހުމަށް މަސައްކަތް ކޮށްފައެވެ.

މި މެޗުގެ ފުރަތަމަ ހާފުގައި ލަނޑެއް ފެނިގެންގޮސްފައި ނުވާއިރު މި ހާފުގައި ލަނޑު ޖެހުމަށް އެންމެ ރަނގަޅު ފުރުސަތު ލިބިފައިވަނީ ބާސާގެ ޑިފެންޑަރު ޖެރާޑް ޕީކޭއަށެވެ. އެގޮތުން މެޗުގެ ހަތަރު ވަނަ މިނެޓުގައި ބޮލުން އޭނާ ފޮނުވާލި ހަމަލާ އަމާޒުވީ ވިލަރެއާލްގެ ގޯލުގެ ހުރަސް ދަނޑިއަށެވެ. މި ހާފުގައި ދެ ޓީމުގެ ކީޕަރުންގެ ފަރާތުން ވަނީ ރަނގަޅު ސޭވްތަކެއް ފެނިގެން ގޮސްފައެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ވަނީ ފޯރިގަދަ ކުޅުމެއް ފެނިގެން ގޮސްފައެވެ. މި ހާފުގައި ވިލަރެއާލްއަށް އިތުރު ދަތިތަކަކާއި ކުރިމަތިވީ އެ ޓީމުގެ ޑެނިއެލް ރާބާއަށް މެޗުގެ 60 ވަނަ މިނެޓުގައި ސީދާ ރަތް ކާޑު ދައްކައި ދަނޑުން ފޮނުވާލުމާއި ވިދިގެންނެވެ. އޭނާ ދަނޑުން ފޮނުވާލީ ބާސާގެ ސާޖިއޯ ބުސްކެޓްސްގެ ފަޔަށް އަމާޒުކޮށް ކުރި ނުރައްކާތެރި ފައުލްއަކާއި ގުޅިގެންނެވެ.

މި ރަތް ކާޑާއެކު މެޗު ބާސާގެ ކޮޅަށް އެނބުރިގެން ދިޔައިރު ވިލަރެއާލްއިން ވަނީ ފަހަތަށް ޖެހި ޑިފެންސްކުރަން މަސައްކަތް ކޮށްފައެވެ. އެހެން ނަމަވެސް ބާސާގެ ފޯވާޑް ލައިނުން ވަނީ މެޗުގެ ނަތީޖާ އެ ޓީމުގެ ކޮޅަށް އަނބުރާލާފައެވެ. އެގޮތުން މެޗުގެ 72 ވަނަ މިނެޓުގައި ޕަކޯ އަލްކޭސާ ތަނަވަސްކޮށްދިން ފުރުސަތަކުން ލުއިސް ސުއަރޭޒް ބާސާއަށް ލީޑު ނަގައި ދިނެވެ. އަދި އޭގެ ފަސް މިނެޓު ފަހުން ލިއޮނެލް މެސީ ވަނީ ބާސާއަސް ލަނޑެއް ޖަހައިދީ މި މެޗުން އެ ޓީމަށް ތިން ޕޮއިންޓް ކަށަވަރު ކޮށްދީފައެވެ.

ލަލީގާގައި އެޓްލެޓިކޯ މެޑްރިޑް ވަނީ 1-0 ގެ ނަތީޖާއަކުން ރެއާލް ބެޓިސް ބަލިކޮށްފައެވެ. މި މެޗުގައި އެޓްލެޓިކޯއިން ޖެހި ހަމައެކަނި ލަނޑު އެ ޓީމަށް ޖަހައިދިނީ ސްޕެއިންގެ ހުނަރުވެރި މިޑްފީލްޑަރު ސައުލް ނިގުއޭޒްއެވެ.

ލަލީގާގެ ޕޮއިންޓް ތާވަލަށް ބަލާލާއިރު އެއްވަނައިގައި 39 ޕޮއިންޓާއެކު ބާސާ އޮތްއިރު ދެވަނައިގައި 34 ޕޮއިންޓާއެކު އޮތީ ވެލެންސިއާއެވެ. ތިންވަނައިގައި 33 ޕޮއިންޓާއެކު އެޓްލެޓިކޯ އޮތްއިރު ހަތަރު ވަނައިގައި 31 ޕޮއިންޓާއެކު އޮތީ ރެއާލް މެޑްރިޑްއެވެ.