ހަބީބް ބޭންކްގައި ހުޅުވާއިފައިވާ އެކައުންޓްތަކުގެ ތެރެއިން ފަސް އަހަރު ވަންދެން އެއްވެސް މުއަމާލާތެއް ކޮށްފައިނުވާ އެކައުންޓުތަކުގެ ވެރިފަރާތުން ކުރިއަށް އޮތް 60 ދުވަހުގެ ތެރޭގައި ބޭންކަށް ހާޒިރުވެ، އެކައުންޓް އަލުން އޮޕަރޭޓްކުރުމަށްޓަކައި ކުރަންޖެހޭ ކަންތައްތައް ނުކޮށްފި ނަމަ، އެ އެކައުންޓުތަކުގައި ހުރި ފައިސާ  މޯލްޑިވްސް މަނިޓަރީ އޮތޯރިޓީ (އެމްއެމްއޭ)އާ ހަވާލުކުރާނެ ކަމަށް އެ ބޭންކުން ބުނެފިއެވެ.

ހަބީބް ބޭންކުން ނެރެފައިވާ ނޯޓިސްގައި ބުނީ އެ ބޭންކްގެ މާލޭ ބްރާންޗްގެ ރެކޯޑްތައް ދައްކާ ގޮތުން 31 ޑިސެމްބަރ 2018 ވަނަ ދުވަހާ ހަމައަށް ހިނގައިދިޔަ ފަސް އަހަރު ދުވަހުގެ މުއްދަތުގެ ތެރޭގައި އެ ބޭންކްގައި ހުޅުވާފައިވާ 13 ފަރާތެއްގެ އެކައުންޓުން އެއްވެސް މުއާމަލާތެއް ކޮށްފައިނުވާ ކަމަށެވެ.

އެގޮތުން، ވެރިފަރާތްތަކުން ބޭންކަށް އެއްވެސް ލިޔެކިއުމެއް ފޮނުވާފައި ނުވިނަމަވެސް، އެ ފަރާތްތަކުން ބޭންކަށް ލިބިފައިވާ އެންމެ ފަހުގެ އެޑްރެހަށް އެ އެކައުންޓްތަކުގެ ސްޓޭޓްމަންޓްތައް ބޭންކުން ގަވާއިދުން ފޮނުވާފައިވާ ކަމަށެވެ.

ހަބީބް ބޭންކުން ބުނީ ދިވެހިރާއްޖޭގެ ބޭންކިންގ ޤާނޫނުގެ 35 ވަނަ މާއްދާގައި ބަޔާންކޮށްފައިވާ ފަދައިން، ރަޖިސްޓްރީ ޕޯސްޓުގެ ޛަރިއްޔާއިން 10 ޖަނަވަރީގައި ކަމާ ގުޅޭ ގޮތުން ވަކިވަކިން ސިޓީ ފޮނުވައި، ސިޓީ ފޮނުވި ތާރީޚުން ފެށިގެން 45 ދުވަހުގެ ތެރޭގައި، މުއްދަތު ހަމަނުވާ އައިޑެންޓިޓީ ކާޑު/ޕާސްޕޯޓު ހިފައިގެން ބޭންކަށް ޙާޟިރުވުމަށް އަންގާފައިވާ ކަމަށެވެ.

އެއީ، އެފަރާތްތަކުގެ އެންމެ ފަހުގެ އިރުޝާދުތަކާ އެއްގޮތަށް ބޭންކުން އަމަލުކުރުމަށް ކަމަށާއި، ނަމަވެސް އެމުއްދަތުގެ ތެރޭގައި އެއިން ފަރާތަކުން ބޭންކަށް ހާޒިރުވެފައި ނުވާތީ އާއި އެންގުމެއް ވެސް އަންގާފައިނުވާ ކަމަށެވެ. އަދި އެ ނޯޓިސް ދިވެހި ސަރުކާރުގެ ގެޒެޓުގައި ޝާއިޢުކުރާ ތާރީޚުން ފެށިގެން 60 ދުވަހުގެ ތެރޭގައި، މުއްދަތު ހަމަނުވާ އައިޑެންޓިޓީ ކާޑު/ޕާސްޕޯޓު ހިފައިގެން ބޭންކަށް ހާޒިރުވެ، ބޭންކުގައި ހުޅުވާފައިވާ އެކައުންޓް އަލުން އޮޕަރޭޓްކުރުމަށްޓަކައި ކުރަންޖެހޭ ކަންތައްތައް ކުރުން އެދޭ ކަމަށެވެ.

ނަމަވެސް 60 ދުވަހުގެ މުއްދަތުގެ ތެރޭގައި އެއިން ފަރާތެއްގެ ކިބައިން އެއްވެސް އިރުޝާދެއް ބޭންކަށް ނުލިބިއްޖެ ނަމަ، އެފަރާތްތަކުގެ އެކައުންޓްތައް ބަންދުކޮށް، ހުރިހާ ޗެކުތަކާއި ބޭންކަށް ދީފައިވާ އެހެނިހެން އިރުޝާދުތައް ކެންސަލުކުރެވޭނެ ކަމަށެވެ. އަދި  އެކައުންޓް ބަންދުކުރުމަށް ފަހު، ދިވެހިރާއްޖޭގެ ބޭންކިންގ ގާނޫނުގެ 35 ވަނަ މާއްދާގައި ބަޔާންކޮށްފައިވާ ގޮތަށް އަމަލުކުރުމުގެ ގޮތުން، އެއެކައުންޓްތަކުގައި ވާ ހުރިހާ ފައިސާ އެމްއެމްއޭ އަށް ފޮނުވާނެ ކަމަށް ވެސް ބުނެފައި ވެއެވެ.