ރާއްޖޭގައި ހުޅުވި ދަ ކެލޮރީ ކައުންޓަރ އައުޓްލެޓް ބަންދުކުރަން ނިންމައިފިއެވެ.

ދަ ކެލޮރީ ކައުންޓަރގެ މާލެ އައުޓްލެޓްގެ ވެރިޔާ މުހައްމަދު އިންފާޒް ފާއިޒް ވިދާޅުވީ ކެލޮރީ ކައުންޓަރ ބަންދުކުރަން ނިންމާފައިވަނީ އާންމުންގެ ފަރާތުން ހީކުރި ވަރަށް ތަރުހީބު ނުލިބުން ކަމަށާއި އެކަމުގެ އަސަރު ވިޔަފާރިއަށް ވެސް ކޮށްފައިވާ ކަމަށެވެ.

ކެލޮރީ ކައުންޓަރ އައުޓްލެޓުން ހިދުމަތްދޭނެ އެންމެ ފަހު ދުވަހަކީ މެއި މަހުގެ 5 ވަނަ ދުވަހެވެ.

މި އައުޓްލެޓް އަކީ ސިއްހަތަށް ފައިދާ ހުރި ކާއެއްޗެހިތައް ލިބިގެންދާ އައުޓްލެޓެކެވެ. އެގޮތުން ކަސްރަތު ކުރުމުގެ ކުރިންނާއި ފަހުން ކާންޖެހޭ އެއްޗެއްސާ ޗިކަން ވްރެޕްސް އަދި ސިއްހަތަށް ފައިދާ ހުރި އެކި ބުއިންތައް މި ތަނުން ލިބެން ހުރެއެވެ.

ދަ ކެލޮރީ ކައުންޓަރގެ ފްރެންޗައިޒް އައުޓްލެޓެއް ކުވައިތްގެ އިތުރުން ސްރީލަންކާގައި ވެސް ހުރެއެވެ.

މި އައުޓްލެޓް ރާއްޖޭގައި ހުޅުވާފައި ވަނީ މިދިޔަ އަހަރުގެ މާރޗް މަހުގެ 7 ވަނަ ދުވަހުއެވެ.