ހާރިޖީ ވަޒީރު ޝާހިދު ލަންކާ ބޮޑުވަޒީރާ ބައްދަލުކުރައްވައިފި
8 މެއި 2019 | ބުދަ 12:42ވިސާގެ މައްސަލައާ ބެހޭ ގޮތުން މަޝްވަރާކުރެއްވި ކަަމަށް ވިދާޅުވި
ހާރިޖީ ވަޒީރު ޝާހިދު ލަންކާގެ ބޮޑުވަޒީރު ރަނިލް ވިކްރަމަސިންހައާ އެކު ބޭއްވެވި ބައްދަލުކުރެއްވުމުގެ ތެރެއިން
ރާއްޖޭގެ ޚާރިޖީ ވަޒީރު އަބްދުﷲ ޝާހިދު އަވަށްޓެރި ސްރީލަންކާގެ ބޮޑުވަޒީރު ރަނިލް ވިކްރަމަސިންހައާ ބައްދަލުކުރައްވައިފިއެވެ.
ބުދަ ދުވަހު މިނިސްޓަރ ޝާހިދު ކުރެއްވި ޓްވީޓެއްގައި ވިދާޅުވީ ބޮޑުވަޒީރު ރަނިލްއާ ބައްދަލުކުރެވުމުން އުފާކުރައްވާ ކުރައްވާ ކަމަށެވެ. އަދި ދިވެހިރާއްޖެ އަބަދު ވެސް ލަންކާގެ ރައްޔިތުންނާ ސަރުކާރާ އެކުގައި ދެމިއޮންނާނެ ކަމުގެ ޔަގީންކަން ދެއްވި ކަމަށް ވެސް ޝާހިދު ވިދާޅުވިއެވެ. ދެ ބޭފުޅުންގެ ބައްދަލުކުރެއްވުމުގައި ވިސާ އާއި ޓެރަރިޒަމް ހުއްޓުވުން އަދި އެހެނިހެން ކަންކަމާ ގުޅޭ ގޮތުން އެއްބާރުލުން ދިނުމާ ބެހޭ ގޮތުން މަޝްވަރާކުރައްވާފައިވެއެވެ.
އަންގާރަ ދުވަހު ލަންކާއަށް ފުރާވަޑައިގަތުމުގެ ކުރިން މިނިސްޓަރ ޝާހިދު ވިދާޅުވީ ވިސާ ނެގުމަށް އައި ބަދަލުތަކާ ގުޅޭ ގޮތުން މަޝްވަރާކޮށް އެކަށީގެންވާ ވަރުގެ ހައްލެއް ލިބޭނެ ކަމަށް އުއްމީދު ކުރައްވާ ކަމަށެވެ. ލަންކާގައި ދިރިއުޅޭ ދިވެހިން "ރެޒިޑެންސް ވިސާ" މާލޭގައި ހުންނަ ލަންކާ އެމްބަސީން ނަގަން ޖެހޭ ގޮތަށް ލަންކާ ސަރުކާރުން ވަނީ ބަދަލުކޮށްފައެވެ.
މިނިސްޓަރ ޝާހިދުގެ މި ދަތުރުފުޅުގައި އެމަނިކުފާނު ލަންކާގެ ގާނޫނުހަދާ މަޖިލީހުގެ ރައީސް ކަރޫ ޖަޔަސޫރިޔާއާ ވެސް ބައްދަލުކުރައްވާފައި ވެއެވެ. ދެ ގައުމުގެ ގާނޫނޫހަދާ މަޖިލީހާ ގާނޫނީ އޮނިގަނޑުތަކާ ބެހޭ ގޮތުން ދެ ބޭފުޅުން ހިޔާލު ބަދަލުކުރެއްވި ކަމަށް ޝާހިދު ވިދާޅުވިއެވެ.
ހާރިޖީ ވަޒީރު އަބްދުﷲ ޝާހިދު މިހާރު ލަންކާއަށް ކުރައްވަމުން ގެންދަވާ ދަތުރުފުޅުގައި ލަންކާގެ އިދިކޮޅު ލީޑަރު މަހިންދަ ރާޖަޕަކްސަ އަދި އެހެން ސިޔާސީ ލީޑަރުންނާ ވެސް ބައްދަލުކުރައްވަން ހަމަޖެހިފައި ވެއެވެ.
