ޔުވެންޓަސްއަށް ބޭނުންވަނީ އިސްކޯފަދަ ކުޅުންތެރިޔެއް

ޔުވެންޓަސްއަށް ބޭނުންވަނީ ރެއާލް މެޑްރިޑަށް ކުޅެމުން އަންނަ ސްޕެއިންގެ މިޑްފިލްޑަރ އިސްކޯފަދަ ކުޅުންތެރިޔެއް ކަމަށް ޔުވެންޓަސްއަށް ކުރިން ކުޅުނު އިޓަލީގެ މިޑްފިލްޑަރ ޕިރްލޯ ބުނެފިއެވެ.

ސްކައި އިޓަލިއާއަށް ދިން އިންޓަވިއުއެއްގައި ޕިރްލޯ ބުނީ، ޔުއެފާ ޗެމްޕިއަންސް ލީގު ޔުވެންޓަސްއަށް ހޯދޭނެ ކަމަށާއި، ޔުއެވެންޓަސް މިހާރު އޮތީ އެހެން ލެވެލްއެއްގައި ކަމަށެވެ.

އެގޮތުން ޕިރްލޯ ބުނީ، ޔުވެންޓަސްއަށް އިސްކޯފަދަ މިޑްފިލްޑަރެއް ބޭނުންވާ ކަމަށާއި، މިޑްފިލްޑަރުންނާ ނުލާ ޔުއެފާ ޗެމްޕިއަންސް ލީގު ނުހޯދޭނެ ކަމަށެވެ.

މީގެއިތުރުން އޭނާ ބުނީ، ކްރިސްޓިއާނޯ ރޮނާލްޑޯ ގެނައުމާ އެކު ޔުވެންޓަސް މިހާރު ވަރަށް ތަފާތު ކަމަށާއި، ނަމަވެސް އޭނާއަށް ބޯޅަ ދެވޭނެ ގޮތެއް ނުހޯދޭ ކަމަށެވެ.

މިފަހަރުގެ ޗެމްޕިއަންސް ލީގުގެ ކުއާޓާ ފައިނަލުން ޔުވެންޓަސް ވަނީ ކަޓާފައެވެ. އެޓީމު ބަލިވީ ސެމީގައި ޓޮޓެންހަމް ހޮޓްސްޕާ އަތުން ބަލިވި ނެދަލޭންޑްސްގެ އަޔަކްސް އަތުންނެވެ.

ޕިރްލޯ މިހެން ބުނެފައިވާއިރު، ބައެއް ރިޕޯޓްތައް ބުނާ ގޮތުން އިސްކޯ ހޯދުމަށް ޔުވެންޓަސްއިން ވަނީ 85 މިލިއަން ޔޫރޯ ހުށަހަޅަން ނިންމާފައެވެ. އަދި އޭނާ ހޯދުމަށް އެ ކްލަބުން މަސައްކަތް ކުރަމުން އަންނަ ކަމަށްވެސް ރިޕޯޓްތައް ބުނެއެވެ.

އިސްކޯ ރެއާލްއާ އެކު ހަދާފައިވާ އެއްބަސްވުން 2017 ވަނަ އަހަރުގެ ސެޕްޓެމްބަރ މަހު ވަނީ އާކޮށްފައެވެ. އެ އެއްބަސްވުމުގެ ދަށުން އޭނާ 2022 ގެ ނިޔަލަށް ކްލަބުގައި މަޑުކުރަން ޖެހޭނެއެވެ.

ވެލެންސިއާ އިން ކެރިއަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފައެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ.

އޭނާ ވަނީ އެ ކްލަބުގައި މިހާތަނަށް ހޭދަކުރި ހަތަރު ސީޒަނުގައި ކުޅުނު 271 މެޗުގައި 47 ލަނޑު ކާމިޔާބުކޮށް، ލަލީގާ، ސްޕެނިޝް ސުޕަރ ކަޕް، ޔުއެފާ ޗެމްޕިއަންސް ލީގު ހަތަރު ފަހަރު، ފީފާ ކްލަބް ވާރލްޑްކަޕް ތިންފަހަރު، ޔުއެފާ ސުޕާ ލީގު ތިން ފަހަރު އަދި ކޮޕާޑެލްރޭ ކާމިޔާބުކޮށްފައެވެ.

ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފައެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވާރލްޑްކަޕްގެ ތިންވަނަ ސްޕެއިންއާ އެކު ކާމިޔާބުކޮށްފައެވެ.