ކަށީގެ ޑޮކްޓަރު ގެނައުން އަނެއްކާ ވެސް ލަސްވެއްޖެ: ޝާހު
12 މެއި 2019 | އާދީއްތަ 10:30ކަށީގެ ޑޮކްޓަރެއް ނެތްތާ ހަ މަސް
ހިތަދޫ ރީޖަނަލް ހޮސްޕިޓަލް
އައްޑޫ ސިޓީ ހިތަދޫ ރީޖަނަލް ހޮސްޕިޓަލަށް އަންނަން އޮތް ކަށީގެ ޑޮކްޓަރު އައުން އަނެއްކާ ވެސް ލަސްވެފައިވާ ކަމަށް ހޮސްޕިޓަލް ހިންގެވުމާ ވަގުތީ ގޮތުން ހަވާލުވެވަޑައިގެން ހުންނެވި ޝާހު ސައީދު ވިދާޅުވެއްޖެއެވެ.
މިސްރުން ގެންނަ ކަށީގެ ޑޮކްޓަރު ރާއްޖެ އަންނަން ބުނެފައި އޮތީ މި މަހުގެ 11 ވަނަ ދުވަހެވެ.
ޝާހު ވިދާޅުވީ ކަށީގެ ޑޮކްޓަރު އައުން ލަސްވީ އޭނާ ރާއްޖެއަށް އަންނަން ވެގެން ނަގާފައި އޮތް ޓިކެޓް ކެންސަލްވުމާ ގުޅިގެން ކަމަށެވެ. އޭނާ ގެނައުމުގެ މަސައްކަތް އަދިވެސް ކުރަމުން އަންނަ ކަމަށާއި، އަދި އިތުރު ޑޮކްޓަރެއް ވެސް ގެނައުމުގެ މަސައްކަތް ކުރަމުން އަންނަ ކަމަށް ވިދާޅުވިއެވެ.
ޑޮކްޓަރެއް ލިބެންދެން އައިޖީއެމްއެޗް ހޮސްޕިޓަލުން ވެސް ކަށީގެ ޑޮކްޓަރެއް ގެނައުމުގެ މަސައްކަތް ކަމާ ބެހޭ ފަރާތްތަކުން ކުރަމުން އަންނަ ކަމަށް ޝާހު ވިދާޅުވިއެވެ. ހިތަދޫ ހޮސްޕިޓަލްގައި ޑޮކްޓަރެއް ނެތްތާ ހަ މަސް ވަނީ ވެފައެވެ.
ކަށީގެ ޑޮކްޓަރެއް ނެތް އިރު، ދަތުގެ ބައެއް މައްސަލަތަކަށް ވެސް ފަރުވާ ނުދެވޭ ކަމަށް ޝާހު ވިދާޅުވިއެވެ. ޝާހު ވިދާޅުވީ ދަތުގެ ފަރުވާގެ ބައެއް ހިދްމަތްތައް މެދުކެނޑިފައިވާ ކަމަށާއި، އެއީ އެ ކަމަށް ބޭނުންވާ ސާމާނު ނެތުމުން ކަމަށެވެ. ޝާހު ވިދާޅުވީ އެ ސާމާނު މިހާރު އޯޑާރކޮށްފައިވާ ކަމަށެވެ.
އާ ސަރުކާރާ އެކު ވެސް އައްޑޫސިޓީގެ ސިއްހީ ނިޒާމަށް އެދެވޭ ހެޔޮ ބޮޑު ބަދަލެއް ނައިސް، ސިއްހީ ނިޒާމް އެއް ދުވަހުން އަނެއް ދުވަހަށް ދޯދިޔާ ވަމުން ދާ ކަމަށް ބުނެ، އެ ސިޓީގެ ގިނަ ރައްޔިތުން ދަނީ އެކަމާ ކަންބޮޑުވުން ފާޅުކުރަމުންނެވެ
މި ދިޔަ އަހަރުގެ ޖުލައިމަހުގެ 23 ވަނަ ދުވަހާ ހަމައަށް އަޕްޑޭޓް ކުރެވިފައިވާ ރެކޯޑްތަކުން ދައްކާ ގޮތުން އައްޑޫ ސިޓީގެ އާބާދީއަކީ 33501 އެވެ.
