ސިޔާސީ ޕާޓީތަކުގެ ގާނޫނުގައި ފުށުއެރުންތަކެއް ހުރުމުން އެގާނޫނު އިސްލާހު ކުރުމަށް ޕާޓީތަކާއެކު މަޝްވަރާ ކުރަން އިލެކްޝަންސް ކަމިޝަން (އީސީ) އިން ނިންމައިފިއެވެ.
އިލެކްޝަންސް ކޮމިޝަންގެ ތަރުޖަމާނު އަހުމަދު އަކްރަމް ރާއްޖެއެމްވީއަށް ވިދާޅުވީ އެ ކޮމިޝަނުން މަސައްކަތް ކުރަމުންދަނީ ސިޔާސީ ޕާޓީތަކާއެކު ގާނޫނަށް އިސްލާހު ގެނައުމުގެ މަޝްވަރާތައް ފެށުމަށް ކަމަށެވެ.
އީސީ އިން މިހާރު ވަނީ ސިޔާސީ ޕާޓީތަކުގެ ގާނޫނަށް އިސްލާހު ގެންނަ ޑްރާފްޓެއް އެކުލަވާލާފައެވެ. އަކްރަމް ވިދާޅުވީ އެޑްރާފްޓާއެކު ޕާޓީތަކުގެ ޚިޔާލު ވެސް އެ ޑްރާފްޓަށް އިތުރު ކުރައްވާނެ ކަމަށެވެ.
"އެނގިލައްވާނެ އެ ގާނޫނުގައި އެބަހުރި ފުށު އަރާ ކަންތައްތައް. އެއަށް އިސްލާހު ގެނައުމުގެ މަސައްކަތް މިހާރު އަޅުގަނޑުމެން މި ކުރަނީ" އަކްރަމް ވިދާޅުވިއެވެ.
އަކްރަމް ވިދާޅުވީ ޕާޓީ ތަކާއެކު މަޝްވަރާ ކުރާނެ ދުވަހެއް ކަނޑައަޅުއްވާނީ އެ ކަމިޝަންގެ މެމްބަރުން ބައްދަލު ކުރެއްވުމަށް ފަހު ކަމަށެވެ.
ސިޔާސީ ޕާޓީތަކަށް ފައިސާ ދޫކުރުމުގައި ވެސް ގާނޫނު ފުށު އަރާ ކަންތައްތައް އެބަހުއްޓެވެ. އޭގެ ތެރޭގައި ޕާޓީއަށް ފައިސާ ދޫކުރުމަށް ކަނޑައަޅާފައިވަނީ މީލާދީ އަހަރެއް ފެށިގެން 90 ދުވަހުގެ ތެރޭގައެވެ. އަދި ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް އެޕާޓީއަކުން އީސީއަށް ހުށައެޅުމަށް ވެސް ކަނޑައަޅާފައިވަނީ މީލާދީ އަހަރެއް ފެށިގެން 90 ދުވަހުގެ ތެރޭގައެވެ. ހަމަ އެގޮތަށް ޕާޓީތަކަށް ފައިސާ ދޫކުރެވޭނީ އަދި ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް ހުށައެޅުމަށް ފަހު ކަމަށް އެ ގާނޫނުގައި ވަނީ ބުނެފައެވެ.
އަކްރަމް ވިދާޅުވީ އޮޑިޓް ރިޕޯޓް ޕާޓީތަކުން ހުށައެޅި ކަމުގައި ވިއަސް އޭގައި ހިމެނޭ ކަމަކަށް ފިޔަވަޅު އެޅޭނެ އެއްވެސް ގޮތެއް އެގާނޫނުގައި ހިމެނިފައި ނުވާކަމަށެވެ.
އެހެންކަމުން ކުރިއަށް އޮތް 19 ވަނަ ރައްޔިތުންގެ މަޖިލީހަށް ސިޔާސީ ޕާޓީތަކުގެ ގާނޫނަށް އިސްލާހު ގެނައުމަށް އެކަމިޝަނުން ހުށައަޅުއްވާނެ ކަމަށް އަކްރަމް ވިދާޅުވިއެވެ.
