ޕާކިސްތާނުގެ ލާހޯރުގައި ސޫފީންގެ މަގްބަރާއަކަށް ދިން ހަމަލާގައި ހަ މަރު!
8 މެއި 2019 | ބުދަ 15:47ހަމަލާގައި ޒަހަމްވީ މީހުންގެ އަދަދު ހާމަކޮށްފައެއް ނުވޭ
ލާހޫރުގައި ހުންނަ ދާޓާ ދަރުބާރު ބޭރުގައި ގޮއްވާލި ބޮމަށް ފަހު
ޕާކިސްތާނުގެ ލާހޯރުގައި ހުންނަ ސޫފީ މުސްލިމުންގެ މަގްބަރާއެއް ކަމުގައިވާ ދާޓާ ދަރްބާރަށް ދިން ހަމަލާގައި ހަ މީހަކު މަރުވެފައިވާ ކަމަށް ޕާކިސްތާނުގެ އޮފިޝަލުން ހާމަކޮށްފިއެވެ.
މި ހަމަލާގައި ޒަހަމްވީ ކިތައް މީހުންކަން ހާމަކޮށްފައި ނުވާ އިރު، ހަމަލާގެ ތަހުގީގު ދަނީ ކުރިޔަށް ކަމަށް ލާހޫރުގެ ޑިސްޓްރިކްޓް ކޮމިޝަނަރު ވިދާޅުވިއެވެ. ދާޓާ ދަރުބާރަށް ދިން ހަމަލާ އަމާޒުކޮށްފައި ވަނީ އެ ސަރަހައްދުގައި ގާއިމްކޮށްފައިވާ ފުލުހުންގެ ޕޯސްޓަކަށެވެ.
ހަމަލާއާ ގުޅިގެން ނެރުއްވި ބަޔާނެއްގައިޕާކިސްތާނުގެ ބޮޑުވަޒީރު އިމްރާން ޚާން ވަނީ ހަށިގަނޑު ގޮއްވާލައިގެން ދިން މި ހަމަލާ ވަރަށް ހަރުކަށި އިބާރާތުން ކުށްވެރި ކުރައްވާ ކަމަށް ވިދާޅުވެފައެވެ. ހަމަލާގައި މަރުވި ފަރާތްތަކުގެ އާއިލާއަށް އިމްރާން ތައުޒިޔާ ފޮނުއްވެވިއެވެ. ހަމަލާގައި ޒަހަމްވީ މީހުންނަށް އެންމެ ރަނގަޅު ފަރުވާ ލިބިގެންދާނެ ކަމަށް ވެސް އިމްރާން ވިދާޅުވިއެވެ.
ބުދަ ދުވަހު ދިން ހަމަލާގެ ޒިންމާ އެއްވެސް ބަޔަކު މިހާތަނަށް އުފުލާފައި ނުވާ އިރު، ހަމަލާދިން ދާޓާ ދަރުބާރަކީ މުޅި ދެކުނު އޭޝިއާގައި ހުންނަ އެންމެ ބޮޑު ސޫފީ މަގްބަރާއެވެ. މިތަނަށް އަހަރަކު އެއް މިލިއަން މީހުން ޒިޔާރަތްކުރެއެވެ.
