ރާއްޖޭގެ ހުރިހާ ސްކޫލަކަށް ނާސްތާ ތައްޔާރުކޮށްދޭނެ ބަޔަކު ހޯދަނީ

ރާއްޖޭގެ ހުރިހާ ސްކޫލަކަށް ނާސްތާ ތައްޔާރުކޮށްދޭނެ ފަރާތެއް ހޯދުމަށް އިއުލާންކޮށްފިއެވެ.

އެޑިޔުކޭޝަން މިނިސްޓްރީން ނެރެފައިވާ އިއުލާންގައި ބުނެފައިވަނީ ނާސްތާ ތައްޔާރުކޮށްދޭން ބީލަމަށް ހުށަހަޅަން ޝައުގުވެރިވާ ފަރާތްތަކުން އަންނަ އާދިއްތަ ދުވަހުން ފެށިގެން ބުދަ ދުވަހާހަމައަށް ނަން ނޯޓު ކުރުމުގެ ފުރުޞަތު ހުޅުވާލާފައިވާ ކަމަށެވެ.

އެޑިޔުކޭޝަން މިނިސްޓްރީން ބީލަމަށް ހުޅުވާލައިފައިވަނީ 188 ސްކޫލަކަށް ނާސްތާ ތައްޔާރު ކޮށްދޭނެ ފަރާތްތައް ހޯދުމަށެވެ. ނާސްތާ ތައްޔަރުކޮށްދޭން ބޭނުންވާ ކޮންމެ ސްކޫލެއްގައި 12 މެއި ފެށިގެން 15 މެއި އާއި ހަމައަށް ބަންދު ނޫން ކޮންމެ ދުވަހެއްގެ ހެދުނު 9:30 އިން 12:30 އަށް ނަން ނޯޓް ކުރެވޭނެ ކަމަށް އެޑިޔުކޭޝަން މިނިސްޓްރީގެ އިއުލާންގައި ބުނެފައިވެއެވެ.

ބީލަން ހުށަހެޅުމުގެ ފުރުސަތު ހުޅުވާލާނީ މި މަހުގެ 23 ވަނަ ދުވަހު ކަމަށް އެޑިޔުކޭޝަން މިނިސްޓްރީން ވަނީ ބުނެފައެވެ. ޕްރޮޖެކްޓްގެ ބިޑު ސެކިއުރިޓީގެ ގޮތުގައި -/5,000 (ފަސްހާސް) ދިވެހި ރުފިޔާ ހުށަހަޅަންވާނެ ކަމަށާއި، ބިޑު ސެކިއުރިޓީގެ މުއްދަތަކީ ބިޑު ހުޅުވާ ތާރީޚުން ފެށިގެން 30 ދުވަސް ކަމަށް އެޑިޔުކޭޝަން މިނިސްޓްރީން ވަނީ ބުނެފައެވެ.

ރާއްޖޭގެ 213 ސްކޫލުގެ ތެރެއިން މިއަހަރުގެ ފުރަތަމަ ޓާރމްގައި ނާސްތާ ޕްރޮގްރާމް ފަށާފައި ވަނީ 25 ސްކޫލެއްގައެވެ. އޭރު ސަރުކާރުން 25 ސްކޫލެއްގައި ނާސްތާ ޕްރޮގްރާމްގައި ފަށާފައިވަނީ އަޖުމަ ބެލުމުގެ ގޮތުން ޕައިލެޓް ޕްރޮގްރާމެއްގެ ގޮތުގައެވެ. ތަޖްރިބާއަށް ބެލުމަށްފަހު ދެވަނަ ޓާރމްގައި ރާއްޖޭގެ ހުރިހާ ސްކޫލެއްގައި ހެދުނުގެ ނާސްތާގެ ޕްރޮގްރާމް ފަށާނެ ކަމަށް އެޑިޔުކޭޝަން މިނިސްޓަރ ވަނީ ވިދާޅުވެފައެވެ.

ދަރިވަރުންނަށް ނާސްތާ ދިނުމަށް ބަޖެޓުގައި 50 މިލިއަން ރުފިޔާ ވަނީ ހިމަނައިފައެވެ.

ޔުނިސެފްގެ އެހީއާ އެކު މިނިސްޓްރީން ވަނީ ނާސްތާއަށް 10 މެނޫއެއް ވެސް ތައްޔާރުކޮށްފަ އެވެ. އޭގެ ތެރޭގައި ރޮއްޓާއި ބިސްގަނޑާއި ކިރާއި ތަރުކާރީ މަސްހުންޏާއި ބަރަބޯ މަސްހުންޏާއި ސޭންޑްވިޗް ފަދަ ތަކެތި ހިމެނެ އެވެ. ދަރިވަރުންނަށް ކޮންމެ ދުވަހަކު ވެސް އޭގެ ތެރެއިން ތިން މެނޫއެއް އޮންނާނެ އެވެ.