މާފުށި ޖަލުގައި ފެން ޕްލާންޓެއް ހުޅުވައިފި
ފެން ޕްލާންޓް ހުޅުވައިދެއްވީ މިނިސްޓަރ އިމްރާން އަބްދުﷲ
މާފުށީ ޖަލުގައި ގާއިމުކުރި ފެން ޕްލާންޓް ހުޅުވުން
ޖަލުގައި ބަންދުކުރެވިފައިވާ ގައިދީންނަށް ސާފު ބޯފެން ފޯރުކޮށްދިނުމަށް ކ.މާފުށީ ޖަލުގައި ފެން ޕްލާންޓެއް ޤާއިމު ކޮށްފިއެވެ.
އާދިއްތަ ދުވަހު އޮތް ރަސްމިއްޔާތެއްގައި މި ފެން ޕްލާންޓް ހުޅުވައިދެއްވީ ހޯމް މިނިސްޓަރ ޝެއިޙް އިމްރާން އަބްދުﷲ އެވެ.
ފެން ޕްލާންޓް ހުޅުވައިދެއްވަމުން މިނިސްޓަރ ވިދާޅުވީ، މި ފެން ޕްލާންޓާއެކު ގައިދީންނަށް ހަމަހަމަ ކަމާއެކު ސާފު ބޯފެން ލިބިގެންދާއިރު، އިތުރަށް ހަރަދުކުރަން ނުޖެހި ސަރުކާރުގެ ފަރާތުން ހިލޭ އެކަށީގެންވާ ރަނގަޅު ފެން ލިބޭނެ އިންތިޒާމް ހަމަޖެހިގެންދާނެ ކަމަށާއި، ޖަލުގައި ބޭނުންކުރާ ފެން ނުސާފު ވުމުގެ ސަބަބުން ދިމާވާ ސިއްހީ މައްސަލަތަކަށް ހައްލެއް ލިބިގެންދާނެ ކަމަށް އުއްމީދު ކުރައްވާ ކަމަށެވެ.
ޤައިދީންނަށް ސާފު ބޯފެން ފޯރުކޮށްދިނުމަށް ފެށި މި މަޝްރޫއިން ލިބޭ ފައިދާގެ 30 އިންސައްތަ ޕްރިސްކޯ ކުންފުންޏަށް ލިބޭއިރު، އެކުންފުނި މެދުވެރިކޮށް ޓަނަކަށް 120 ރުފިޔާގެ މަގުން ސާފު ބޯފެން އުފައްދާނެއެވެ. އެގޮތުން ކުރިން ސާފު ބޯފެން އުފައްދަމުން އައިސްފައިވަނީ ޓަނަކަށް 420 ރުފިޔާގެ މަގުންނެވެ.
ޖަލުތަކުގެ ހާލަތު ބަލައި، ޖަލުތަކުގެ ހާލަތު ރަނގަޅު ކުރުމަކީ އާ ސަރުކާރުގެ ރިޔާސީ ވައުދެކެވެ. ކުރީގެ ރައީސް ޔާމީންގެ ވެރިކަމުގައި ޖަލުތަކުގެ ހާލަތު ވަރަށް ދަށްވެ، ގިނަ ގައިދީން ޖަލުގައި ވަނީ މަރުވެފައެވެ.
