މިއަހަރުވެސް 2000 މީހުން ހައްޖަށް ފޮނުވޭނެ ކަމަށް މިނިސްޓަރ އޮފް އިސްލާމިކް އެފެއާޒްގެ ނައިބް ޝާފިއު އަލީ ވިދާޅުވެއްޖެއެވެ.

ސައޫދީ ސަރުކާރުން ރަސްމީކޮށް ރާއްޖެ އަށް ދެނީ އަހަރަކަށް 1،000 މީހުންގެ ކޯޓާ އެވެ. ނަމަވެސް ސައުދީ ރަސްގެފާނުގެ ހާއްސަ އިނާޔަތުގެ ދަށުން ދެއްވާ އިތުރު 1،000 ކޯޓާ އާއިއެކު އަހަރަކު ޖުމްލަ 2،000 ކޯޓާ ރާއްޖެ އަށް ދެމުން އަންނަތާ ތިން އަހަރު ވެއްޖެ އެވެ.

2000 ކޯޓާގެ ތެރެއިން 1000 ކޯޓާ ސައޫދީ ސަރުކާރުން ކެންސަލްކޮށްފައިވާކަމުގެ އަޑުތަކެއް ވަނީ ފެތުރިފައެވެ. އެކަމާއި ގުޅިގެން ރާއްޖެ.އެމްވީން ދެންނެވި ސުވާލަކަށް ޖަވާބު ދެއްވަމުން ޝާފިއު ވިދާޅުވީ އިތުރު 1000 ކޯޓާ ލިބޭނެ ކަމުގެ ޔަގީންކަން ސައޫދީ ހައްޖު މިނިސްޓްރީގެ އިސް ބޭފުޅުން ދެއްވާފައިވާ ކަމަށެވެ. އަދި އިތުރު ކޯޓާގެ ކަންތައް ވަރަށް އަވަހަށް ލިޔުމުން ހަމަޖެހޭނެ ކަމަށް ޝާފިއު ވިދާޅުވިއެވެ. 

ޝާފިއު ވިދާޅުވީ ރަސްމީ ކޯޓާގެ ގޮތުގައި ރާއްޖެއަށް ލިބެނީ 1000 ކޯޓާ ކަމަށާއި، ބާކީ އަނެއް 1000 ކޯޓާއަކީ ސައޫދީ ސަރުކާރުން އެކި ގައުމުތަކަށް ކޯޓާ ބަހައި ނިމޭއިރު، އެ ގައުމުތަކުން ބޭނުން ނުކުރުމުގެ ސަބަބުން ބާކީވާ ކޯޓާތައް ކަމަށެވެ. އިތުރު 1000 ކޯޓާ ހަމަޖެހުމުގައި ލަސްތަކެއް ދިމާވަމުން އަންނަނީ އެ ސަބަބާއި ހެދި ކަމަށް ޝާފިއު ވިދާޅުވިއެވެ.

2000 ކޯޓާގެ ތެރެއިން 50 އިން ސައްތަ ހައްޖު ކޯޕަރޭޝަނަށް ނަގާނެ ކަމަށް ޝާފިއު ވިދާޅުވިއެވެ. ޝާފިއު ވިދާޅުވީ ބާކީ 50 އިންސައްތަ ކޯޓާ ބަހާނީ ހައްޖަށް މީހުން ގެންދާ އެކި ގްރޫޕްތަކައް ކަމަށެވެ. ޝާފިއު ވިދާޅުވީ ކޯޓާ ބަހާނެ ހައްޖު ގްރޫޕްތައް އަދި ކަނޑައެޅިފައިނުވާ ކަމަށާއި، ގްރޫޕްތަކުގެ އިވެލުއޭޝަން މިހާރު ހަދަމުން ކަމަށް ވިދާޅުވިއެވެ. އިވެލިއޭޝަން ހެދުމަށްފަހު ގްރޫޕްތައް ވަރަށް އަވަހަށް ފައިނަލް ކުރާނެ ކަމަށް ވިދާޅުވިއެވެ.