ދައުލަތުގެ ހާމަކަން ބޮޑުކޮށް މުއައްސަސާތަކުގެ ޒިންމާ ފުރިހަމައަށް އަދާކުރާނަމަ ފޭކުނިއުސް ފެތުރުމުގެ ފުރުސަތު ކުޑަވެގެންދާނެ ކަމަށް ރާއްޖެޓީވީގެ ކުރީގެ ސީއޯއޯ ހުސެން ފިޔާޒު މޫސާ ވިދާޅުވެއްޖެއެވެ.

ނޫސްވެރިކަމުގެ މިނިވަންކަމުގެ ދުވަހާއި ގުޅިގެން މޯލްޑިވްސް ޑިމޮކްރެސީ ނެޓްވޯކުން އިންތިޒާމުކޮށްގެން މީޑިއާތަކާއެކު ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ފިޔާޒު ވިދާޅުވީ ފޭކު ނިއުސް ފެތުރުން މަދުކުރުމަށްޓަކައި ދައުލަތުގެ ހާމަކަން ބޮޑުކޮށް ދައުލަތުގެ މުއްސަސާތަކުގެ ޒިންމާ ބޮޑުކުރަންޖެހޭ ކަމަށެވެ. އަދި ދައުލަތުގެ މުއައްސަސާތަކުން މައުލޫމަތު ފޯރުކޮށްދޭން ޖެހޭ ކަމަށް ގާނޫނުގައި ބުނެފައިވާއިރު އެ މުއައްސަސާތަކުން އަމިއްލަ އަށް ފޯރުކޮށްދޭން ޖޭހޭ މައުލޫމާތު ތަކެއްވެސް ހުރިކަމަށް ފިޔާޒު ވިދާޅުވިއެވެ.

ނަމަވެސް އެ މައުލޫމާތު ނޫސްވެރިންނަށާއި ރައްޔިތުންނަށް ފޯރުކޮށްދީ އެ ޒިންމާ ދައުލަތުގެ މުއައްސަސާތަކުން އަދާ ނުކުރާ ކަމަށް އޭނާ ވިދާޅުވިއެވެ. އަދި މައުލޫމާތެއް ހޯދަން ހަދަންޖެހޭ ގޮތެއްވެސް ކިޔައި ނުދޭ ކަމަށް އޭނާ ވިދާޅުވިއެވެ. އެހެންކަމުން ފޭކު ނިއުސް ފެތުރުމަށް ބޭނުންވާ ބަޔަކަށް އެފުރުސަތު ބޮޑުވެގެންދާ ކަމަށް އޭނާ ވިދާޅުވިއެވެ.

" ފޭކު ނިއުސްގެ ގޮތުގައި ބެލޭވެ ނިއުސް ބައެއް ފަހަރު އެއީ ހާލަތުގެ ގޮތުން ރަނގަޅު ޚަބަރަކަށް ވޭ. މިފަދަ ޑިޖިޓަލް ޒަމާނެއްގައި ފޭކު ނިއުސް ފެތުރުން މުޅިން ހުއްޓުވުމަކީ ނާދިރު ކަމެއް. ނަމަވެސް ކޮންޓްރޯލް ކުރެވޭނެ. ފޭކު ނިއުސްއަކީ ބޭނުންވާ ވަރަށް މައުލޫމާތު ނުހޯދާ ނުވަތަ އެކަށީގެންވާ މައުލޫމާތު ނޭނގި ލިޔާ ޚަބަރެއް ދޮގު ޚަބަރަކަށް ބެލިދާނެ ފުރުސަތު އެބަ އޮތް." ފިޔާޒު ވިދާޅުވިއެވެ. 

ދޮގު ޚަބަރު ފެތުރުމުގެ ސަބަބުން މުޖުތަމައަށް ލިބެމުންދާ ގެއްލުންތަކުގެ މައްޗަށް އަލި އަޅުވާލައްވާ މި ޕެނަލް ޑިސްކަޝަންގައި ވާހަކަ ދައްކަވަމުން ފިޔާޒު ވިދާޅުވީ ފޭކު ނިއުސްގެ ސަބަބުން އެތައްބައެއްގެ އަބުރާއި އިއްޒަތް ގެއްލި އެތައްބައެއްގެ ސިޔާސީ ކެރިއަރއަށް ނިމުން އައިސްފައިވާ ކަމަށެވެ. އަދި ގައުމުގެ އިސްތިގުލާލަށާއި މިނިވަންކަން ގެއްލޭ ހިސާބަށް ކަންތައްތައް ގޮސްފައިވާ ކަމަށް ވެސް އޭނާ ވިދާޅުވިއެވެ

ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމުގެ ގޮތުން ކޮންމެ އަހަރެއްގެ ވެސް މެއިމަހުގެ 3 ވަނަ ދުވަހު ބާއްވާ ޕެނަލް ޑިސްކަޝަންގައި ކޮންމެ އަހަރަކު ވެސް ނޫސްވެރިކަމުގެ ދާއިރާއިން ގިނަ ތަޖުރިބާތަކެއް ހޯދާފައިވާ ބޭފުޅުން ބައިވެރިވެއެވެ.