ރޯދަ މަހުގެ ފުރަތަމަ ދުވަހަކީ ހޯމަދުވަސް!
4 މެއި 2019 | ހޮނިހިރު 16:25މި މަހުގެ 5 ވާ އާދިއްތަ ދުވަހަކީ ޝައުބާން މަހުގެ 30 ވަނަ ދުވަސް
ހަނދު ސާބިތު ކުރުމަށް އިސްލާމިކް މިނިސްޓްރީން ބޭއްވި ބައްދަލުވުމުގެ ތެރެއިން
ރަމަޟާން މަހުގެ 1 ވަނަ ދުވަހަކީ މެއި މަހުގެ 6 ވާ ހޯމަ ދުވަސް ކަމަށް އިސްލާމީކް މިނިސްޓްރީން ކަނޑައަޅައިފިއެވެ
ރަމަޟާންމަހުގެ ހަނދު ސާބިތު ކުރުމަށް އިސްލާމީ މަރުކަޒުގައި ބޭއްވި ބައްދަލުވުމުން ނިންމާފައި ވަނީ މި މަހުގެ 5 ވާ އާދިއްތަ ދުވަހަކީ 1440 ވަނަ އަހަރުގެ ޝައުބާން މަހުގެ 30 ވަނަ ދުވަސް ކަމަށެވެ. އަދި މިއަހަރުގެ ރަމަޟާން މަހުގެ 1 ވަނަ ދުވަހަކީ މި މެއި މަހުގެ 6 ވާ ހޯމަ ދުވަސް ކަމަށެވެ. ފަލަކީ ހިސާބުތަކުން ދައްކާ ގޮތުން ރާއްޖެ އަށް މިއަދު އިރު އޮއްސޭ އިރު، ހަނދު ފެންމަތީގައި ފެންނާކަށް ނުހުންނާނެއެވެ. އެހެން ކަމުން ރާއްޖެ އަށް ހަނދު ފެނުމުގެ ފުރުސަތު ނެތް ކަމަށް ފަލަކީ ހިސާބުތަކުން ދައްކައެވެ.
މި ބަރަކާތްތެރި ރަމަޟާން މަހުގެ ރޯދައިގެ އަޅުކަން ފަރުވާތެރިކަމާއި އެކު އަދާ ކުރުމަށާއި އަދި މި މާތް މައްސަރުގެ ސަވާބާއި ދަރުމަ ހޯދުމަށް އެދި ހެޔޮކަންތައްތައް ގިނަކުރުމަށް ރާއްޖޭގެ ހުރިހާ ރައްޔިތުންނަށް އިސްކާމިކް މިނިސްޓްރީން ވަނީ އިލްތިމާސް ކޮށްފައެވެ.
