ރާއްޖޭގެ އުފެއްދުންތައް މެލޭޝިއާ އިން!
މި ފިހާރައިން ލިބެން ހުންނަނީ މަސް ދަޅާއި ފިނިކުރި މަހުގެ ބާވަތްތައް
މެލޭޝިއާގައި ހުޅުވާފައިވާ ދަ މޯލްޑިވިއަން ފިޝް މާކެޓް
ދިވެހި އުފެއްދުންތައް އުފައްދާ ފިހާރައެއް މެލޭޝިއާގެ އަވަށެއްކަމުގައިވާ ސުބަންގ ޖަޔާގައި ހުޅުވައިފިއެވެ.
ދަ މޯލްޑިވިއަން ފިޝް މާރކެޓްގެ ނަމުގައި ހުޅުވާފައިވާ މި ފިހާރައިން ލިބެން ހުންނަނީ މަސް ދަޅާއި ފިނިކުރި މަހުގެ ބާވަތްތަކެވެ. މި ފިހާރަ އޭޕްރިލް މަހުގެ ފަހުކޮޅު ހުޅުވާފައިވާއިރު މިފިހާރަ މެލޭޝިޔާގައި ހުޅުވާފައިވަނީ މަޝްހޫރު ފުޓުބޯޅަ މެޗް ކޮމިޝަނަރ އަބްދުލް ހަމީދު އަބްދުލް ޤަފޫރު، އައްޑޯއެވެ.
މެލޭޝިއާ އަކީ ގިނަ ދިވެހިން އުޅޭ ޤައުމަކަށް ވުމާއެކު މަހާއި މަހުގެ ބާވަތްތައް ލިބުމުގައި ދިވެހީންނަށް ދަތިތަކާއި ކުރިމަތިވާ ކަމަށާއި އެހެންކަމުން މި ފިހާރައިގެ ސަބަބުން ދިވެހި ކުންފުނިތަކުން އުފައްދާ ދިވެހި އުފެއްދުންތައް ފަސޭހަކަމާއެކު މެލޭޝިއާގައި އުޅޭ ދިވެހިންނަށް ލިބިގެންދާނެ ކަމަށް އަބްދުލް ހަމީދު އަބްދުލް ޤަފޫރު ވަނީ ނޫސްތަކަށް ވިދާޅުވެފައެވެ.
އެންމެ ގިނަ ދިވެހިން ދިރިއުޅެމުން ގެންދަނީ އިންޑިއާ އަދި ސްރީލަންކާގައެވެ. އަދި މީގެ އިތުރުން މެލޭޝިއާ އަކީ ވެސް ގިނަ އަދަދެއްގެ ދިވެހިން ދިރިއުޅޭ ޤައުމެކެވެ.
