ލަލީގާގެ ފުރަތަމަ މެޗުގައި އެއް މިނެޓުގެ ސުކޫތެއް ގެނައުމަށް ބާސާއިން ނިންމައިފި

ސްޕެއިންގެ ބާސެލޯނާގައި ދެވުނު ހަމަލާއާ ގުޅިގެން ސްޕެނިޝް ލަލީގާގައި އެފްސީ ބާސެލޯނާއިން ކުޅޭ ފުރަތަމަ މެޗުގައި ސުކޫތެއް ގެނައުމަށް އެ ކްލަބުން ނިންމައިފިއެވެ.

ބުރާސްފަތި ދުވަހު ބާސެލޯނާގެ މަޝްހޫރު ލަސް ރަމްބަލްސް ސަރަހައްދުގައި ވޭނެއް ބާރަށް ގޮސް މީހުންގެ ގައިގައި ޖެއްސުމުން 13 މީހަކު މަރުވެ އެތައް ބަޔަކު ވަނީ ޒަހަމްވެފައެވެ.

މި ހަމަލާއާ ގުޅިގެން ބާސާގެ ރަސްމީ ވެބްސައިޓުގައި އާންމުކޮށްފައިވާ ބަޔާނެއްގައި އެ ކްލަބުން ވަނީ މިހަމަލާ ކުށްވެރިކޮށްފައެވެ. އަދި މި ހަމަލާގައި މަރުވި އަދި އަނިޔާވި މީހުންގެ އާއިލާތަކުގެ ހިތާމައިގައި އެ ކްލަބުން ބައިވެރިވާ ކަމަށް ބުނެ ތަޢުޒިޔާގެ މެސެޖެއް ވެބްސައިޓުގައި އާންމުކޮށްފައި ވެއެވެ.

އޭގެ އިތުރުން ބާސާގެ ހުރިހާ ފުޓުބޯޅައާ ގުޅިފައިވާ އިމާރާތްތަކާއި ސްޓޭޑިއަމްތަކުގެ ދިދަތައް ބައި ދަނޑިއަށް ތިރިކުރެވިގެން ދާނެ ކަމަށާއި މިހަމާލާގައި މަރުވި މީހުންގެ ހަދާނުގައި ބާސާގެ ޓީމުތަކުން މި ފެށޭ ހަފްތާގައި ކުޅޭ މެޗުތަކުގައި ކަޅު ބޭންޑް ބޭނުންކުރުމަށް ވަނީ ނިންމާފައެވެ.

ކޭމްޕްނޯގައި ސީޒަން ހުޅުވުމަށް ރެއާލް ބެޓިސްއާ ދެކޮޅަށް ކުޅޭ ފުރަތަމަ މެޗުގެ ކުރިން އެއް މިނުޓުގެ ސުކޫތެއް ގެނައުމަށް ވެސް އެ ކްލަބުން ވަނީ ނިންމާފައެވެ.

ބާސާގެ ކުޅުންތެރިންނާއި އެހެން ޓީމުތަކުގެ ކުޅުންތެރިން ވެސް ދަނީ މި ހަމަލާ ކުށްވެރިކޮށް މިފަދަ ހަމަލާތަށް ހުއްޓުވުމަށް ގޮވާލަމުންނެވެ. އެގޮތުން ފޯވާޑް ލިއޮނެލް މެސީ އާއި ލުއިސް ސުއަރޭޒަގެ އިތުރުން ޑިފެންޑާ ޖެރާޑް ޕީކޭވެސްވަނީ މި ހަމަލާ ކުއްވެރިކޮށްފައެވެ. މީގެ އިތުރުން ސޯޝަލް މީޑިއާ މެދުވެރިކޮށް ވާދަވެރި ރެއާލްގެ ކެޕްޓަން ސާޖިއޯ ރާމޯސް އާއި އެ ޓީމުގެ ފޯވާޑް ކްރިސްޓިއާނޯ ރޮނާލްޑޯ ވެސް ވަނީ މިފަދަ ހަމަލާތައް ހުއްޓާލުމަށް ގޮވާލާފައެވެ.